Li Diʼaabʼl nawbʼil ajwiʼ ru joʼ aj Tza, inkʼaʼ naʼilmank ru xbʼaan naq musiqʼej ut wank yalaq bʼar. Laj Tza moko wank ta saʼ xbʼalbʼa re xrahobʼtesinkilebʼ li maaʼusebʼ xnaʼlebʼ, joʼ nakʼutunk saʼ li eetalil li wank saʼ li tzolom aʼin.

«Li nimla yalok u saʼ choxa»

 Chiru jun kʼamok, laj Tza toj kiruuk chi ok ut chi elk saʼ choxa. Ut kikanabʼaak ajwiʼ chi wank saʼ xyanqebʼ li ánjel naq nekeʼxkʼut chaq ru rikʼin li Yos (Job 1:6). Li Santil Hu ak kixye chaq naq twanq «li nimla yalok u saʼ choxa» ut laj Tza t-isiiq saʼ choxa ut tkuteʼq saʼ Ruuchichʼochʼ (Apocalipsis 12:7, Li Santil Hu, Sociedad Bíblica de Guatemala, SBG, 8, 9). Rikʼin li naxye li Santil Hu ut li xninqal ru eetalil li yook chi kʼulmank saʼ chixjunil li Ruuchichʼochʼ, naxkʼut naq li nimla yalok u ak xkʼulmank chik saʼ choxa. Ut kaʼajwiʼ saʼ Ruuchichʼochʼ, laj Tza naru naxbʼaanu li naraj.

 Ma naraj xyeebʼal aʼin naq laj Tza wank saʼ junaq li naʼaj re li Ruuchichʼochʼ? Jun eetalil, re xchʼolobʼankil chanru li tenamit Pérgamo, li Santil Hu naroksi li aatin «bʼarwiʼ wank li xkʼojaribʼaal laj tza» ut «bʼar wank wiʼ laj tza» (Apocalipsis 2:13, SBG). Ebʼ li aatin aʼin yook tana xyeebʼal naq xnaʼlebʼ laj Tza yookebʼ xyuʼaminkil ebʼ li paabʼal li wankebʼ saʼ li tenamit aʼan ut inkʼaʼ naq laj Tza wank chaq aran. Xbʼaan naq laj Tza moko wank ta saʼ junaq li naʼaj re li Ruuchichʼochʼ. Li Santil Hu naxye naq laj Tza naxjolomi «chixjunilebʼ li xninqal ru tenamit» ut kaʼajwiʼ saʼ Ruuchichʼochʼ naru naxbʼaanu li naraj (Lucas 4:5, 6, SBG).