«SAʼ XTIKLAJIK [...] li Yos kixyoobʼtesi li choxachʼochʼ.» (Genesis 1:1.) Kʼajoʼ xchʼinaʼusal li aatin aʼin ut yalaq ani nanawok re. Rikʼin wiibʼ oxibʼ ajwiʼ li aatin, li Santil Hu naxchʼolobʼ naq li Jehobʼa, li Nimajwal Yos, kiyoobʼtesink re li choxa ut li Ruuchichʼochʼ. Ut naxye ajwiʼ naq chiru naabʼal chihabʼ kixyiibʼ chiʼus li Ruuchichʼochʼ ut kixkʼe xyuʼam chixjunil li xyoobʼtesihom.

Li winq aʼan li xnimal ru xyoobʼtesihom li Yos li kixbʼaanu arin saʼ Ruuchichʼochʼ. Kixyoobʼtesi li xbʼeen winq rikʼin xpoqsil li chʼochʼ. Ut kixyoobʼtesi joʼ xjalam u re naq li winq truuq xkʼambʼal re rikʼin li xrahom, li xnaʼlebʼ ut chixjunil chik li xchaabʼilal li Yos. Aj Adan kixkʼe choʼq xkʼabʼaʼ ut kixkʼe saʼ jun li chʼinaʼusil naʼajej li kixkʼabʼaʼi Eden. Li Yos kikʼuubʼank re li naʼajej aʼin ut kixkʼe naabʼal paay ru li cheʼ re xtzakankil.

Saʼ jun kutan li Yos kixkʼoxla naq us raj naq wanq rochbʼeen li winq. Joʼkan naq, kirisi jun li xbʼaqel laj Adan re xyoobʼtesinkil li xʼEva, li xbʼeen ixq ut kixkʼe choʼq rixaqil. Kʼajoʼ naq kisahoʼk saʼ xchʼool laj Adan naq kiril ru li ixq! Joʼkan naq, kixye li uutzʼuʼujinbʼil aatin aʼin: «Anaqwan tzʼaqal xbʼaqel linbʼaqel ut xtibʼel lintibʼel!». Li Yos naxye chirix aʼin: «Li winq tixkanabʼ li xnaʼ xyuwaʼ, tixlaqʼabʼ ribʼ rikʼin li rixaqil, ut junajebʼ [...] chik chi tzʼejwalej naq wanqebʼ» (Genesis 2:22-24; 3:20).

Li Yos kixkʼe wiibʼ li chaqʼrabʼ re laj Adan ut xʼEva. Li xbʼeen chaqʼrabʼ, keʼyeheʼk rehebʼ naq teʼril li chʼochʼ ut teʼxkʼanjela ru ut teʼwanq naabʼal xkokʼal. Saʼ li xkabʼ, keʼyeheʼk rehebʼ naq inkʼaʼ teʼxtzaka jun ajwiʼ ru li cheʼ: li «cheʼ re xnawbʼal li us ut li inkʼaʼ us» (Genesis 2:17). Wi inkʼaʼ raj teʼabʼinq chiru li Yos, teʼkamq. Joʼkan naq saʼ li hoonal aʼin teʼruuq raj xkʼutbʼesinkil naq nekeʼraj naq li Yos tjolominq rehebʼ, naq nekeʼxra ut naq nekeʼxbʼanyoxi chixjunil li kʼeebʼil rehebʼ. Saʼ xkʼabʼaʼ naq moko ebʼ aj maak ta ut maakʼaʼebʼ xpaltil, sahebʼ saʼ xchʼool chi xloqʼoninkil li Xyuwaʼebʼ li wank saʼ choxa. Joʼkan naq li Santil Hu naxye: «Li Yos kiril chixjunil li xbʼaanu [...] qʼaxal chaabʼil» (Genesis 1:31).

(Isinbʼil chaq saʼ Genesis tasal 1, 2.)