Inkʼaʼ, moko joʼkan ta. Li Santil Hu naxye chi chʼolchʼo ru naq li Yos kixyobʼtesi ebʼ li kristiʼaan ut li jalan jalanq chi yobʼtesihom «aʼ yaal chanru li xpaayil», joʼ ebʼ li xul ut ebʼ li awimq (Génesis 1:12, 21, 25, 27, Li Santil Hu, Sociedad Bíblica de Guatemala, SBG; Apocalipsis 4:11). Li Santil Hu naxchʼolobʼ naq chixjunilebʼ li kristiʼaan chalenaqebʼ rikʼin li xbʼeen qanaʼ qayuwaʼ, aʼ laj Adán ut li xʼEva (Génesis 3:20; 4:1). Li Santil Hu moko naxchap ta ribʼ rikʼin li naʼlebʼ naq li Yos kixkanabʼ naq chixjunil li kʼaʼaq re ru tyoʼlaaq xjunes joʼ ebʼ li xul ut ebʼ li awimq. Joʼkan ajwiʼ li Santil Hu moko naxwechʼ ta rix li nekeʼxye ebʼ li nekeʼxtzʼil rix li jalan jalanq chi naʼlebʼ naq ebʼ li jar paay chi awimq, xul ut kristiʼaan jalan jalanq chanru nekeʼnaʼlebʼak ut moko juntaqʼeetebʼ ta.

•  Kʼaru nekeʼxpaabʼ wiibʼ oxibʼ li kristiʼaan?

•  Ma naxchap ribʼ li naxye li Santil Hu rikʼin li naʼlebʼ naq chixjunil kiyoʼlaak xjunes?

•  Saʼ xkʼabʼaʼ naq ebʼ li xul ut ebʼ li awimq nekeʼjalaak re naq teʼwanq xyuʼam, ma naraj xyeebʼal aʼin naq yal xjunes xeʼyoʼlaak?

 Ebʼ li kristiʼaan li nekeʼxpaabʼ naq li Yos kixkanabʼ naq chixjunil tyoʼlaaq xjunes nekeʼxye jalan jalanq li naʼlebʼ chirix chanru kixbʼaanu aʼin. «Wiibʼ oxibʼ li kristiʼaan nekeʼxpaabʼ naq li Yos kixkanabʼ naq junaq li xul malaj junaq li awimq tkʼayq rikʼin li kʼaru wank saʼ li xsutam ut twanq xyuʼam re naq chi joʼkan tpukanq malaj tixjekʼi ribʼ».

 Maare nekeʼxpaabʼ ajwiʼ li naʼlebʼ aʼin:

•   Chixjunilebʼ li kristiʼaan, ebʼ li xul ut ebʼ li awimq chalenaqebʼ rikʼinebʼ li xxeʼtoon.

•   Wankebʼ nekeʼxpaabʼ naq jun li yuʼam naru nasutqʼiik choʼq junaq chik yuʼam. Jun eetalil, nekeʼxkʼut naq ebʼ li max nekeʼsutqʼiik joʼ winq.

•   Nekeʼxye ajwiʼ naq li Yos wank re, naq nakʼulmank chixjunil aʼin.

 Wi yaal raj naq chixjunil kiyoʼlaak xjunes, moko tzʼaqal ta raj re ru li naxye li hu Génesis chirix li yobʼtesihom. Abʼan naq li Jesús kiʼaatinak chirix aʼin, chʼolchʼo chiru naq yaal (Génesis 1:26, 27; 2:18-24; Mateo 19:4-6). Li Santil Hu naxye naq li Jesús kixtenqʼa li Xyuwaʼ chi xyobʼtesinkil «chixjunil» li kʼaʼaq re ru naq wank chaq saʼ choxa ut naq toj maajiʼ nachalk saʼ xbʼeen li Ruuchichʼochʼ (Juan 1:3, SBG). Joʼkan naq li naʼlebʼ naq li Yos kixkanabʼ naq chixjunil tyoʼlaaq xjunes inkʼaʼ naxchap ribʼ rikʼin li naxye li Santil Hu.

 Li Santil Hu inkʼaʼ naxchʼolobʼ chanru nekeʼjalaak ebʼ li awimq, ebʼ xul ut ebʼ li kristiʼaan re naq teʼwanq xyuʼam. Chi moko naxwechʼ ta rix li naʼlebʼ aʼin naq ebʼ li jar paay chi awimq ut xul, nekeʼjalaak naq nekeʼkʼiik ut naq jalan jalanq nekeʼnaʼlebʼak. Wiibʼ oxibʼ li kristiʼaan nekeʼxpaabʼ naq aʼin nakʼulmank saʼ xkʼabʼaʼ naq chixjunil kiyoʼlaak xjunes, abʼanan li xyaalalil aʼan naq li naʼlebʼ aʼin moko naxkʼam ta chaq junaq chik akʼ yuʼam.