Li maak aʼan chixjunil li bʼaanuhom, ekʼahom malaj kʼaʼuxl li inkʼaʼ naxkʼulubʼa li Yos (1 Juan 3:4; 5:17). Li Santil Hu naxchʼolobʼ naq li maak aʼan xbʼaanunkil li inkʼaʼ us chiru li Yos malaj inkʼaʼ xbʼaanunkil li kʼaru us (Santiago 4:17).

 Naq keʼxtzʼiibʼa chaq li Santil Hu, li aatin li kʼebʼil joʼ «maak» naraj xyeebʼal kutuk ut inkʼaʼ xtochʼbʼal li xjayalimank. Jun eetalil, li Santil Hu naʼaatinak chirixebʼ jun chʼuut aj puubʼ saʼ li najter Israel li jwal seebʼebʼ chaq chi roksinkil li rantʼin xbʼaan naq tikto nekeʼxtaw li nekeʼxjayali naq nekeʼxkut li pek «chi inkʼaʼ nekeʼxkol». Wi tjalmanq raj li aatin aʼin joʼ natawmank ru tyeemanq raj: «inkʼaʼ nekeʼmaakobʼk» (Jueces 20:16, Li Santil Hu, Sociedad Bíblica de Guatemala, SBG). Joʼkan naq, li maakobʼk aʼan naq inkʼaʼ nokooruuk xyuʼaminkil li xchaqʼrabʼ li Yos.

 Xbʼaan naq li Yos aʼan laj Yobʼtesinel, wank xkʼulubʼ re xkʼebʼal li naʼlebʼ choʼq rehebʼ li poyanam (Apocalipsis 4:11). Ut laaʼo tento tqachʼolobʼ qayehom qabʼaanuhom chiru li Yos (Romanos 14:12).

Ma naru naq maajunwa toomaakobʼq?

 Inkʼaʼ, xbʼaan naq li Santil Hu naxye naq «chixjunilebʼ xeʼmaakobʼk ut maakʼaʼ xloqʼal li Yos rikʼinebʼ» (Romanos 3:23, SBG; 1 Reyes 8:46; Eclesiastés 7:20; 1 Juan 1:8). Kʼaʼut?

 Saʼ xtiklajik laj Adán ut li xʼEva inkʼaʼ nekeʼmaakobʼk chaq xbʼaan naq keʼyobʼtesiik joʼ xjalam u li Yos (Génesis 1:27). Abʼanan, keʼxsach aʼin naq keʼxqʼet ribʼ chiru laj Yobʼtesinel (Génesis 3:5, 6, 17-19). Ut naq keʼyoʼlaak ebʼ li ralal xkʼajol, keʼxbʼon rikʼin li maak (Romanos 5:12). Joʼ kixkanabʼ chi tzʼiibʼanbʼil li awabʼej David: «Saʼ maak xinyoʼlaak» (Salmo 51:7, SBG).

Ma wank jalan jalanq xnimal ru li maak?

 Joʼkan. Jun eetalil, li Santil Hu naxye naq saʼ li najter tenamit Sodoom «jwal inkʼaʼ usebʼ xchʼool ut aj maakebʼ» «ut qʼaxal nim li xmaakebʼ» (Génesis 13:13; 18:20, SBG). Qilaq oxibʼ li naʼlebʼ li naxkʼutbʼesi li xnimal ru junaq li maak.

1.   Li xnimal ru. Li Santil Hu naxye naq li koʼbʼeetak yumbʼeetak, xloqʼoninkil jalanil yos, li elqʼak, li kalaak, li bʼalaqʼik, li kamsink ut li tuulak, aʼan xnimal ru maak li inkʼaʼ tqayuʼami (1 Corintios 6:9-11; Apocalipsis 21:8). Li Santil Hu naxkʼut naq wank xjalanil ebʼ li maak aʼin rikʼin li maak li inkʼaʼ naqakʼe reetal naq naqabʼaanu, jun eetalil, xyeebʼal malaj xbʼaanunkil li inkʼaʼ us re jalan chik (Proverbios 12:18; Efesios 4:31, 32). Abʼanan, li Santil Hu naxwaklesi qachʼool re naq inkʼaʼ tqakubʼsi xwankil junaq li maak, xbʼaan naq aʼan naru tixbʼaanu naq moqon chik tqabʼaanu junaq li nimla maak (Mateo 5:27, 28).

2.   Li naʼekʼasink. Wankebʼ li maak li nabʼaanumank xbʼaan naq inkʼaʼ nanawmank li xchaqʼrabʼ li Yos (Hechos 17:30; 1 Timoteo 1:13). Usta li Santil Hu inkʼaʼ naxkʼulubʼa ebʼ li maak aʼin, naxye naq moko juntaqʼeet ta rikʼin li maak li naxbʼaanu li naxqʼet ribʼ chiru li Yos (Números 15:30, 31). Li Santil Hu naxye naq li yal naraj maakobʼk «naxbʼaanu li maaʼusilal li naraj xchʼool» (Jeremías 16:12, SBG).

3.   Rajlal sut. Li Santil Hu naxchʼolobʼ naq jalan maakobʼk junsutaq chiru xbʼaanunkil jun li nimla maak rajlal (1 Juan 3:4-8). Li Yos naraqok aatin saʼ xbʼeen junaq li inkʼaʼ naxkanabʼ maakobʼk usta ak kixtzol kʼaru li us (Hebreos 10:26, 27).

 Ebʼ li kristiʼaan li xeʼxbʼaanu jun li nimla maak maare inkʼaʼ sa nekeʼrekʼa ribʼ xbʼaan li xpaltilebʼ. Jun eetalil, li awabʼej David kixtzʼiibʼa: «Relik chi yaal naq linmaak qʼaxal naxqʼax linteram, kʼajoʼ raalal chiru xkawilal linmetzʼew» (Salmo 38:5, SBG). Abʼanan, li Santil Hu naxkʼe jun li qoybʼenihom: «Li inkʼaʼ us xchʼool xkanabʼaq xbʼaanunkil li maaʼusilal, ut li yibʼru xnaʼlebʼ mixkʼoxla chik li inkʼaʼ us. Sutqʼiiq chaq rikʼin li Qaawaʼ ut Aʼan taaruxtaana ru, sutqʼiiq chaq rikʼin li qaYos li jwal chaabʼil chi kuyuk maak» (Isaías 55:7, SBG).