Wank li tij li inkʼaʼ naxsume li Yos. Qilaq wiibʼ rehebʼ aʼin.

1. Li tij li inkʼaʼ naxchap ribʼ rikʼin li rajom li Yos

 Li Yos inkʼaʼ naxsume li tij li inkʼaʼ naxchap ribʼ rikʼin li rajom li wank saʼ li Santil Hu (1 Juan 5:14). Qilaq jun li eetalil, li Santil Hu naxye naq tqatzʼeqtaana li atawank, joʼ li tumin. Li bʼuulink rix tumin naxkʼam chaq li atawank (1 Corintios 6:​9, 10). Joʼkan naq, li Yos inkʼaʼ naxsume ebʼ li tij bʼarwiʼ nekeʼxtzʼaama naq teʼxkʼul junaq li maatan naq yookebʼ chi bʼatzʼunk. Li Yos moko saʼ junpaat ta naxkʼe qe chixjunil li naqaj joʼ nekeʼxkʼoxla li poyanam. Kʼajoʼ naqabʼanyoxi naq li Yos inkʼaʼ naxsume li xtijebʼ li poyanam li nekeʼxtzʼaama li moko us ta (Santiago 4:3).

2. Li tij li naxrahobʼtesi xchʼool li Yos

 Li Yos inkʼaʼ narabʼi li xtijebʼ li yal nekeʼxrahobʼtesi xchʼool. Li Yos kixye aʼin rehebʼ li xeʼxqʼet chaq ribʼ chiru: «Us ta neketiq roq leetij, laaʼin inkʼaʼ nawabʼi, xbʼaan naq osoʼjenaq saʼ kikʼ leeruqʼ: kʼajoʼebʼ li poyanam kekamsi!» (Isaías 1:15, Li Santil Hu, Sociedad Bíblica de Guatemala). Wi xeʼxyotʼ raj xchʼool ut xeʼxjal xnaʼlebʼ, li Yos kixkuy raj xmaakebʼ ut kixsume raj li xtijebʼ (Isaías 1:18).