Li Santil Hu naxye naq yoʼon wanqo chi siʼink ut naq moko tqabʼaanu ta chi kabʼrix qachʼool. Naq nokoosiʼink moko kaʼajwiʼ naxtaw rusilal li kristiʼaan li nakʼuluk re, naqataw ajwiʼ rusilal laaʼo (Proverbios 11:25; Lucas 6:38). Li Jesús kixye: «Qʼaxal nim li sahil chʼoolejil wank saʼ li kʼehok chiru li wank saʼ li kʼuluk» (Hechos 20:35, Li Santil Hu, Sociedad Bíblica de Guatemala, SBG).

•  Joqʼe us siʼink?

•  Joqʼe inkʼaʼ us siʼink?

•  Ebʼ li xraqal li Santil Hu li naʼaatinak chirix li siʼink

 Kʼehok chi anchal qachʼool naxkʼam chaq naabʼal rusilal. Li Santil Hu naxye: «Li junjunq chixkʼehaq joʼnimal naʼalaak saʼ xchʼool, inkʼaʼ chi kaʼbʼrix xchʼool chi moko chi minbʼilaq ru, xbʼaan naq li Yos naxra li nasihok chi sa saʼ xchʼool» (2 Corintios 9:7, SBG).

 Li Yos naroybʼeni naq ebʼ li nekeʼloqʼonink re, teʼsiʼinq chi anchal xchʼool (Santiago 1:27). Wi naqatenqʼahebʼ li wankebʼ saʼ rajbʼal ru, naqabʼaanu li nawulak chiru li Yos ut aʼan narekʼa naq wank saʼ kʼas qikʼin (Proverbios 19:17). Li Santil Hu naxye naq li Yos toorosobʼtesi (Lucas 14:12-​14).

 Naq naqabʼaanu re xnimobʼresinkil qawankil. Jun eetalil:

•   Re naq ebʼ li junchʼol tooʼeʼril (Mateo 6:2).

•   Re naq teʼxkʼe reqaj qe (Lucas 14:12-14).

•   Re xloqʼbʼal li kolbʼa ibʼ (Salmo 49:7, 8).

 Naq naʼoksimank re xbʼaanunkil junaq li naʼlebʼ li inkʼaʼ nawulak chiru li Yos. Jun eetalil, moko us ta xkʼebʼal xtumin junaq li kristiʼaan re naq tkalaaq, tbʼuulinq malaj re naq tixloqʼ li bʼan li nakanobʼresink u (1 Corintios 6:9, 10; 2 Corintios 7:1). Joʼkan ajwiʼ, moko us ta xkʼebʼal xtumin junaq li qas qiitzʼin li naru chi kʼanjelak abʼan inkʼaʼ naraj (2 Tesalonicenses 3:10).

 Naq tixram chiqu xbʼaanunkil li xkʼanjel li Jehobʼa. Li Santil Hu naxye naq li najolomink re li junkabʼal tento tixkʼe re li naʼajmank chiru (1 Timoteo 5:8). Moko us ta naq tixtenqʼahebʼ li junchʼol ut inkʼaʼ tixtenqʼa li xjunkabʼal. Joʼkan ajwiʼ, li Jesús moko kixkʼulubʼa ta ebʼ li inkʼaʼ nekeʼraj rilbʼal li xnaʼ xyuwaʼ naq ak cheekebʼ chik xbʼaan naq nekeʼxye naq li xbʼihomal «ak mayejanbʼil chik» (Marcos 7:9-13, SBG).