LI Yos kixkʼe xwankil li Ralal re naq tixbʼaanu naabʼal li sachbʼachʼoolej ut naabʼalebʼ keʼril aʼin. Naq kixbʼaanu aʼin kixkʼutbʼesi naq wank xwankil chi xqʼaxbʼal chixjunil li maaʼusilal ut li chʼaʼajkilal. Qilaq wiibʼ oxibʼ rehebʼ aʼin.

Li Jesus kixkʼehebʼ chi waʼak ut chi ukʼak ebʼ li poyanam. Li Jesus kixbʼaanu li xbʼeen sachbʼachʼoolej naq kixsuqʼisi choʼq bʼiin li haʼ. Ut chi joʼkan kixkʼutbʼesi naq wank xwankil re xkʼeebʼalebʼ chi waʼak ut chi ukʼak naabʼalebʼ li poyanam. Chiru wiibʼ sut, kixtambʼresi wiibʼ oxibʼ li kaxlanwa ut li kar re xchʼoolaninkil naabʼal li qas qiitzʼin, ut kireelaʼink naabʼal li tzakahemq.

Li Jesus kixkʼirtasihebʼ li yaj. Li Kriist kixkʼirtasihebʼ li ra wankebʼ, kirisi «chixjunil li rahilal ut yajel» (Mateo 4:23). Kixkʼehebʼ chi ilok li mutzʼ, kixtehebʼ xxik li tzʼap xik, kixkʼehebʼ chi bʼeek ebʼ li sik, kixbʼanebʼ li saqlep ut li nekeʼtʼaneʼk saʼ xxaqamilebʼ. Joʼkan bʼiʼ, li Jesus naru narisi chixjunil xbʼaan naq wank xwankil.

Li Jesus kixchʼanabʼ li kaqsut-iqʼ. Saʼ jun qʼoqyink, naq li Jesus ut ebʼ li xtzolom yookebʼ chi xik chiru li palaw re Galilea, kichalk jun li nimla kaqsut-iqʼ. Ebʼ li xtzolom li Jesus kʼajoʼ naq keʼxuwak! Abʼan li Jesus kiʼilok saʼ choxa ut kixye: «Matchoqink! Chʼanaqat!». Naq kixye aʼin, saʼ junpaat kituqlaak li kaqsut-iqʼ (Marcos 4:37-39). Saʼ jun kutan li Jesus kibʼeek saʼ xbʼeen haʼ naq yook li kaqsut-iqʼ (Mateo 14:24-33).

Li Jesus kixqʼusebʼ li maaʼus aj musiqʼej. Ebʼ li maaʼus aj musiqʼej jwal nimebʼ xwankil chiqu. Joʼkan naq, nekeʼxchʼiʼchʼiʼi ebʼ li poyanam ut naabʼalebʼ inkʼaʼ nekeʼruuk chi elk rubʼel xwankil. Abʼanan li Jesus inkʼaʼ kixuwak chaq ruhebʼ. Aʼanebʼ bʼan keʼsiksotk chiru ut saʼ junpaat keʼabʼink chiru naq keʼyeheʼk rehebʼ naq teʼxkanabʼ xchʼiʼchʼiʼinkilebʼ li poyanam.

Li Jesus kixqʼax ru li kamk. Li Jehobʼa xikʼ naril li kamk. Ut maaʼani naru nakoleʼk chiru li kamk (1 Corintios 15:26, TNM). Abʼan li kamk moko wank ta xwankil chiru li Jesus, joʼkan naq, kixwaklesi wiʼ chik chi yoʼyo li xyum jun li malkaʼan ut jun li chʼina ixqaʼal. Abʼan jwal nim wiʼ chik li kixbʼaanu rikʼin laj Lazaro li ramiiw, naq ak kaahibʼ kutan xkamik kixwaklesi chi yoʼyo chiruhebʼ li kʼiila tenamit. Ut usta inkʼaʼ keʼraj, li xikʼ keʼilok chaq re li Jesus, keʼxkʼe reetal naq nim xwankil (Juan 11:38-48; 12:9-11).

Abʼanan naq keʼnumeʼk li chihabʼ, ebʼ li qas qiitzʼin aʼin, keʼyajerk ut keʼkamk. Joʼkan bʼiʼ, ma kikʼanjelak ebʼ li sachbʼachʼoolej li kixbʼaanu li Jesus chirixebʼ? Kikʼanjelak chiʼus xbʼaan naq kixkʼutbʼesi naq yaal kixye chaq li Santil Hu chirix li Xʼawabʼejilal li Yos li wanq saʼ ruqʼ li Jesus. Joʼkan naq chʼolchʼo tzʼaqal naq li Awabʼej li kixxaqabʼ li Yos, trisi li weʼej, li yajel, li kaqsut-iqʼ, li maaʼus aj musiqʼej ut li kamk. Rikʼin aʼin naqakʼe reetal naq li Jehobʼa kikʼehok xwankil li Jesus re naq truuq xbʼaanunkil chixjunil.

(Isinbʼil chaq saʼ Mateo, saʼ Marcos, saʼ Lucas ut saʼ Juan.)