Anihebʼ teʼxik saʼ choxa?
Li naxsume li Santil Hu
Li Yos kixsikʼebʼ ru jun chʼina chʼuut aj kʼanjel chiru li tiikebʼ xchʼool ut naq teʼkamq teʼxik saʼ choxa (1 Pedro 1:3, 4). Naq ak sikʼbʼilebʼ chik ru tento naq kawaqebʼ saʼ xpaabʼal ut saqaqebʼ ru xchʼool ut xkʼaʼuxl xbʼaan naq wi inkʼaʼ teʼxbʼaanu aʼin, moko xkʼulubʼebʼ ta naq teʼxkʼul li rechanihomebʼ saʼ choxa (Efesios 5:5; Filipenses 3:12-14).
Kʼaru teʼxbʼaanu aran?
Ebʼ li sikʼbʼilebʼ ru aʼanaqebʼ awabʼej ut aj tij rochbʼen li Jesús chiru jun mil chihabʼ (Apocalipsis 5:9, 10; 20:6). Ebʼ aʼan teʼokenq saʼ li Xʼawabʼejilal li Yos (li Santil Hu naxkʼabʼaʼi li «akʼ choxa») ebʼ aʼan teʼxjolomi ebʼ li qas qiitzʼin (malaj «akʼ chʼochʼ»). Ebʼ li awabʼej aʼin teʼxbʼaanu naq wanq tuqtuukilal ut tiikilal saʼ ruuchichʼochʼ joʼ kiraj chaq li Yos saʼ xtiklajik (Isaías 65:17; 2 Pedro 3:13, Li Santil Hu, Sociedad Bíblica de Guatemala, SBG).
Jarubʼebʼ teʼxik saʼ choxa?
Li Santil Hu naxye naq 144,000 li poyanam teʼwakliiq wiʼ chik chi yoʼyo saʼ choxa (Apocalipsis 7:4). Saʼ jun li moy u, li apóstol Juan kiril «li Karneer [li Jesukriist ak xwakliik chik chi yoʼyo] xaqxo saʼ xbʼeen li tzuul Sión, rochbʼeenebʼ kaahibʼ xwaqxaqkʼaal mil» (Apocalipsis 14:1-3, SBG; Juan 1:29; 1 Pedro 1:19). Li tzuul Sión naxkʼutbʼesi li wankilal li kixkʼe li Yos choʼq re li Jesús joʼ ajwiʼ choʼq rehebʼ li 144,000 li teʼawabʼejinq rochbʼen saʼ choxa (Salmo 2:6; Hebreos 12:22).
«Ebʼ li bʼoqbʼilebʼ, li sikʼbʼilebʼ ru» teʼawabʼejinq rochbʼen li Jesús saʼ li Xʼawabʼejilal li Yos, li nawbʼilebʼ ajwiʼ ru joʼ jun chʼina chʼuut chi karneer (Apocalipsis 17:14, SBG; Lucas 12:32). Aʼin naxkʼut naq li sikʼbʼilebʼ ru moko kʼihebʼ ta chiru li xkʼihalil li kristiʼaan li nekeʼokenk saʼ xyanq li xkarneer li Kriist (Juan 10:16).
Li tikʼtiʼ li nayeemank chirixebʼ li teʼxik saʼ choxa
Li nayeemank: Chixjunilebʼ li chaabʼilebʼ xnaʼlebʼ teʼxik saʼ choxa.
Li yaal: Li Yos naxyeechiʼi naq chixjunilebʼ li poyanam li chaabʼilebʼ xnaʼlebʼ teʼwanq saʼ Ruuchichʼochʼ (Salmo 37:11, 29, 34).
Li Jesús kixye naq: «Maaʼani taqenaq saʼ choxa» (Juan 3:13, SBG). Rikʼin li aatin aʼin naxkʼut naq ebʼ li poyanam li chaabʼilebʼ xnaʼlebʼ li xeʼkamk xbʼeenwa chiru aʼan joʼ: laj Abrahán, laj Moisés, laj Job ut laj David moko xkohebʼ ta saʼ choxa (Hechos 2:29, 34). Aʼanebʼ wankebʼ roybʼenihomebʼ re naq teʼwakliiq wiʼ chik chi yoʼyo arin saʼ Ruuchichʼochʼ (Job 14:13-15).
Li wakliik chi yoʼyo saʼ choxa aʼan «li xbʼeen waklijik chi yoʼyo» (Apocalipsis 20:6, SBG). Abʼan twanq jun chik li wakliik wiʼ chik chi yoʼyo ut aʼan twanq arin saʼ Ruuchichʼochʼ.
Li Santil Hu naxkʼut naq saʼ li Xʼawabʼejilal li Yos «inkʼaʼ chik taawanq kamk» (Apocalipsis 21:3, 4, SBG). Chʼolchʼo naq li raqal aʼin yook chi aatinak chirix li Ruuchichʼochʼ xbʼaan naq saʼ choxa maajunwa wanjenaq kamk.
