Li aatin anástasis, saʼ griego li naʼoksimank re aatinak chirix li «wakliik wiʼ chik chi yoʼyo» naraj xyeebʼal «xaqliik wiʼ chik». Naq nawaklesiik junaq li kristiʼaan nakʼemank wiʼ chik li xyuʼam ut chixjunil li naxbʼaanu ut naxnaw naq toj maajiʼ nakamk (1 Corintios 15:12, 13).

 Saʼ li Santil Hu li kitzʼiibʼamank saʼ hebreo, moko natawmank ta li aatin wakliik wiʼ chik chi yoʼyo. Usta joʼkan, naxkʼe li oybʼenihom chirix li wakliik wiʼ chik chi yoʼyo. Jun eetalil, saʼ li xhu li propeet Oseas li Jehobʼa kixye: «Ma tinkol tabʼiʼ chiru li muqlebʼaal kamenaq? Ma twisi tabʼiʼ saʼ ruqʼ li kamk?» (Oseas 13:14, Li Santil Hu, Sociedad Bíblica de Guatemala, SBG; Job 14:13-15; Isaías 26:19; Daniel 12:2, 13).

 Bʼar teʼwakliiq wiʼ chik chi yoʼyo ebʼ li kamenaq? Wankebʼ teʼwakliiq saʼ choxa re awabʼejink rikʼin li Kriist (2 Corintios 5:1; Apocalipsis 5:9, 10). Li Santil Hu naxye naq aʼin «li xbʼeen waklijik chi yoʼyo», aʼin naraj xyeebʼal naq wank xkabʼ li waklijik chi yoʼyo (Apocalipsis 20:6, SBG). Li teʼxtaw rusilal aʼin, aʼan li teʼwanq chi junelik arin saʼ Ruuchichʼochʼ (Salmo 37:29).

 Kʼaru nakʼulmank naq junaq li kristiʼaan nawakliik wiʼ chik chi yoʼyo? Li Yos kixkʼe xwankil li Jesús re xwaklesinkilebʼ wiʼ chik chi yoʼyo ebʼ li kamenaq (Juan 11:25). Ut troksi aʼin re xwaklesinkil «chixjunilebʼ li wanqebʼ saʼ muqlebʼaal kamenaq», tixwaklesihebʼ joʼ chanru xnaʼlebʼebʼ naq toj maajiʼ nekeʼkamk (Juan 5:​28, SBG, 29). Li teʼwakliiq wiʼ chik chi yoʼyo arin saʼ Ruuchichʼochʼ kawaqebʼ li xjunxaqalil (Isaías 33:24; 35:​5, 6). Ut li teʼwakliiq wiʼ chik chi yoʼyo saʼ choxa teʼxkʼul jun «musiqʼejil tzʼejwalej», li naraj xyeebʼal naq aʼanaqebʼ chik musiqʼej (1 Corintios 15:42-44, SBG, 50).

 Anihebʼ teʼwakliiq wiʼ chik chi yoʼyo? Li Santil Hu naxye: «Teʼwakliiq wiʼ chik chi yoʼyo li tiikebʼ xchʼool ut ebʼ laj maak» (Hechos 24:15, SBG). Saʼ xyanqebʼ li tiikebʼ xchʼool, wankebʼ laj Noé, laj Abrahán ut li xSara (Génesis 6:9; Hebreos 11:11; Santiago 2:​21). Ut saʼ xyanqebʼ laj maak wankebʼ li kristiʼaan li inkʼaʼ xeʼxnaw ru li xchaqʼrabʼ li Jehobʼa.

 Abʼan, ebʼ li kristiʼaan li kʼajoʼ xyibʼal ru xnaʼlebʼ ut inkʼaʼ nekeʼxjal teʼkamq chi junajwa (Mateo 23:33; Hebreos 10:26, 27).

 Joqʼe twanq li wakliik wiʼ chik chi yoʼyo? Li Santil Hu naxye naq li teʼxik saʼ choxa teʼwakliiq saʼ xkʼulunik li Kriist, li kitiklaak saʼ li chihabʼ 1914 (1 Corintios 15:21-23). Li wakliik chi yoʼyo saʼ Ruuchichʼochʼ tkʼulmanq chiru li Jun Mil Chihabʼ naq li Jesús t-awabʼejinq, saʼ li qʼehil aʼin tchʼinaʼusoʼq li Ruuchichʼochʼ (Lucas 23:43, Li Santil Hu, Wycliffe Bible Translators, Wy; Apocalipsis 20:6, 12, 13).

