Naq yooq li nimla rahilal, aran teʼxkʼe reetal ebʼ li qas qiitzʼin naq maajunwa rilomebʼ li rahilal aʼin. Joʼ naxye li propesiiy li wank saʼ Santil Hu naq li nimla rahilal twanq saʼ «rosoʼjik [...] li kutan» malaj saʼ «xraqik ebʼ li kutan» (Daniel 12:4, Li Santil Hu, Sociedad Bíblica de Guatemala, SBG; 2 Timoteo 3:1). Saʼ Marcos 13:19 naxye: «Saʼebʼ li kutan aʼan aʼanaq xkutankil ebʼ li rahilal. Chalen chaq naq li Yos kixyobʼtesi chixjunil toj saʼebʼ li kutan aʼin, maajunwa kiwank chaq jun li rahilal joʼ aʼin chi moko twanq moqon» (Daniel 12:1; Mateo 24:21, 22).

Kʼaru tkʼulmanq naq yooq li nimla rahilal?

•   T-osoʼq rikʼin li bʼalaqʼil paabʼal. Saʼ junpaat tsacheʼq li bʼalaqʼil paabʼal (Apocalipsis 17:1, 5; 18:9, 10, 21). Naq ebʼ li awabʼej (li wankebʼ choʼq ruuchil li molam Naciones Unidas) yooqebʼ xbʼaanunkil aʼin, inkʼaʼ teʼxkʼe reetal naq yookebʼ xbʼaanunkil li rajom li Yos (Apocalipsis 17:3, 15-18). a

•   Trahobʼtesiiq li tzʼaqal paabʼal. Jun chʼuut li tenamit tixyal xsachbʼalebʼ li qas qiitzʼin li nekeʼloqʼonink saʼ li tzʼaqal paabʼal. Li chʼuut chi tenamit aʼin kikʼabʼaʼiik «Gog re Magog» saʼ jun li moy u li kiril laj Ezequiel. Abʼanan, li Yos inkʼaʼ tixkʼanabʼ naq tsacheʼq li xtenamit (Ezequiel 38:1, 2, 9-12, 18-23).

•   Traqmanq aatin saʼ xbʼeenebʼ li qas qiitzʼin li wanqebʼ saʼ ruuchichʼochʼ. Li Jesús traqoq aatin saʼ xbʼeenebʼ li qas qiitzʼin ut «tixkʼe ebʼ li qas qiitzʼin saʼ wiibʼ li chʼuut, joʼ naxbʼaanu laj ilol karneer naq narisihebʼ li karneer saʼ xyanqebʼ li chibʼaat» (Mateo 25:31-33). Ut re xnawbʼal chanru traqoq aatin saʼ xbʼeen li junjunq tento tril ma xeʼokenk malaj inkʼaʼ xeʼokenk chirixebʼ li riitzʼin malaj li teʼawabʼejinq rochbʼeen saʼ choxa (Mateo 25:34-46).

•   Teʼchʼutubʼaaq li teʼawabʼejinq rochbʼeen li Jesús saʼ li Xʼawaʼbʼejilal li Yos. Teʼchʼutubʼaaq chixjunilebʼ li qas qiitzʼin li tiikebʼ xchʼool chiru li Yos li xeʼsikʼeʼk ru re awabʼejink rochbʼeen li Kriist naq teʼraqeʼq li xyuʼam saʼ ruuchichʼochʼ ut teʼwaklesiiq chi yoʼyo saʼ choxa (Mateo 24:31; 1 Corintios 15:50-53; 1 Tesalonicenses 4:15-17).

•   Tchalq li Armagedón. Saʼ li Santil Hu, li Armagedón nayeemank ajwiʼ re «li yalok li twanq saʼ xnimal xkutankil li Nimajwal Yos» ut li «xkutankil li Qaawaʼ» (Apocalipsis 16:14, 16; Isaías 13:9, SBG; 2 Pedro 3:12). Ebʼ li qas qiitzʼin li teʼraqmanq aatin saʼ xbʼeenebʼ xbʼaan li Kriist, teʼsacheʼq saʼ li nimla pleet aʼin (Sofonías 1:18; 2 Tesalonicenses 1:6-10). Joʼkan ajwiʼ, teʼsacheʼq li awabʼejilal re chixjunil li ruuchichʼochʼ, li naxjuntaqʼeeta li Santil Hu rikʼin jun li nimla xul li kʼajoʼ xjosqʼil ut wuqubʼ xjolom (Apocalipsis 19:19-21).

Kʼaru tkʼulmanq naq ak xnumeʼk li nimla rahilal?

•   Ttzʼapmanq laj Tza ut ebʼ li maaʼus aj musiqʼej. Jun li ánjel li kʼebʼil xwankil tixtzʼap laj Tza ut ebʼ li maaʼus aj musiqʼej saʼ jun «li chamal jul» (Apocalipsis 20:1-3). Naq laj Tza ut ebʼ li maaʼus aj musiqʼej wanqebʼ saʼ li naʼaj aʼin, chanchan tawiʼ kamenaqebʼ xbʼaan naq maakʼaʼ chik teʼruuq xbʼaanunkil. Li chamal jul chanchan li tzʼalam. Joʼkan naq, laj Tza inkʼaʼ chik truuq chi elk saʼ li chamal jul re xraʼlenkilebʼ li qas qiitzʼin (Apocalipsis 20:7).

•   Ttiklaaq ebʼ li mil chihabʼ. Saʼ li hoonal aʼan ttiklaaq ebʼ li mil chihabʼ chirix li Xʼawabʼejilal li Yos, li tixkʼam chaq li xninqal ru osobʼtesihom choʼq rehebʼ li qas qiitzʼin (Apocalipsis 5:9, 10; 20:4, 6). Saʼ li Ruuchichʼochʼ, «li kʼiila tenamit» li maaʼani naru rajlankilebʼ teʼkoleʼq chiru li nimla rahilal ut teʼril naq ttiklaaq ebʼ li mil chihabʼ (Apocalipsis 7:9, 14; Salmo 37:9-11).