•   Chanru nakaawekʼa naq nekeʼhobʼok li junchʼol?

  •  Chi moko ninkʼe reetal xbʼaan naq kʼaynaqin chi rabʼinkil.

  •  Nikinxchʼiʼchʼiʼi bʼayaq abʼan maakʼaʼ naru ninbʼaanu.

  •  Ninkʼoxla naq yibʼru naxkʼe injosqʼil.

•   Jarubʼ sut nakathobʼok?

  •  Maajoqʼe.

  •  Joqʼehaq.

  •  Junelik.

•   Ma maak roksinkil li yibʼru aj aatin?

  •  Inkʼaʼ.

  •  Heeheʼ.

 Ma nakaakʼoxla naq nimla chʼaʼajkilal roksinkil li yibʼru aj aatin? «Maare taaye naq inkʼaʼ, xbʼaan naq wank jalan chik yibʼru aj naʼlebʼ ut chixjunil ebʼ li kristiʼaan nekeʼoksink re». Abʼan, ma yaal aʼin?

 Wankebʼ li kristiʼaan nekeʼxyal xqʼe re naq inkʼaʼ teʼxye li yibʼ aj aatin. Ut wank xyaalal kʼaʼut naq inkʼaʼ nekeʼroksi. Jun eetalil:

•  Li hobʼok moko kaʼaj tawiʼ aatin chi joʼkan. Laawaatin naxkʼutbʼesi kʼaru wank saʼ laachʼool. Wi nakaawoksi li yibʼ aj aatin naxkʼut naq maakʼaʼ nakaawaj re kʼaru nekeʼrekʼa ebʼ li junchʼol. Kʼoxla aʼin: ma joʼkan ninnaʼlebʼak?

   Li Santil Hu naxye: «Li kʼaru naʼelk chaq saʼ ehej, nachalk chaq saʼ li chʼoolej»​ (Mateo 15:18, Li Santil Hu, Sociedad Bíblica de Guatemala, SBG).

•  Xyeebʼal li yibʼ aj aatin naxkʼut anihat. Jun li hu li naʼaatinak chirix chanru xkanabʼankil xyeebʼal li yibʼ aj aatin naxye: «Chanru nakat-aatinak naxkʼut anihaqebʼ laawamiiw, ma tateʼroxloqʼi laajunkabʼal ut laawech aj kʼanjel, ma wanq aakʼanjel malaj teʼxkʼe chik junaq aakʼanjel li nim bʼayaq xwankil ut kʼaru teʼxye li junchʼol chaawix li inkʼaʼ nekeʼxnaw aawu. Kʼoxla, ma tchaabʼiloʼq laaʼamiiwil wi inkʼaʼ chik tathobʼoq?».

   Li Santil Hu naxye: «Chixjunil li […] majewank isinbʼilaq taxaq eerikʼin»​ (Efesios 4:⁠31, SBG).

•  Roksinkil li yibʼ aj aatin moko naraj ta xyeebʼal naq nawbʼilaq aawu ut naq kʼebʼilaq aawankil. Jun li hu li naʼaatinak chirix chanru nekeʼnaʼlebʼak ebʼ li saaj naxye: «Tatitzʼq rabʼinkilebʼ li kristiʼaan li junelik nekeʼhobʼok ut roksinkil li yibʼ aj aatin naxbʼaanu naq moko us ta chik nekeʼnaʼlebʼak. Naxye ajwiʼ naq moko seebʼaq ta chik aachʼool wi junelik nakaawoksi ebʼ li yibʼ aj aatin».

   Li Santil Hu naxye: «Miʼelk chi xtzʼuumal eere yibʼ aj aatin»​ (Efesios 4:​29, SBG).

•  Bʼaanu aʼin. Chiru jun po maaye li yibʼ aj aatin, tzʼiibʼa chiru jun li calendario malaj chiru jun li hu ma xatruuk xbʼaanunkil li xaaye. Re naq inkʼaʼ chik taawoksi li yibʼ aj aatin tento naq taabʼaanu wiibʼ oxibʼ chik li naʼlebʼ. Jun eetalil:

•  Maawil li ajsibʼaal u bʼarwiʼ nekeʼroksi li yibʼ aj aatin. Li Santil Hu naxye: «Li inkʼaʼ usebʼ xnaʼlebʼ nekeʼxpoʼ xchʼoolebʼ li chaabʼilebʼ xnaʼlebʼ» (1 Corintios 15:33, Li Santil Hu, Wycliffe Bible Translators. Akʼ tzʼiibʼ). Joʼ naxye li raqal aʼin li aatin li inkʼaʼ usebʼ xnaʼlebʼ moko kaʼaj tawiʼ naʼaatinak chirixebʼ li kristiʼaan naʼaatinak aj bʼan wi chirixebʼ li videojuegos ut ebʼ li bʼich li naqabʼi. Laj Kenneth, li wank 17 chihabʼ re naxye: «Wank sut tat-oq xbʼichankil junaq li bʼich li nawulak chaawu abʼan inkʼaʼ nakaakʼe reetal naq yibʼru li naxye, kaʼajwiʼ nakaawabʼi li xsonil».

•  Kʼutbʼesi naq wank aanaʼlebʼ. Wankebʼ nekeʼxye li yibʼ aj aatin re xkʼutbʼesinkil naq ak ninqebʼ chik. Li ak ninqebʼ chik ak «keʼxkʼaytesi li xkʼaʼuxl chi xtawbʼal ru bʼar wank li us ut bʼar wank li inkʼaʼ us» (Hebreos 5:​14, SBG). Moko nekeʼroksi ta li yibʼ aj aatin usta nekeʼxkʼoxla naq teʼwulaq chiru ebʼ li junchʼol.

 Xtzʼajninkil li Ruuchichʼochʼ naxbʼaanu ajwiʼ naq ttzʼajnoʼq li iqʼ joʼ aʼan roksinkil li tzʼaj aj aatin naxbʼaanu ajwiʼ naq ttzʼajnoʼq li qakʼaʼuxl. Wankebʼ li kristiʼaan ak nekeʼxkʼoxla li yibʼ aj naʼlebʼ li hu xooʼaatinak wi chaq saʼ xtiklajik naxye: «Maakʼe xtzʼaqobʼ. Bʼaanu chixjunil li tatruuq. Naq chaabʼil tat-aatinaq rikʼinebʼ li junchʼol aʼin tixbʼaanu naq sa taawekʼa aawibʼ ut naq ebʼ li junchʼol teʼraj wank aawikʼin».