 Kʼaʼut naru naqapaabʼ naq teʼwakliiq wiʼ chik chi yoʼyo ebʼ li kamenaq? Xbʼaan naq li Santil Hu naʼaatinak chirix bʼeleebʼ li kristiʼaan li keʼwakliik wiʼ chik chi yoʼyo ut wank ani keʼilok re (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Jun rehebʼ aʼan laj Lázaro, li ak kaahibʼ kutan chik xkamik ut li Jesús kixwaklesi chiru naabʼal li kristiʼaan (Juan 11:39, 42). Chi moko ebʼ li xikʼ nekeʼilok re li Jesús keʼxye naq tikʼtiʼ li kikʼulmank, joʼkan naq keʼraj xkamsinkil laj Lázaro ut li Jesús (Juan 11:47, 53; 12:9-11).

 Li Santil Hu naxye naq li Jehobʼa wank xwankil re xwaklesinkilebʼ li kamenaq. Ut saʼ xkʼabʼaʼ naq maakʼaʼ nasach saʼ xchʼool naxjultika chanruhebʼ li kristiʼaan li ak xeʼkamk. Ut maaʼani naramok chiru xbʼaanunkil aʼin xbʼaan naq aʼan li Nimajwal Yos (Job 37:23; Mateo 10:30; Lucas 20:37, 38). Li Yos moko kaʼaj tawiʼ naru naraj ajwiʼ xbʼaanunkil. Li Santil Hu naxye: «Sahaq chik aachʼool wikʼin [malaj nakaarahi ru wilbʼal wiʼ chik wu] xbʼaan naq laaʼat xatyiibʼank we» (Job 14:15, Wy. Akʼ tzʼiibʼ). Joʼkaʼin trekʼa ribʼ li Jehobʼa naq tixwaklesihebʼ wiʼ chik chi yoʼyo li teʼwanq arin saʼ Ruuchichʼochʼ.

Li nekeʼxye chirix li wakliik wiʼ chik chi yoʼyo

 Wiibʼ oxibʼ nekeʼxye: Naq nawakliik wiʼ chik chi yoʼyo junaq, li xkanaak chi yoʼyo naq kikamk naxjunaji wiʼ chik ribʼ rikʼin li xjunxaqalil.

 Li yaal: Li Santil Hu naxye naq maakʼaʼ nakanaak chi yoʼyo naq nakamk junaq li kristiʼaan (Génesis 2:7; Ezequiel 18:4). Naq nawaklesiik chi yoʼyo junaq li kristiʼaan maakʼaʼ naxjunaji ribʼ rikʼin, nayobʼtesiik bʼan wiʼ chik xbʼaan li Yos.

 Wiibʼ oxibʼ nekeʼxye: Wankebʼ li teʼwakliiq wiʼ chik chi yoʼyo re naq teʼkamsiiq wiʼ chik.

 Li yaal: Li Santil Hu naxye naq «li xeʼxbʼaanu li inkʼaʼ us teʼwakliiq chi yoʼyo re li tojbʼamaak» (Juan 5:29, SBG). Abʼan, traqmanq aatin saʼ xbʼeenebʼ chirix li teʼxbʼaanu naq teʼwakliiq wiʼ chik chi yoʼyo maawaʼ chirix li xeʼxbʼaanu naq toj maajiʼ nekeʼkamk. Li Jesús kixye: «Ebʼ li kamenaq teʼrabʼi xyaabʼ xkux li Ralal li Yos, ut ebʼ li teʼabʼinq re teʼwanq xyuʼam» (Juan 5:25, SBG). Wi ebʼ li teʼwakliiq wiʼ chik chi yoʼyo teʼxpaabʼ li naxye li Jesús teʼtzʼiibʼaaq li xkʼabʼaʼebʼ saʼ «li xhuhil li yuʼam» (Apocalipsis 20:12, SBG, 13).

 Wiibʼ oxibʼ nekeʼxye: Teʼwakliiq wiʼ chik chi yoʼyo, rikʼin li tibʼel li xwanq chaq rehebʼ.

 Li yaal: Li xtibʼel li kristiʼaan naqʼaak ut naʼosoʼk (Eclesiastés 3:19, 20).