Li Santil Hu naxye naq li Jehobʼa inkʼaʼ naraj naq tootʼaneʼq saʼ li «koʼbʼeetak yumbʼeetak» (1 Tesalonicenses 4:3, Li Santil Hu, Sociedad Bíblica de Guatemala, SBG). Saʼ li «koʼbʼeetak yumbʼeetak» wank li muxuk sumlaak, li winq nawank rikʼin winq ut li ixq rikʼin ixq joʼ ajwiʼ naq li ixq nawank rikʼin winq malaj naq li winq nawank rikʼin ixq naq inkʼaʼ sumsukebʼ.

•  Kʼaʼut wank xwankil chiru li Yos naq ebʼ li sumal tento teʼsumlaaq?

•  Ma us naq teʼwanq saʼ wiibʼal naq toj maajiʼ nekeʼsumlaak yal re rilbʼal ma teʼxkʼam ribʼ chiʼus?

•  Chanru xbʼaanunkil re naq li sumlajik us t-elq?

•   Li Yos kixaqabʼank re li sumlaak. Kixbʼaanu naq kixsumubʼebʼ laj Adán ut li xʼEva (Génesis 2:22-24). Aʼan inkʼaʼ kiraj naq li winq ut li ixq teʼwanq saʼ wiibʼal naq moko sumsukebʼ ta.

•   Li Yos naxnaw kʼaru us choʼq qe. Aʼan kixxaqabʼ li sumlaak re naq li winq ut li ixq inkʼaʼ teʼxjach ribʼ. Li Yos kiraj naq li sumlajik wanq rusilal ut tixkol li wankebʼ saʼ li junkabʼal. Kʼoxla aʼin: re xyiibʼankil chiʼus junaq li meex, tento naq tqabʼaanu joʼ naxye li kiyiibʼank re. Joʼkan ajwiʼ, wi naqaj naq saʼ li qajunkabʼal wanq li sahil chʼoolejil, tento naq tqabʼaanu li naxye li Yos. Wi tqabʼaanu, junelik us tooʼelq (Isaías 48:17, 18).

•   Wank saʼ wiibʼal naq toj maajiʼ sumsuko naru tixkʼam chaq naabʼal li chʼaʼajkilal. Joʼ, li yajel li naxletz ribʼ rikʼin wank saʼ wiibʼal, kanaak saʼ yuʼam naq inkʼaʼ kʼubʼanbʼil ut naq moko sa ta nakaawekʼa aawibʼ.

•   Li Yos kixkʼe rehebʼ li poyanam jun li maatan: naq teʼwanq saʼ wiibʼal teʼruuq chi wank xkokʼal. Aʼin jun li nimla maatan li qʼaxal oxloqʼ. Qakʼoxlaq naq choʼq re li Yos jwal oxloqʼ li yuʼam. Joʼkan naq, aʼan naroybʼeni naq tqoxloqʼi li maatan aʼin ut naroybʼeni ajwiʼ naq kaʼajwiʼ toowanq saʼ wiibʼal rikʼin li kristiʼaan li sumsuko wiʼ. Chi joʼkan tqoxloqʼi li qasumlajik (Hebreos 13:4).

 Moko aajel ta ru naq «teʼxyal» re rilbʼal ma teʼwanq chi junelik malaj teʼxkanabʼ ribʼ. Nakawuuk bʼan li wanjik naq saʼ kabʼichal nekeʼroxloqʼi li sumlajik ut naq nekeʼkʼanjelak saʼ kabʼichal re xtuqubʼankil ru ebʼ li chʼaʼajkilal. a Ut li sumlajik naxbʼaanu naq maajunwa teʼxjach ribʼ (Mateo 19:6).

 Maajun li sumlajik tzʼaqal re ru. Abʼan naru xtawbʼal li sahil chʼoolejil saʼ li sumlajik wi naqayuʼami li naxye li Santil Hu. Qilaq wiibʼ oxibʼ rehebʼ aʼin:

•   Kʼe saʼ ajl li naʼajmank chiru laasumʼaatin (1 Corintios 7:3-5; Filipenses 2:3, 4).

•   Kʼehomaq eechʼool chi roxloqʼinkil ut xraabʼal eeribʼ rajlal kutan (Efesios 5:25, 33).

•   Tzolomaq xkʼoxlankil rix xbʼeenwa li teeye (Proverbios 12:18).

•   Chiwanq eekuyum ut kuyumaq eemaak saʼ junpaat (Colosenses 3:13, 14).