AK XNUMEʼK tana 350 chihabʼ chalen chaq xraqik li Bʼutʼihaʼ. Saʼ li tenamit Ur wank li bʼihomal, ut saʼebʼ li qakutan aran wank li tenamit Irak. Ut aran wank chaq laj Abrahan. Laj Abrahan kʼojkʼo xchʼool chirix li Yos joʼkan naq kiyaleʼk rix li xpaabʼal. Qilaq kʼaru kikʼulmank.

Kiyeheʼk re xbʼaan li Jehobʼa naq tixkanabʼ li xtenamit ut txik saʼ li tenamit Canaan. Laj Abrahan moko kixkʼoxla ta wiibʼ sut, saʼ junpaat kiʼabʼink chiru li Yos ut koho. Kixchap xbʼe rochbʼeen li xSara li rixaqil, laj Lot li rikaq, ut chixjunil li xjunkabʼal. Naq keʼwulak Canaan, moko saʼ tzʼaqal ochoch ta chik koleʼokaq ut keʼok xbʼeeninkil jalan jalanq chi naʼajej. Li Jehobʼa kixkʼojobʼ jun li sumwank rikʼin. Ut kixye re laj Abrahan naq saʼ xkʼabʼaʼ teʼosobʼtesiiq chixjunilebʼ li junkabʼal, tixkʼe naabʼal ralal xkʼajol ut teʼreechani li tenamit Canaan.

Laj Abrahan ut laj Lot keʼwank naabʼal xkarneer ut xwakax. Laj Abrahan jwal chaabʼil xnaʼlebʼ, kixkanabʼ naq laj Lot tixsikʼ xbʼeenwa li naʼaj li nawulak chiru choʼq rehebʼ li xketomq. Laj Lot kixsikʼ jun li naʼaj nachʼ chixkʼatq li tenamit Sodoma: saʼ xteepal li nimaʼ Jordan. Jwal chaabʼil chaq ru li chʼochʼ aran. Abʼan, ebʼ li wankebʼ aran jwal tzʼajebʼ ru xnaʼlebʼ, rikʼin xmuxbʼalebʼ ribʼ yookebʼ chaq xmaajewankil li Jehobʼa.

Ak kixjach ribʼ laj Abrahan rikʼin laj Lot naq li Jehobʼa kixye re naq tixkʼe naabʼal li ralal xkʼajol ut li xkʼihal chanchanaq li chahim. Laj Abrahan kaw xpaabʼal chirix li Jehobʼa, abʼan li xSara li rixaqil inkʼaʼ naru nawank xkʼuulaʼal. Laj Abrahan wank 99 chihabʼ re, ut li xSara kachʼin chik ma 90 naq li Yos kixye re laj Abrahan naq twanq jun li ralal. Ut joʼkan kikʼulmank: li xSara kiwank xchʼina yum ut Isaac kixkʼabʼaʼi. Usta laj Abrahan kiwank jalan chik ralal xkʼajol, kaʼajwiʼ saʼ li xjunkabʼal laj Isaac tchalq laj Kolonel li kiyeemank chaq saʼ Eden.

Naq kikʼulmank aʼin, laj Lot wank chaq Sodoma rikʼin li xjunkabʼal. Saʼ xkʼabʼaʼ naq laj Lot chaabʼil winq inkʼaʼ kixkʼam re rikʼinebʼ laj Sodoma. Saʼ jun kutan naq li Jehobʼa kixye naq tixsach li tenamit Sodoma, xbʼeenwa kixtaqla wiibʼ oxibʼ li anjel re naq teʼxye chaq li esil aʼin re laj Lot. Keʼxye re laj Lot naq chiʼeeleliq rochbʼeen li xjunkabʼal ut maaʼani t-iloq chirix. Tojaʼ naq li Yos kixkubʼsi chaq xaml ut asuupr saʼ choxa re xkamsinkilebʼ li maaʼusebʼ xnaʼlebʼ li wankebʼ chaq Sodoma ut Gomorra. Laj Lot ut ebʼ li xrabʼin keʼkoleʼk, abʼan li rixaqil kikamk xbʼaan naq inkʼaʼ kiʼabʼink. Li rixaqil kiʼok tana xkʼoxlankil li xbʼihomal joʼkan naq kiʼilok chirix.

(Isinbʼil chaq saʼ Genesis 11:10–19:38.)