Saʼ li kutan chaalel twanq li tuqtuukilal saʼ Ruuchichʼochʼ, abʼan maawaʼ saʼ xkʼabʼaʼ junaq li winq li kixkʼe xqʼe chirix li tuqtuukilal, saʼ xkʼabʼaʼ bʼan li Xʼawabʼejilal li Yos, li wank saʼ choxa ut li Awabʼej aʼan li Jesukriist. Il li naxye li Santil Hu chirix li nimla oybʼenihom aʼin.

1.   Li Yos tixbʼaanu naq tchʼanaaq «li yalok toj saʼ xmaril li ruuchichʼochʼ», ut chi joʼkan ttzʼaqloq ru li rajom li Yos chirix li «tuqtuukil usilal saʼ ruuchichʼochʼ rikʼinebʼ li raarookebʼ xbʼaan» (Salmo 46:10, Li Santil Hu, Sociedad Bíblica de Guatemala, SBG; Lucas 2:14, SBG).

2.   Li Xʼawabʼejilal li Yos tixjolomi chixjunil li Ruuchichʼochʼ ut aran naq tixsach ebʼ li chaqʼrabʼ li naxram xnubʼaal ebʼ li tenamit joʼ ajwiʼ li nimobʼresink tenamit, aʼin xxeʼil ebʼ li pleet ut ebʼ li yalok u (Daniel 7:14).

3.   Li Jesús, li Awabʼej re li Xʼawabʼejilal li Yos, nawbʼil ru joʼ li «Xnimal ru aj kʼehol naʼlebʼ». Li Jesús tixbʼaanu naq li tuqtuukilal maakʼaʼaq rosoʼjik (Isaías 9:6, 7, SBG).

4.   Chixjunilebʼ li qas qiitzʼin li nekeʼwulak chiru wank saʼ chʼaʼajkilal inkʼaʼ teʼruuq chi wank rubʼel li Xʼawabʼejilal li Yos xbʼaan naq li Yos «xikʼ naril li narahink re li raaxiikʼ» (Salmo 11:5, SBG; Proverbios 2:22).

5.   Li Yos naxkʼut chiruhebʼ li xmoos wank saʼ tuqtuukilal. Joʼkan naq, li Santil Hu naxye: «Teʼxsutqʼisi ebʼ li qʼesnal chʼiichʼ choʼq piklebʼ chʼochʼ, ut li xjutzʼ chʼiichʼebʼ teʼkanaaq choʼq setlebʼ kʼim. Ebʼ li tenamit inkʼaʼ chik teʼyaloq chiribʼilebʼ ribʼ chi moko teʼxkawresi ribʼ re yalok» (Isaías 2:3, 4, SBG).

 Chi miyon ebʼ laj testiiw re li Jehobʼa re chixjunil li Ruuchichʼochʼ yookebʼ xtzolbʼal wank saʼ tuqtuukilal (Mateo 5:9). Usta nokoochalk saʼ jalan jalanq li tenamit ut naxqʼax 230 li tenamit ut naʼaj bʼarwiʼ wanko wiʼ, maaʼani qe tixchap xchʼiichʼ, xpuubʼ malaj junaq chik li kʼanjelobʼaal re xrahobʼtesinkil li ras riitzʼin.