Heeheʼ. Qilaq wiibʼ oxibʼ xraqal li Santil Hu li ak xtenqʼa chi miyon li junkabʼal re naq sahaqebʼ saʼ xchʼool.

1.   Teʼsumlaaq chiru li chaqʼrabʼ. Naq wiibʼ li poyanam nekeʼsumlaak, nekeʼxye chiruhebʼ li junchʼol naq maajunwa teʼxkanabʼ ribʼ toj chalen saʼ xkamikebʼ. Chi joʼkaʼin nekeʼxxaqabʼ rubʼelankil li junkabʼal re naq sahaq saʼ xchʼool (Mateo 19:4-6).

2.   Teʼxra ut teʼroxloqʼi ribʼebʼ. Aʼin naraj xyeebʼal naq li bʼeelomej malaj li ixaqilbʼej tento tril li xsumʼaatin joʼ chanru naraj aʼan naq t-ileʼq (Mateo 7:12; Efesios 5:25, 33).

3.   Inkʼaʼ teʼroksi li aatin li ra nanaq. Junelik teʼaatinaq saʼ tuulanil ut saʼ chaabʼilal usta jun rehebʼ tixye malaj tixbʼaanu junaq li naʼlebʼ li narahobʼtesink (Efesios 4:31, 32). Ut aʼin naxye li Santil Hu: «Li nasumenk rikʼin qʼunil aatin, naxkotz li josqʼil; aʼut li nasumenk saʼ josqʼil, naxnimobʼresi li chʼaʼajkilal» (Proverbios 15:1, Li Santil Hu, Sociedad Bíblica de Guatemala, SBG).

4.   Inkʼaʼ teʼxkʼat roq li xsumʼaatin. Li bʼeelomej ut li ixaqilbʼej maajunwa txik xchʼool chirix junaq chik li poyanam li maawaʼ xsumʼaatin chi moko tixrahi ru wank rikʼin (Mateo 5:28). Li Santil Hu naxye: «Cheroxloqʼi li sumlaak ut maakʼaʼ kʼaru teebʼalaqʼi wiʼ eeribʼ» (Hebreos 13:4, SBG).

5.   Teʼxkʼirisi li xkokʼal rikʼin rahok. Inkʼaʼ teʼril joʼ uutzʼuʼuj ebʼ li xkokʼal li inkʼaʼ naruhank xqʼusbʼalebʼ chi moko teʼxrahobʼtesi naq teʼxtij (Proverbios 29:15; Colosenses 3:21).