LI TASAL hu Salmo pim ru ut chisaʼ wankebʼ li bʼich re xkʼeebʼal xloqʼal li Yos ut chiru jun mil chihabʼ tana keʼxchʼutubʼ chixjunil li bʼich aʼin. Saʼebʼ li bʼich aʼin ebʼ laj tzʼiibʼ keʼxkʼutbʼesi xkawil li xpaabʼal. Keʼxkʼutbʼesi ajwiʼ li kʼaru keʼreekʼa chaq joʼ xsahilebʼ xchʼool ut li rahilal, li bʼanyoxink ut li jalok naʼlebʼ, li kʼehok loqʼal ut li rahil chʼoolej. Chixjunilebʼ li winq aʼin keʼxra chaq li Yos ut keʼwank chaq chixkʼatq. Qilaq wiibʼ oxibʼ rehebʼ li naʼlebʼ li wank saʼ li Salmo.

Li Jehobʼa, li Nimajwal Yos wank xkʼulubʼ naq tqakʼe xloqʼal ut tqaloqʼoni ru. Li Santil Hu naxye: «Re naq teʼxnaw naq laakʼabʼaʼ aʼan Jehobʼa ut kaʼajwiʼ laaʼat Nim Laawankil saʼ xbʼeen chixjunil li Ruuchichʼochʼ» (Salmo 83:18, TNM). Wank jalan jalanq xtasalil li Salmo li naxkʼe xloqʼal li Jehobʼa xbʼaan naq Aʼan kiyiibʼank re li choxa, ebʼ li chahim, li yuʼam saʼ Ruuchichʼochʼ ut li xchʼinaʼusal li qatibʼel (Salmos 8, 19, 139 ut 148). Ut naabʼalebʼ li Salmo nekeʼxkʼe xloqʼal xbʼaan naq naxtenqʼahebʼ ut naxkolebʼ li tiikebʼ xchʼool chirix li Yos (Salmos 18, 97 ut 138). Ut wankebʼ nekeʼbʼichank chiru xbʼaan naq Aʼan Xyosil li tiikilal ut naxtenqʼahebʼ li nekeʼxkʼul li rahilal ut naxkʼehebʼ chi xtojbʼal xmaak li maaʼusebʼ xnaʼlebʼ (Salmos 11, 68 ut 146).

Li Jehobʼa naxtenqʼahebʼ ut naxkʼojobʼebʼ xchʼool li nekeʼrahok re. Yalaq ani naxnaw kʼaru naxye saʼ Salmo 23. Saʼ li Salmo aʼin laj David kixjuntaqʼeeta li Qayuwaʼ li wank saʼ choxa rikʼin jun li chaabʼil aj kʼaakʼalenel li naxkol, naxchʼoolani ut naril li xkarneer. Saʼ jun chik li Salmo naxye naq li Jehobʼa narabʼi ebʼ li «qatij» (Salmo 65:3 [65:2, Wy]). Joʼkan ajwiʼ, li keʼxbʼaanu chaq li maaʼusilal nekeʼxtaw xkʼojobʼankil xchʼool saʼebʼ li Salmo 39 ut saʼ li 51. Saʼ jun rehebʼ li tasal aʼin laj David naxye naq nayotʼeʼk xchʼool saʼ xkʼabʼaʼ li xmaak ut naq chʼolchʼo chiru naq li Yos tixkuy xmaak. Ut saʼ jun chik li Salmo naxye qe naq tqakʼojobʼ qachʼool rikʼin li Jehobʼa ut tqaqʼaxtesi saʼ ruqʼ li qakʼaʼuxl (Salmo 55:23 [55:22, Wy]).

Li Jehobʼa troksi li Awabʼejilal li wank saʼ ruqʼ li Sikʼbʼil ru re xkʼambʼal chaq li akʼ ruuchichʼochʼ. Saʼ naabʼal li raqal li Salmo naʼaatinak chirix li Awabʼej li Sikʼbʼil Ru. Saʼ li Salmo 2 kiyeemank chaq naq li Awabʼej aʼin tixjukʼ li awabʼejilal li tnatʼoq re xbʼe. Saʼ li Salmo 72 naxye naq trisi li weʼej, li rahilal ut chixjunil li maaʼusilal. Jun chik li Salmo naxye naq li Yos trisi li yalok u ut troksi li awabʼejilal li wank saʼ ruqʼ li Jesus re xkʼajinkilebʼ li puubʼ (Salmo 46:10 [46:9, Wy]). Ut saʼ li Salmo 37 naxye naq saʼ li akʼ ruuchichʼochʼ maakʼaʼaqebʼ chik li maaʼusebʼ xnaʼlebʼ ut li nekeʼloqʼonink re li Yos wanqebʼ chi junelik saʼ tuqtuukilal ut saʼ junajil.

(Isinbʼil chaq saʼ xhuhil li Salmo.)