Li Armagedón aʼan li xpleet li Yos rikʼinebʼ li xʼawabʼejilal li ruuchichʼochʼ. Ebʼ li awabʼejilal aʼin ut ebʼ li nekeʼtaqenk re xikʼ nekeʼril li Yos xbʼaan naq inkʼaʼ nekeʼraj okenk chirix (Salmo 2:2). Li Yos tixsach li xʼawabʼejilal li winq saʼ li Armagedón (Daniel 2:44).

 Li aatin Armagedón li natzʼiibʼamank ajwiʼ Har-Magedón natawmank jun sut ajwiʼ saʼ li Santil Hu saʼ li hu Apocalipsis. Saʼ jun li propesiiy naxye naq «li awabʼej re chixjunil li ruuchichʼochʼ» teʼchʼutubʼaaq «chi yalok saʼ li xnimal xkutankil li Nimajwal Yos». Li yalok u aʼin tbʼaanumanq «saʼ jun li naʼajej, Armakedón xkʼabʼaʼ, saʼ aatinobʼaal hebreo» (Apocalipsis 16:14, 16, Li Santil Hu, Sociedad Bíblica de Guatemala, SBG).

 Anihebʼ teʼyaloq saʼ li Armagedón? Aʼanebʼ li ánjel li naxjolomihebʼ li Jesukriist ut ebʼ aʼan teʼxsach ruhebʼ li xikʼ nekeʼilok re li Yos (Apocalipsis 19:11-16, 19-21). Saʼ xyanq li teʼqʼaxeʼq ru wankebʼ chixjunilebʼ li nekeʼxqʼet ribʼ chiru li Yos ut li nekeʼtzʼeqtaanank re (Ezequiel 39:7).

 Ma saʼ jun ajwiʼ li naʼajej twanq li yalok saʼ li Armagedón? Inkʼaʼ. Li pleet aʼin twanq saʼ chixjunil li ruuchichʼochʼ moko saʼ jun ta ajwiʼ li naʼajej (Jeremías 25:32-34; Ezequiel 39:17-20).

 Li aatin Armagedón (saʼ li aatinobʼaal hebreo Har Meghiddóhn) naraj xyeebʼal «li tzuul re Meguidó». Meguidó aʼan jun li naʼaj li kiwank Israel bʼarwiʼ keʼwank naabʼal li yalok. Li Santil Hu naʼaatinak chirix wiibʼ oxibʼ rehebʼ aʼin (Jueces 5:19, 20; 2 Reyes 9:27; 23:29). Abʼanan, li yalok aʼin moko naru ta nawank saʼ jun li naʼajej joʼ li najter naʼajej Meguidó xbʼaan naq maakʼaʼ junaq li tzuul joʼ aʼan. Joʼkan ajwiʼ, saʼ li naʼajej Jezreel bʼarwiʼ natawmank Meguidó moko teʼoq ta chixjunilebʼ li teʼyaloq rikʼin li Yos. Li xyaalalil aʼan naq saʼ li Armagedón ebʼ li awabʼej re li ruuchichʼochʼ teʼxchʼutubʼ ribʼ chixjunilebʼ chi yalok rikʼin li Yos.

 Kʼaru tkʼulmanq saʼ li Armagedón? Inkʼaʼ naqanaw chanru li Jehobʼa troksi li xwankilal, abʼan li chʼolchʼo aʼan naq troksi li kiroksi chaq junxil joʼ: li saqbʼach, li hiik, li bʼutʼihaʼ, li xaml, li kaaq ut li ebʼ li xninqal ru yajel (Job 38:22, 23; Ezequiel 38:19, 22; Habacuc 3:10, 11; Zacarías 14:12). Saʼ xkʼabʼaʼ naq inkʼaʼ teʼxtaw ru li yook chi kʼulmank, li xkʼihalil li xikʼ teʼril li Yos teʼxkamsi ribʼ chiribʼilebʼ ribʼ ut toj aran teʼxkʼe reetal naq li Yos yook chi yalok rikʼinebʼ (Ezequiel 38:21, 23; Zacarías 14:13).

 Ma tixkʼam chaq li rosoʼjik li ruuchichʼochʼ li Armagedón? Li Ruuchichʼochʼ moko tsachmanq ta saʼ li Armagedón. Li Ruuchichʼochʼ kiyiibʼamank re naq ebʼ li poyanam teʼwanq chi junelik chisaʼ (Salmo 37:29; 96:10; Eclesiastés 1:4). Joʼkan naq li Armagedón moko tixsach ta li Ruuchichʼochʼ. Li Armagedón tixbʼaanu naq li «xkʼihalebʼ li tenamit» malaj ebʼ laj kʼanjel chiru li Yos teʼkoleʼq (Apocalipsis 7:​9, SBG, 14; Salmo 37:34).

 Ma inkʼaʼ naxye li Santil Hu naq «li rosoʼjik li ruuchichʼochʼ» tchalq saʼ xkʼabʼaʼ li Armagedón? Yaal naq li Santil Hu saʼ wiibʼ oxibʼ li raqal naroksi li aatin ruuchichʼochʼ re aatinak chirix li qanaʼaj, abʼanan li Santil Hu naroksi ajwiʼ li aatin aʼin naq naʼaatinak chirixebʼ li poyanam li nekeʼxqʼet ribʼ chiru li Yos (1 Juan 2:15-17). Naq nokooʼaatinak chirix «li rosoʼjik li ruuchichʼochʼ» yooko chi aatinak chirixebʼ li poyanam (Mateo 24:3, SBG).

 Joqʼe ttiklaaq li yalok saʼ li Armagedón? Naq nokooʼaatinak chirix li «xnimal li rahilal» li tixkʼam chaq li yalok saʼ li Armagedón, li Jesús kixye: «Aʼut chirix li kutan aʼan malaj li xhonalil, maaʼani nanawok joʼqʼe, chi moko ebʼ li ánjel saʼ choxa chi moko li Kʼajolbʼej, kaʼajwiʼ li Yuwaʼbʼej» (Mateo 24:21, 36, SBG). Li Santil Hu naxye naq li Armagedón tkʼulmanq saʼ li xkʼulunik li Jesús li kitiklaak saʼ li chihabʼ 1914 (Mateo 24:37-39).