LI NEKEʼXPATZʼ EBʼ LI SAAJ
Wi yal kixchʼik li xtzʼejwal saʼ we, ma naraj xyeebʼal naq xoowank saʼ wiibʼal?
Jun li molam li wank Estados Unidos li naril ebʼ li yajel ut chanru xkolbʼal qibʼ chiru, kixye naq jayeʼq xyijachil ebʼ li saaj li wank 15 toj 19 chihabʼ re ak xeʼxchʼik xtzʼejwal a saʼ re jalan chik. Li xSharlene Azam li kitzʼiibʼank re li hu Oral Sex Is the New Goodnight Kiss (Sexo oral: el nuevo beso de buenas noches) naxye: «Wi tat-aatinaq rikʼin junaq li saaj chirix li wank saʼ wiibʼal teʼxye aawe naq aʼin nabʼaanumank saʼ chixjunil li ruuchichʼochʼ ut naxye ajwiʼ naq nekeʼxkʼoxla naq moko aʼin ta wank saʼ wiibʼal».
Kʼaru nakaakʼoxla laaʼat?
Naru taasume heeheʼ malaj inkʼaʼ.
Wi junaq li winq naxchʼik xtzʼejwal saʼ re junaq li ixqaʼal, ma naru nakanaak saʼ yuʼam?
Heeheʼ
Inkʼaʼ
Ma naru nayajerk junaq li kristiʼaan wi tixbʼaanu li naʼlebʼ aʼin?
Heeheʼ
Inkʼaʼ
Wi yal tixchʼik xtzʼejwal saʼ we, ma naraj xyeebʼal naq xoowank saʼ wiibʼal?
Heeheʼ
Inkʼaʼ
Chan raj ru taasume?
Il ma juntaqʼeet xsumenkil li xaakʼe rikʼin li naʼlebʼ aʼin.
Wi junaq li winq naxchʼik xtzʼejwal saʼ re junaq li ixqaʼal, ma naru nakanaak saʼ yuʼam?
Xsumenkil: Inkʼaʼ. Moko naru ta nakanaak saʼ yuʼam joʼkan naq naabʼalebʼ nekeʼxkʼoxla naq maakʼaʼ reekʼ wi junaq tixchʼik xtzʼejwal saʼ laawe abʼan aʼin moko yaal ta.
Ma naru nayajerk junaq li kristiʼaan wi tixbʼaanu li naʼlebʼ aʼin?
Xsumenkil: Heeheʼ. Li ani naxbʼaanu li naʼlebʼ aʼin naru naxchap li yajel hepatitis A malaj B, verrugas genitales, gonorrea, herpes, sida malaj sífilis.
Wi yal tixchʼik xtzʼejwal saʼ we, ma naraj xyeebʼal naq xoowank saʼ wiibʼal?
Xsumenkil: Heeheʼ. Wi junaq li kristiʼaan junelik naxchʼeʼ xtzʼejwal jalan chik rikʼin re malaj rikʼin rit naraj xyeebʼal naq xeʼwank saʼ wiibʼal.
Ma wank xwankil aʼin?
Qilaq kʼaru naxye li Santil Hu chirix li naʼlebʼ aʼin.
Li Santil Hu naxye: «Aʼan aʼin li rajom li Yos: naq […] inkʼaʼ texʼokenq chi koʼbʼeetak yumbʼeetak» (1 Tesalonicenses 4:3, Li Santil Hu, Sociedad Bíblica de Guatemala, SBG).
Naq li Santil Hu naʼaatinak chirix «koʼbʼeetak yumbʼeetak» naraj xyeebʼal naq aʼan chixjunil li naxbʼaanu junaq li kristiʼaan re xchʼeʼbʼal xtzʼejwal jalan chik li maawaʼ xsumʼaatin. Li naxmux ribʼ naxtzʼeq li ramiiwil rikʼin li Jehobʼa ut naxkʼul rahilal (1 Pedro 3:12).
Li Santil Hu naxye: «Laj koʼbʼeet ut laj yumbʼeet aʼ ajwiʼ li xtzʼejwal naxmux» (1 Corintios 6:18, SBG).
Wi junaq li kristiʼaan naxchʼik xtzʼejwal saʼ aawe taataw aayajel ut taatzʼeq laaʼamiiwil rikʼin li Jehobʼa ut moko sa ta ajwiʼ taawekʼa aawibʼ. Li tasal hu como hablar de sexo con los adolescentes para que te escuchen naxye: «Li nekeʼwank saʼ wiibʼal naq toj maajiʼ nekeʼsumlaak nekeʼchʼinaak xchʼool ut nekeʼrekʼa naq moko oxloqʼinbʼilebʼ ta chik xbʼaanebʼ li xsumal ut aʼin nakʼulmank ajwiʼ naq tatwanq saʼ wiibʼal maakʼaʼ naxye chanru xaabʼaanu taataw li rahilal».
Li Santil Hu naxye: «Laaʼin li Qaawaʼ, laaYos; laaʼin ninkʼut chawu li kʼaru us choʼq aawe» (Isaías 48:17, SBG).
Ma nakaakʼoxla naq li xchaqʼrabʼ li Yos chirix li wank saʼ wiibʼal nakatxtenqʼa malaj nakatxchʼaʼajki? Kʼoxla naq wankat saʼ jun li bʼe bʼarwiʼ nekeʼnumeʼk naabʼal li bʼelebʼaal chʼiichʼ ut wank reetalil ma kaw malaj timil tatxik ut bʼar tatxaqliiq. Ma taaye naq ebʼ li eetalil aʼin tatxchʼaʼajki malaj tixkol laayuʼam? Kʼaru naru nakʼulmank wi inkʼaʼ teepaabʼ li eetalil aʼin?
Li chaqʼrabʼ chirix chanru xbʼeresinkil li bʼelebʼaal chʼiichʼ wank sut tatxchʼaʼajki abʼan tixkol laayuʼam. Joʼkan ajwiʼ nakʼulmank rikʼin xchaqʼrabʼ li Yos moko naxkanabʼ ta naq taabʼaanu li nakaawaj abʼan tatxkol.
Joʼkan ajwiʼ nakʼulmank rikʼin li xchaqʼrabʼ li Jehobʼa wi taaqʼet taataw li rahilal (Gálatas 6:7). Li hu Sex Smart (Sexo inteligente) naxye: «Naq taatzʼeqtaana li nakaapaabʼ ut laachaabʼil naʼlebʼ ut nakaabʼaanu li nakaanaw naq moko us ta, moko nakaawoxloqʼi ta aawibʼ». Abʼan wi taayuʼami li xchaqʼrabʼ li Yos taakʼut naq chaabʼil aanaʼlebʼ ut li wank xwankil aʼan naq maakʼaʼ tchʼiʼchʼiʼinq re laakʼaʼuxl (1 Pedro 3:16, Li Santil Hu, Wycliffe Bible Translators).
a Xchʼikbʼal xtzʼejwal junaq li kristiʼaan saʼ aawe ut xbʼatzʼunenkil rikʼin ruʼuj aawaqʼ naraj xyeebʼal naq xatwank saʼ wiibʼal.