AK OXIBʼ kutan xkamik li Kriist naq wiibʼ oxibʼ rehebʼ li xtzolom ixq kohebʼ chi rilbʼal li ochoch pek bʼarwiʼ kikʼeemank li Jesus naq kikamk, abʼan koleʼxtaw chi teeto li okebʼaal. Isinbʼil chik li pek ut maakʼaʼ chik wank chisaʼ.

Tojaʼ naq kutamilebʼ wiibʼ li anjel. Jun rehebʼ li anjel kixye: «Li Jesus aj Nazaret nekesikʼ [...]. Xwakliik chi yoʼyo, maaʼani chik arin» (Marcos 16:6). Naq ebʼ li ixq keʼrabʼi aʼin, saʼ junpaat koleʼxye chaq rehebʼ li xʼApostol li Jesus. Ut chiru bʼe keʼxtaw ribʼ rikʼin li Jesus ut kixye rehebʼ: «Mexxiwak. Ayuqex chi xyeebʼal rehebʼ li wiitzʼin naq xikaqebʼ Galilea; aran toxeʼril wu» (Mateo 28:10).

Chirix chik aʼan, wiibʼ rehebʼ li xtzolom keʼelk Jerusalen ut yookebʼ chi xik Emaus naq jun li winq kixpatzʼ rehebʼ chirix kʼaru yookebʼ chi aatinak. Li winq aʼin aʼan li Jesus, abʼan inkʼaʼ keʼxnaw ru xbʼaan naq moko juntaqʼeet ta chik naʼilok. Keʼxye re chi ra saʼ xchʼoolebʼ naq yookebʼ chi aatinak chirix laj tzolonel. Naq li winq kirabʼi aʼin, kiʼok xchʼolobʼankil chiruhebʼ chixjunil li naxye li Santil Hu chirix li Sikʼbʼil Ru. Chirix li Jesus kitzʼaqlok chaq chixjunil li kixye li Santil Hu naq kiʼaatinak chirix li Sikʼbʼil Ru. * Naq ebʼ li xtzolom keʼxkʼe reetal naq yookebʼ chi aatinak rikʼin li Kriist, li waklesinbʼil choʼq musiqʼej, sachaamil chiruhebʼ.

Li wiibʼ chi tzolom aʼin keʼsutqʼiik saʼ junpaat saʼ li tenamit Jerusalen ut kohebʼ chi xyeebʼal rehebʼ li Apostol li chʼutchʼuukebʼ saʼ jun li ochoch. Usta tzʼaptzʼo li ochoch, kutamil chiruhebʼ. Sachsookebʼ keʼkanaak naq keʼril ru li Jesus, tojaʼ naq kixpatzʼ rehebʼ: «Kʼaʼut naq naʼok eekʼaʼuxl?». Ut kixye ajwiʼ rehebʼ: «Joʼkaʼin tzʼiibʼanbʼil [...] tento naq li Kriist taarahobʼtesiiq ut taawakliiq chi yoʼyo saʼ xyanqebʼ li kamenaq saʼ rox li kutan» (Lucas 24:38, 46).

Naabʼal sut kiʼileʼk ru li Jesus chiru 40 kutan. Saʼ jun kutan, naxqʼax ru oobʼ siʼeent li poyanam kiʼilok ru. Maare saʼ li kutan aʼin kixtenebʼ li nimla kʼanjel saʼ xbʼeenebʼ li xtzolom naq kixye rehebʼ: «Ayuqex [...] ut kʼehomaqebʼ choʼq intzolom chixjunilebʼ li tenamit. [...] Kʼutumaq chiruhebʼ xpaabʼankil chixjunil li xexintaqla wiʼ. Chenawaq naq laaʼin wanqin eerikʼin chixjunil li kutan toj saʼ rosoʼjik li ruuchichʼochʼ» (Mateo 28:19, 20).

Naq li Jesus kixchaqʼrabʼihebʼ li xjunlaju chi tzolom, kixye rehebʼ: «Teekʼul eewankil naq li Santil Musiqʼej taachalq saʼ eebʼeen, ut laaʼexaq aj yehol yaal chiwix [...] toj saʼ xmaril li ruuchichʼochʼ» (Hechos 1:8). Naq kiraqeʼk xyeebʼal aʼin, kiʼok chi taqeʼq saʼ choxa ut li choql kiʼok chi muqunk re.

(Isinbʼil chaq saʼ Mateo tasal 28, saʼ Marcos tasal 16, saʼ Lucas tasal 24, saʼ Juan tasal 20, 21 ut saʼ 1 Corintios 15:5, 6.)