Li nayeemank: Li junjunq chi kristiʼaan naru naxsikʼ xik saʼ choxa malaj wank saʼ Ruuchichʼochʼ.
Li yaal: Li Yos aʼan li nayehok re ani laj paabʼanel tixkʼul «li qʼajkam li wank toj taqeʼq» malaj li wank rikʼin saʼ choxa (Filipenses 3:14, SBG). Li bʼoqom aʼin moko nachalk ta saʼ xkʼabʼaʼ li naraj malaj li nawulak chiru junaq li kristiʼaan (Mateo 20:20-23).
Li nayeemank: Li junelik yuʼam arin saʼ Ruuchichʼochʼ kaʼajwiʼ tkʼemanq rehebʼ li qas qiitzʼin li moko xkʼulubʼebʼ ta xik saʼ choxa.
Li yaal: Li teʼwanq chi junelik saʼ Ruuchichʼochʼ, li Yos naxye rehebʼ «lintenamit», «ebʼ li sikʼbʼilebʼ ru inbʼaan» ut li «tenamit osobʼtesinbʼil xbʼaan li Qaawaʼ» (Isaías 65:21-23, SBG). Ebʼ aʼan teʼxmaatani xkʼebʼal chi tzʼaqlok ru li kiraj li Yos chalen chaq saʼ xtiklajik: naq ebʼ li qas qiitzʼin li tzʼaqal re ru xyuʼam teʼwanq chi junelik saʼ Ruuchichʼochʼ saʼ jun chʼinaʼusil naʼajej (Génesis 1:28; Salmo 115:16; Isaías 45:18).
Li nayeemank: Li ajl 144,000 li natawmank saʼ li hu Apocalipsis yal jun eetalil.
Li yaal: Usta yaal naq wank li ajl li yal eetalil saʼ li hu aʼin, wankebʼ ajwiʼ li moko eetalil ta. Joʼ xyeebʼal li «xkʼabʼaʼ ebʼ li kabʼlaju chi xʼapóstol li Karneer» (Apocalipsis 21:14, SBG). Qilaq kʼaʼut naq naqaye naq li ajl 144,000 moko naʼoksimank ta joʼ eetalil.
Saʼ Apocalipsis 7:4, SBG, naʼaatinak chirix «li xkʼihalebʼ li kʼeebʼilebʼ reetalil: [li naraj xyeebʼal li xeʼxkʼul li maatan re xik saʼ choxa], kaahibʼ xwaqxaqkʼaal mil» ut naʼaatinak ajwiʼ naq «kʼajoʼ xkʼihalebʼ li tenamit! Maaʼani naruhank chi rajlankilebʼ». Li «xkʼihalebʼ li tenamit» aʼin nekeʼxkʼul ajwiʼ li xkolbʼal (Apocalipsis 7:9, SBG, 10). Wi li ajl 144,000 yal jun eetalil, maakʼaʼ xyaalal naq t-uxmanq aatinak chirix li kʼiila li tenamit li maaʼani naruhank chi rajlankilebʼ. a
Joʼkan ajwiʼ nayeemank naq ebʼ 144,000 li loqʼbʼilebʼ malaj «kolbʼilebʼ saʼ xyanqebʼ li winq joʼkebʼ xbʼeen u» (Apocalipsis 14:4, SBG) Li aatin «xbʼeen u» naʼaatinak chirix jun chʼuutal li sikʼbʼil ru saʼ xyanq li xkʼihalil. Joʼkan naq, chi tzʼaqal naʼaatinak chirix li teʼawabʼejinq rochbʼen li Jesús saʼ choxa saʼ xbʼeenebʼ li teʼkanaaq arin saʼ Ruuchichʼochʼ (Apocalipsis 5:10).
a Laj kʼutunel Robert Thomas kixtzʼiibʼa chirix li ajl 144,000 li natawmank saʼ Apocalipsis 7:4, SBG: «Aʼin jun li ajl chʼolchʼo ru, jalan wiʼ rikʼin li ajl li moko chʼolchʼo ta ru li natawmank saʼ li 7:9. Wi naqataw ru joʼ eetalil, inkʼaʼ raj tqataw xyaalal ebʼ li ajl li natawmank saʼ li hu aʼin» (Apocalipsis 1-7: An Exegetical Commentary [Comentario exegético de Apocalipsis 1-7], perel 474).
Maare twulaq ajwiʼ chaawu
QʼAXAL LOQʼ LI NAXKʼUT LI SANTIL HU
Kʼaru tzʼaqal Xnimajwal Awabʼejilal li Yos?
Li Jesus kixkʼe xchʼool chi aatinak chirix li Xʼawabʼejilal li Yos chiru jalan chik li naʼlebʼ. Ebʼ li xtzolom nekeʼxtzʼaama naq tchalq li Xʼawabʼejilal li Yos.
LI NAXKʼUT LI SANTIL HU
Kʼe reetal chanru naqatzolebʼ
Kʼulubʼa naq tateʼxtzol chirix li Santil Hu. Li tzolok aʼin sibʼil ut nabʼaanumank chi seeraqʼinbʼil.