SAʼ XKUTANKILEBʼ li awabʼej re Israel ut Juda kiwank jun chʼuut chi propeet. Kiʼajmank naq inkʼaʼ teʼxuwaq ut naq kawaqebʼ xpaabʼal re xkʼeebʼal chi naweʼk li resil li Yos. Naabʼal tzʼaqal li esil keʼxkʼe chaq ut aʼin wiibʼ oxibʼ ajwi ʼ rehebʼ aʼin:

1. Tsachmanq li tenamit Jerusalen. Ebʼ li xpropeet li Yos, joʼ laj Isaias ut laj Jeremias, keʼxye chaq naq li tenamit Jerusalen tsachmanq ut ttzʼeqtaanaaq. Ak naabʼal chihabʼ xyeebʼal aʼin naq kitzʼaqlok ru. Keʼxye chaq ajwiʼ chi tzʼaqal kʼaʼut li tenamit kixchiqʼ chaq xjosqʼil li Yos. Usta keʼxye naq nekeʼxloqʼoni li Jehobʼa, li xnaʼlebʼebʼ moko naxkʼut ta aʼan xbʼaan naq yookebʼ chaq chi bʼalaqʼik ut chi rahobʼtesink ut keʼxmaajewa li Yos rikʼinebʼ li xpaabʼal (2 Reyes 21:10-15; Isaias 3:1-8, 16-26; Jeremias 2:1–3:13).

2. Teʼoq wiʼ chik saʼ li tzʼaqal paabʼal. Ak 70 chihabʼ xxikikebʼ Babilonia naq ebʼ laj Israel teʼsutqʼiiq saʼ xchʼochʼebʼ, teʼxyiibʼ wiʼ chik li Rochoch li Yos aran Jerusalen ut teʼoq wiʼ chik saʼ li tzʼaqal paabʼal (Jeremias 46:27; Amos 9:13-15). Wiibʼ siʼeent chihabʼ ma nakʼulmank naq laj Isaias kixye chaq naq laj Ciro li awabʼej t-eechaninq re li tenamit Babilonia ut tixkanabʼ chi xik li xtenamit li Yos. Ut kixye ajwiʼ kʼaru teʼxbʼaanu re reechaninkil li tenamit (Isaias 44:24–45:3).

3. Li xkʼulunik li Sikʼbʼil Ru ut li xwanjik. Li Sikʼbʼil Ru tyoʼlaaq Belen (Miqueas 5:2). Moko nimaq ta xwankil ut t-oq Jerusalen saʼ xbʼeen jun li xral bʼuur (Zacarias 9:9). Usta kʼajoʼ tixrahebʼ li poyanam naabʼalebʼ xikʼ teʼiloq re (Isaias 42:1-3; 53:1, 3). Ut kʼajoʼaq xrahil naq tkamq! Ma naraj xyeebʼal aʼin naq aran traqeʼq chi junajwa li Sikʼbʼil Ru? Inkʼaʼ, xbʼaan naq twaklesiiq chi yoʼyo re xqʼaxtesinkil re li Yos li xyuʼam re naq tkuyeʼq xmaak li ruuchichʼochʼ (Isaias 53:4, 5, 9-12).

4. Li xʼawabʼejilal li Sikʼbʼil Ru. Saʼ xkʼabʼaʼ naq li winq aj maak moko naxnaw ta awabʼejink, kaʼajwiʼ li Awabʼej li sikʼbʼil ru xbʼaan li Yos naxnaw xbʼaanunkil aʼin. Joʼkan naq nayeemank re, naq aʼan: «Xnimal ru aj kʼehol tuqtuukil usilal» (Isaias 9:6, 7; Jeremias 10:23). Naq t-awabʼejinq, twanq tuqtuukilal saʼ chixjunil li Ruuchichʼochʼ. Li winq twanq chik saʼ junajil rikʼinebʼ li xul (Isaias 11:3-7). Maakʼaʼaq chik li yajel (Isaias 33:24). Moko tjultikamanq ta chik li kamk (Isaias 25:8). Chi miyon li qas qiitzʼin teʼwakliiq wiʼ chik chi yoʼyo (Daniel 12:13).

(Isinbʼil chaq saʼ Isaias, saʼ Jeremias, saʼ Daniel, saʼ Amos, saʼ Miqueas ut saʼ Zacarias.)