Li Jesús kixkʼe li xyuʼam re xkolbʼal rix ebʼ laj paabʼanel li tiikebʼ xchʼool (Mateo 20:28). Joʼkan naq, li Santil Hu naxye naq li Jesús aʼan laj «Kolol re li ruuchichʼochʼ» (1 Juan 4:14, Li Santil Hu, Sociedad Bíblica de Guatemala, SBG). Naxye ajwiʼ: «Naq maaʼani chik aj ikʼin wank li kolbʼa ibʼ; maakʼaʼ chik junaq kʼabʼaʼej rubʼel choxa kʼeebʼil qe choʼq aj Kolonel» (Hechos 4:12, SBG).

 Li Jesús kikamk saʼ xkʼabʼaʼebʼ li nekeʼpaabʼank re (Hebreos 2:9; Juan 3:16). Moqon «li Yos xwaklesi chi yoʼyo saʼ xyanqebʼ li kamenaq» ut li Jesús kisutqʼiik saʼ choxa joʼ musiqʼej (Hechos 3:15, SBG). Toj saʼ choxa li Jesús «tixkolebʼ chi tzʼaqal re ru ebʼ li nekeʼjilok chi xkʼatq li Yos saʼ li xkʼabʼaʼ, xbʼaan naq yoʼyo chi junelik re aatinak chirixebʼ» (Hebreos 7:25, SBG).

Kʼaʼut naʼajmank naq li Jesús t-aatinaq chiqix?

 Chiqajunilo aj maak (Romanos 3:23). Li maak naxbʼaanu naq tookamq ut naxram chiqu jilok chixkʼatq li Yos (Romanos 6:23). Abʼan li Jesús chanchan jun laj tenqʼanel malaj «jun aj aatinanel chiqix» wi naqapaabʼ li xkamik (1 Juan 2:1, SBG). Xbʼaan naq li Jesús kixqʼaxtesi li xyuʼam re qakolbʼal naru naʼaatinak chiqix re naq li Yos trabʼi li qatij ut tixkuy tixsach li qamaak (Mateo 1:21; Romanos 8:34). Li Yos naxsume li naxpatzʼ li Jesús xbʼaan naq naxchap ribʼ rikʼin li rajom. Li Yos kixtaqla chaq li Jesús re naq tkoleʼq «li ruuchichʼochʼ saʼ xkʼabʼaʼ aʼan» (Juan 3:17, SBG).

Ma tzʼaqal rikʼin xpaabʼankil li Jesús re naq tookoleʼq?

 Inkʼaʼ. Usta naʼajmank xpaabʼankil li xkamik li Jesús re naq tookoleʼq, toj wank xkomon li naʼajmank (Hechos 16:30, 31). Li Santil Hu naxye: «Joʼ naq li tzʼejwalej chi maakʼaʼ xmusiqʼ, aʼan kamenaq, joʼkan ajwiʼ li paabʼaal chi maakʼaʼ xbʼaanuhom kamenaq» (Santiago 2:26, SBG). Re naq tookoleʼq tento tqabʼaanu aʼin:

•   Xnawbʼal ru li Jesús ut li Jehobʼa, li Xyuwaʼ (Juan 17:3).

•   Wank qapaabʼal chirixebʼ (Juan 12:44; 14:1).

•   Abʼink chiru li xchaqʼrabʼ naxkʼutbʼesi naq wank qapaabʼal (Lucas 6:46; 1 Juan 2:17). Li Jesús kixye naq moko chixjunilebʼ ta li nekeʼyehok re «Qaawaʼ» teʼkoleʼq, teʼkoleʼq bʼan li nekeʼbʼaanunk re li rajom li xchoxahil Yuwaʼ (Mateo 7:21).

•   Xkʼutbʼesinkil naq wank qapaabʼal usta yooko xnumsinkil li rahilal. Li Jesús kixye: «Abʼanan ani tixkʼe xchʼool toj saʼ rosoʼjik, aʼan taakoleʼq» (Mateo 24:13, SBG).