TASAL 25
Li Naʼlebʼ Chirix li Qapaabʼal, li Qabʼaanuhom ut li Qarahom
Laj Santiago, laj Pedro, laj Juan ut laj Judas keʼtzʼiibʼank hu re xkawresinkilebʼ xchʼool ebʼ li tzʼaqal aj paabʼanel
LAJ Santiago ut laj Judas xkabʼ riitzʼinebʼ li Jesus. Laj Pedro ut laj Juan wankebʼ choʼq Xʼapostol li Jesus. Saʼ xkaahichalebʼ keʼmusiqʼaak chaq xbʼaan li Yos re naq teʼxtzʼiibʼa 7 li hu saʼ li aatinobʼaal Griego li nawbʼil ru joʼ akʼ chaqʼrabʼ. Li junjunq chi hu aʼin naxkʼam xkʼabʼaʼebʼ li winq aʼin. Ut kikʼanjelak re naq laj paabʼanel inkʼaʼ teʼxtzʼeqtaana li Jehobʼa ut re naq inkʼaʼ teʼxkanabʼ chirix xchʼool li Xʼawabʼejilal li Yos.
Qakʼutbʼesihaq li qapaabʼal. Moko tzʼaqal ta rikʼin xyeebʼal naq wank qapaabʼal, tento bʼan tqakʼutbʼesi rikʼin li qabʼaanuhom. Joʼ naxye saʼ Santiago: «Li paabʼaal chi maakʼaʼ xbʼaanuhom kamenaq» (Santiago 2:26). Li naxkuy li aaleek saʼ xkʼabʼaʼ li Yos, nakawuuk li xpaabʼal. Ut wi tixtzʼaama xnaʼlebʼ, chʼolchʼooq tzʼaqal naq tkʼeheʼq re. Ut wi maajunwa tixtzʼeqtaana li Jehobʼa, tixtaw rusilal rikʼin (Santiago 1:2-6, 12). Li Yos junelik naxtenqʼahebʼ li maajunwa nekeʼxtzʼeqtaana ut tiikebʼ xchʼool chiru. Joʼkan naq, laj Santiago naxye: «Jilonqex chi xkʼatq li Yos, ut aʼan taajiloq chekʼatq» (Santiago 4:8).
Ebʼ li tzʼaqal aj paabʼanel tento teʼxkawresi li xpaabʼal re naq teʼruuq xtzʼeqtaanankil li aaleek ut li tzʼaj aj naʼlebʼ. Saʼ xkutankil laj Judas, numtajenaq chaq li koʼbʼeetak yumbʼeetak, joʼkan naq kixye: «Teeyal eeqʼe chi xkolbʼal rix li paabʼaal» (Judas 3).
Junelik saqaq li qayeehom bʼaanuhom. Li Jehobʼa naraj naq li nekeʼloqʼonink re santaqebʼ ut saqaqebʼ ru li xyuʼam. Joʼkan naq laj Pedro kixtzʼiibʼa: «Santaqex [...] rikʼin chixjunil leeyehom leebʼaanuhom [...] xbʼaan naq tzʼiibʼanbʼil saʼ li Santil Hu: Santaqex xbʼaan naq [laaʼin li Jehobʼa] santin» (1 Pedro 1:15, 16). Li Jesus kixkanabʼ jun chaabʼil eetalil choʼq rehebʼ li tzʼaqal aj paabʼanel. Joʼkan naq li Apostol Pedro kixye: «Li Kriist [...] kixkʼam eebʼe», ut aʼan ttenqʼanq rehebʼ laj paabʼanel re naq teʼruuq xbʼaanunkil aʼin (1 Pedro 2:21). Usta wank sut maare chʼaʼaj xpaabʼankil li xchaqʼrabʼ li Yos, jwal oxloqʼ tzʼaqal wi saq li qachʼool chiru (1 Pedro 3:16, 17). Laj Pedro kixye naq junelik saqaq ru li qachʼool ut inkʼaʼ tqakanabʼ xloqʼoninkil li Yos anaqwan naq yook chaq chi nachʼok Xkutankil li Raqok Aatin ut li akʼ ruuchichʼochʼ, «bʼarwiʼ taawanq li tiikilal» (2 Pedro 3:11-13).
«Jilonqex chi xkʼatq li Yos, ut aʼan taajiloq chekʼatq.» (Santiago 4:8)
Qakʼutbʼesihaq li rahok. «Li Yos aʼan rahok», chan laj Juan. Li Jehobʼa kixkʼutbʼesi naq jwal nokooxra naq kixtaqla chaq li Ralal re xkʼeebʼal li xyuʼam choʼq «kames-mayej chirix li qamaak». Saʼ xkʼabʼaʼ naq li Yos nokooxra, kʼaru raj tento tqabʼaanu? Laj Juan kixchʼolobʼ aʼin naq kixye: «Ex inrahom, wi joʼkaʼin naq kooxra li Yos, laaʼo ajwiʼ tento naq chiqara qibʼ chiqibʼil qibʼ» (1 Juan 4:8-11). Wi naqilebʼ ut naqatenqʼahebʼ li qech aj paabʼanel, tqakʼutbʼesi naq naqarahebʼ (3 Juan 5-8).
Ut chanru nekeʼxkʼutbʼesi ebʼ li tzʼaqal aj paabʼanel naq nekeʼxra li Jehobʼa? Laj Juan kixsume li patzʼom aʼin naq kixye: «Aʼan aʼin li xraabʼal li Yos: naq chiqapaabʼ ebʼ li xchaqʼrabʼ. Ut ebʼ li xchaqʼrabʼ moko aalebʼ ta [malaj moko chʼaʼaj ta xbʼaanunkil]» (1 Juan 5:3; 2 Juan 6). Li nekeʼabʼink chiru li Yos, naru teʼwanq saʼ li Xrahom ut teʼruuq ajwiʼ xtawbʼal li «junelik yuʼam» (Judas 21).
(Isinbʼil chaq saʼ Santiago, saʼ 1 Pedro, 2 Pedro, saʼ 1 Juan, saʼ 2 Juan, saʼ 3 Juan ut saʼ Judas.)
