Ak re, naq naqabʼaanu li patzʼom aʼin naq nakamk junaq li qamiiw malaj li qakomon. Li Santil Hu naxye: «Li xtiqʼlebʼ li kamk aʼan li maak» (1 Corintios 15:56, Li Santil Hu, Sociedad Bíblica de Guatemala, SBG).

 Kʼaʼut naq chiqajunilo nokoomaakobʼk ut nokookamk?

 Laj Adán ut li xʼEva, ebʼ li xbʼeen kristiʼaan xeʼkamk xbʼaan naq xeʼmaakobʼk chiru li Yos (Génesis 3:17-19). Naq xeʼxqʼet ribʼ xeʼnajtoʼk rikʼin li Yos «li xyoʼlebʼaal li yuʼam» ut kaʼajwiʼ xeʼxkʼam chaq li kamk saʼ xbʼeenebʼ (Salmo 36:10, SBG; Génesis 2:17).

 Laj Adán kixnumsi li maak saʼ xbʼeenebʼ chixjunil li ralal xkʼajol. Li Santil Hu naxye: «Relik chi yaal naq xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (Romanos 5:12, SBG). Nokookamk xbʼaan naq chiqajunilo nokoomaakobʼk (Romanos 3:23).

Tsacheʼq li kamk

 Li Yos kixyeechiʼi naq «tixsach chi junajwa xwankil li kamk» (Isaías 25:8, SBG). Abʼanan, re naq tixbʼaanu aʼin tento naq trisi li xxeʼil li kamk: aʼ li maak. Ut tixbʼaanu aʼin saʼ xkʼabʼaʼ li Jesukriist li naxsach «xmaak li ruuchichʼochʼ» (Juan 1:29, SBG; 1 Juan 1:7).