LI NEKEʼXPATZʼ EBʼ LI SAAJ
Kʼaʼut jwal wank xwankil li tijok?
Naq kibʼaanumank li patzʼom aʼin rehebʼ li saaj re Estados Unidos jayeʼq ma chixjunilebʼ xeʼxye naq nekeʼtijok chiru li Yos, abʼanan kaʼajwiʼ yiijach rehebʼ li saaj aʼin nekeʼtijok rajlal kutan. Maare wiibʼ oxibʼ rehebʼ nekeʼxye aʼin: «Ma nakʼanjelak li tij kaʼajwiʼ re naq sa twekʼa wibʼ?».
Kʼaru tzʼaqal li tij?
Li tijok aʼan aatinak rikʼin li Jehobʼa, laj Yobʼtesinel re chixjunil li kʼaʼaq re ru. Kʼoxla li naraj xyeebʼal aʼin! Usta numtajenaq xwankil li Jehobʼa chiru chixjunil ebʼ li kristiʼaan «moko najt ta wank qikʼin chiqajunjunqal» (Hechos 17:27, Li Santil Hu, Sociedad Bíblica de Guatemala, SBG). Li Santil Hu nokooxbʼoq chi xbʼaanunkil aʼin: «Jilonqex chi xkʼatq li Yos, ut aʼan taajiloq chekʼatq» (Santiago 4:8, SBG).
Kʼaru tatruuq xbʼaanunkil re naq tatjiloq chixkʼatq li Yos?
Tijok. Kaʼajwiʼ chi joʼkan tatruuq aatinak rikʼin.
Xtzolbʼal li Santil Hu. Chi joʼkan li Yos «naʼaatinak» aawikʼin.
Li wiibʼ chi naʼlebʼ aʼin: Li tijok ut xtzolbʼal li Santil Hu tatxtenqʼa chi wank choʼq ramiiw li Yos.
«Aatinak rikʼin li Jehobʼa li Nimajwal Yos, aʼan jun li chaqʼal ru maatan li kʼebʼil rehebʼ li kristiʼaan» (Jeremy).
«Xyeebʼal re li Jehobʼa li nawekʼa naxbʼaanu naq tinjiloq chixkʼatq» (Miranda).
Ma narabʼi tawiʼ lintij li Yos?
Usta nakaapaabʼ li Yos ut nakattijok maare tchʼaʼajkoʼq chaawu xkʼoxlankil naq li Yos nakatrabʼi. Abʼanan, li Santil Hu naxye naq li Jehobʼa «na[r]abʼi li qatij» (Salmo 65:3, SBG). Li Yos naraj naq taaye re «chixjunil li kʼaʼuxl wiʼ [aa]chʼool». Kʼaʼut? Xbʼaan naq Aʼan naxkʼe xchʼool chaawix (1 Pedro 5:7, SBG).
Kʼoxla rix aʼin: Ma rajlal nakat-aatinak rikʼinebʼ laawamiiw? Joʼkan ajwiʼ naru taabʼaanu rikʼin li Yos. Aatinan rajlal rikʼin ut oksi li xkʼabʼaʼ: Jehobʼa (Salmo 86:5-7; 88:10). Li Santil Hu naxye: «Junelik chextijoq» (1 Tesalonicenses 5:17, SBG).
«Li tijok aʼan aatinak rikʼin linchoxahil Yuwaʼ ut ninye re chixjunil li wank saʼ xchamal inchʼool» (Moises).
«Ninye re li Jehobʼa li kʼaru wank xwankil choʼq we joʼ ninbʼaanu rikʼin linnaʼ ut ebʼ li wamiiw» (Karen).
Chirix kʼaru naru tintijoq?
Li Santil Hu naxye: «Junelik bʼan cheqʼaxtesi saʼ roq ruqʼ li Yos leepatzʼom rikʼin tijok ut tzʼaamank, joʼwiʼ rikʼin yoxink» (Filipenses 4:6, SBG).
Ma naraj xyeebʼal aʼin naq naru tqaye re ebʼ li qachʼaʼajkilal? Heeheʼ, naru tqaye re. Li Santil Hu naxye: «Chaqʼaxtesi saʼ ruqʼ li Qaawaʼ li kʼaʼux wiʼ laachʼool, ut aʼan taakuutunq aawe» (Salmo 55:23, SBG).
Abʼan moko kaʼaj tawiʼ laachʼaʼajkilal taaye re. Li xChantelle jun li saaj ixqaʼal naxye: «Wi laaʼin ramiiw li Jehobʼa moko us ta naq junes intenqʼ ninpatzʼ re naq nintijok chiru». Ut naxye ajwiʼ:«Li xbʼeen xbʼeen li tento raj tqabʼaanu aʼan bʼanyoxink chiru li Jehobʼa ut relik chi yaal naq wank naabʼal xyaalal kʼaʼut naq laaʼo toobʼanyoxinq chiru».
Kʼoxla rix aʼin: Chirix kʼaru raj us tatbʼanyoxinq? Saʼ li kutan aʼin kʼoxla oxibʼ li naʼlebʼ li tatruuq xbʼanyoxinkil re li Jehobʼa.
«Rilbʼal jun chʼinaʼusil uutzʼuʼuj naru nokoorekʼasi chi xbʼaanunkil jun li tij chiru li Jehobʼa re xbʼanyoxinkil li naxkʼe qe» (Anita).
«Kʼoxla rix junaq li xraqal li Santil Hu li jwal nawulak chaawu malaj junaq li xyobʼtesihom li Jehobʼa ut moqon bʼanyoxi re» (Brian).
Maare twulaq ajwiʼ chaawu
LI NEKEʼXYE WIIBʼ OXIBʼ LI SAAJ
Li xyaalal re naq wanq qapaab’al: Li xchaq’rab’ li Yos jwal us chiru li nink’oxla
Wiib’ li saaj neke’xseeraq’i k’aru xe’xb’aanu re xkolb’al rib’eb’ chiru eb’ li ch’a’ajkilal li xe’xk’ul eb’ li rechtzolom.
QʼAXAL LOQʼ LI NAXKʼUT LI SANTIL HU
Ma narabʼi li Yos chixjunilebʼ li tij?
Kʼaru tkʼulmanq wi jun li qas qiitzʼin kaʼajwiʼ chirix ttijoq? Ut wi jun li bʼeelomej xikʼ tril li rixaqil ut chirix chik aʼan ttijoq re naq t-osobʼtesiiq?
LI SANTIL HU NAXSUME EBʼ LI PATZʼOM
Ma narabʼi li qatij li Yos?
Li tento tqabʼaanu re naq li Yos tixsume li qatij.
LAJ KʼAAKʼALEHOM
Ma narabʼi li qatij li Yos?
Li Santil Hu naxye naq li Yos nokoorabʼi naq nokootijok joʼ naraj aʼan.
LAJ KʼAAKʼALEHOM
Li tijok: Kʼaʼut us naq tootijoq?
Ebʼ li kristiʼaan nekeʼraj xnawbʼal kʼaru naxye li Santil Hu chirix li tijok. Ma aajel ru tijok?
