Li Xʼawabʼejilal li Yos aʼan jun li awabʼejilal li kʼojobʼanbʼil xbʼaan li Jehobʼa. Saʼ xkʼabʼaʼ naq kʼojkʼo saʼ choxa, li Santil Hu naxkʼabʼaʼi joʼ «li xnimajwal wankilal li choxa» (Marcos 1:14, 15; Mateo 4:17, Li Santil Hu, Sociedad Bíblica de Guatemala, SBG). Li xkʼihalil li naʼlebʼ li naxbʼaanu li Xʼawabʼejilal li Yos, juntaqʼeet rikʼin li naxbʼaanu li xʼawabʼejilal li winq, abʼan, li Xʼawabʼejilal li Yos naxqʼax ru chixjunil li nekeʼxbʼaanu.

•   Li teʼawabʼejinq. Li Yos kixsikʼ li Jesukriist re naq twanq choʼq Awabʼej saʼ li Xʼawabʼejilal ut li wankil li kixkʼe re maajunwa xkʼehom re junaq li awabʼej re li Ruuchichʼochʼ (Mateo 28:18). Li Jesús naroksi li xwankil kaʼajwiʼ re xbʼaanunkil li us. Ak xkʼutbʼesi naq naxnaw jolomink ut toqʼobʼank u (Mateo 4:23; Marcos 1:40, 41; 6:31-34; Lucas 7:11-17). Rikʼin li xtenqʼ li Yos, li Jesús kixsikʼ ebʼ li poyanam re chixjunil li Ruuchichʼochʼ re naq teʼxik saʼ choxa ut teʼawabʼejinq rochbʼen saʼ xbʼeen li Ruuchichʼochʼ (Apocalipsis 5:9, 10).

•   Jarubʼ chihabʼ teʼawabʼejinq. Li xʼawabʼejilal ebʼ li winq nekeʼchalk nekeʼxik, abʼan li Xʼawabʼejilal li Yos «maajun wa taajukʼmanq» (Daniel 2:44, SBG).

•   Li teʼwanq rubʼel li awabʼejilal aʼin. Chixjunilebʼ li qas qiitzʼin li teʼxbʼaanu li rajom li Yos naru nekeʼwank rubʼel li Xʼawabʼejilal li Jehobʼa maakʼaʼ naxye bʼar yoʼlajenaqebʼ malaj bʼar nekeʼchalk ebʼ li xxeʼtoonil yuwaʼ (Hechos 10:34, 35).

•   Li chaqʼrabʼ. Ebʼ li chaqʼrabʼ (malaj ebʼ li taql) chirix li Xʼawabʼejilal li Yos moko kaʼaj tawiʼ naxtzʼeqtaana li yiibʼ aj bʼaanuhom; naxnima ajwiʼ li xchaabʼilal ru xnaʼlebʼebʼ li xmoos. Jun eetalil, li Santil Hu naxye: «Taara li Qaawaʼ laaYos chi anchal laachʼool, chi anchal laawaanm ut chi anchal laakʼaʼuxl. Aʼan li xbʼeen ut xnimal ru chaqʼrabʼ. Li xkabʼ chanchan ajwiʼ aʼan: “Taara laawas aawiitzʼin joʼ naq nakara aawibʼ”» (Mateo 22:37-39, SBG). Saʼ xkʼabʼaʼ naq ebʼ li xmoos nekeʼxra li Yos ut ebʼ li qas qiitzʼin, aʼin naxbʼaanu naq chixjunilebʼ teʼxkʼam ribʼ saʼ usilal.

•   Naxtzolebʼ. Naxkʼe rehebʼ li xmoos li chaqʼrabʼ li naxterqʼusi li xchaabʼilal ru li xnaʼlebʼebʼ, naxkʼe ajwiʼ li Xʼawabʼejilal li Yos re naq teʼruuq xbʼaanunkil li yeebʼil rehebʼ (Isaías 48:17, 18).

•   Li rajomebʼ. Li Xʼawabʼejilal li Yos inkʼaʼ nakʼanjelak re naq teʼbʼihomoʼq li teʼawabʼejinq; nakʼanjelak bʼan re naq ttzʼaqloq ru li rajom li Yos. Aʼin naxchap ajwiʼ li yeechiʼom li kʼebʼil rehebʼ li nekeʼrahok re li Yos xtawbʼal li junelik yuʼam arin saʼ Ruuchichʼochʼ (Isaías 35:1, 5, 6; Mateo 6:10; Apocalipsis 21:1-4).