NAQ ak kamenaq chik laj Sanson, laj Samuel kiwank saʼ Israel choʼq aj raqol aatin ut choʼq propeet. Ebʼ laj Israel keʼraj wank joʼebʼ li junchʼol chi tenamit, joʼkan naq keʼxye re laj Samuel naq nekeʼraj naq junaq li awabʼej tjolominq rehebʼ. Usta ra kireekʼa li Jehobʼa, kixye re laj Samuel naq tixxaqabʼ laj Saul choʼq awabʼej saʼ xbʼeenebʼ. Saʼ xtiklajik, laj Saul qʼun chaq xchʼool, abʼan saʼ xnumikebʼ ru li chihabʼ kiʼok chi qʼetqʼetoʼk ut inkʼaʼ chik kiʼabʼink chiru li Yos. Joʼkan naq, li Jehobʼa kixtzʼeqtaana ut kixye re laj Samuel naq tixxaqabʼ laj David jun li saaj al re naq tkanaaq choʼq ruuchil laj Saul li awabʼej. Abʼan toj kinumeʼk naabʼal chihabʼ re naq t-oq chi awabʼejink li saaj al aʼin.

Saʼ jun kutan, laj David kiwulak chi rulaʼaninkil ebʼ li ras li yookebʼ chi kʼanjelak choʼq aj puubʼ rikʼin laj Saul. Naq kiwulak, ebʼ laj puubʼ wankebʼ saʼ jun li yalok ut nekeʼsiksotk xbʼaanebʼ xxiw. Abʼan kʼaʼut? Jun laj puubʼ aj Filisteo ut oxibʼ meetr xteram yook xmaajewankil li Yos ut ebʼ laj Israel. Li winq aʼin aj Goliat xkʼabʼaʼ. Laj David kichalk xjosqʼil naq kirabʼi aʼin, joʼkan naq kixsume yalok rikʼin toj reetal ani rehebʼ tkamq. Laj David saaj chiʼus chiru laj Goliat. Laj David kixkʼam chirix jun li rantʼin ut wiibʼ oxibʼ li pek. Naq laj Goliat kiril ru laj David, kiʼok xseʼenkil. Tojaʼ naq laj David kixye re li nimla winq aʼin naq kichalk chi yalok saʼ xkʼabʼaʼ li Jehobʼa. Jun ajwiʼ li pek kikʼanjelak chiru laj David re xqʼaxbʼal laj Goliat. Chirix chik aʼan kixmaqʼ li xqʼesnal chʼiichʼ ut kixchʼot xjolom laj Goliat. Naq ebʼ laj Filistea keʼril aʼin, keʼelelik xbʼaanebʼ xxiw.

Kʼajoʼ kisach xchʼool laj Saul li awabʼej naq laj David inkʼaʼ kixuwak chiru laj Goliat. Joʼkan naq kixkʼe chi kʼanjelak saʼ xyanqebʼ laj puubʼ. Saʼ xkʼabʼaʼ naq laj David us yook chi elk saʼ li yalok, laj Saul li awabʼej kiʼok xkaqalinkil ut kiʼok xsikʼbʼal re xkamsinkil. Ut re xkolbʼal li xyuʼam chiru laj Saul, kiʼelelik. Usta naabʼal chihabʼ kiwank chi muqmu, maajunwa kirataw xkamsinkil laj Saul, xbʼaan naq chʼolchʼo chiru naq li Jehobʼa kisikʼok ru choʼq awabʼej. Moqon chik, laj Saul kikamk saʼ jun li yalok. Tojaʼ naq laj David kiʼok chi awabʼejink joʼ chanru xyehom chaq li Jehobʼa.

Laj David kiraj xxaqabʼankil li rochoch li Jehobʼa. Abʼan kiyeheʼk re xbʼaan li Yos naq moko aʼan ta tbʼaanunq re li kʼanjel aʼin, jun bʼan rehebʼ li ralal xkʼajol, ut aʼan laj Salomon. Usta joʼkan kixkʼul laj David, li Jehobʼa moko kixkanabʼ ta chi joʼkan. Kixkʼojobʼ jun li sumwank rikʼin re naq aʼanaq xbʼeenil chiru jun chʼuut chi awabʼej li t-elq wiʼ chaq laj Kolonel, li kixye chaq li Yos saʼ li naʼajej Eden. Ut laj Kolonel aʼin aʼan li Sikʼbʼil Ru malaj li yulbʼil ru rikʼin santil musiqʼej. Ut aʼan sikʼbʼilaq ru xbʼaan li Jehobʼa re naq t-oq choʼq Awabʼej saʼ li Xʼawabʼejilal li Yos. Ut li xʼawabʼejilal maajunwa tjukʼmanq.

Laj David kiraj xbʼanyoxinkil li rusilal li Jehobʼa, joʼkan naq kixchʼutubʼ naabʼal li kʼanjelobʼaal li nakʼanjelak re kabʼlak ut naabʼal chik xchaqʼalil ru li chʼiichʼ re xyiibʼankil li rochoch li Yos. Joʼkan ajwiʼ saʼ xkʼabʼaʼ li xmusiqʼ li Yos kixkʼuubʼ naabʼal li saalm malaj li bʼich re xkʼeebʼal xloqʼal li Jehobʼa. Ak yook chaq chi nachʼok li xkamik laj David naq kixkʼe xloqʼal li Yos. Kixye naq saʼ xkʼabʼaʼ kiruuk xbʼaanunkil chixjunil saʼ li xyuʼam: «Li xmusiqʼ li Qaawaʼ [...] [kinxkʼe chi aatinak], li xloqʼlaj aatin wank chi xtzʼuumal we» (2 Samuel 23:2).

(Isinbʼil chaq saʼ 1 Samuel, 2 Samuel, saʼ 1 Cronicas, saʼ Isaias 9:7, saʼ Mateo 21:9, saʼ Lucas 1:32 ut saʼ Juan 7:42.)