Heeheʼ. Li Yos narabʼi ebʼ li qas qiitzʼin li nekeʼtzʼaamank chiru chi anchalebʼ xchʼool wi li xtijebʼ naxkʼam ribʼ rikʼin li rajom. Ut saʼ li Santil Hu wank ebʼ li eetalil chirixebʼ li keʼxpatzʼ xtenqʼankil re li Yos. Ebʼ li eetalil aʼin tooxtenqʼa chi tijok, usta maajunwa qabʼaanuhom.

•   «At Qaawaʼ [Jehobʼa], at inYos, chinaatenqʼa taxaq ut chinaakol saʼ xkʼabʼaʼ xnimal laawuxtaan!» (Salmo 109:26, Li Santil Hu, Sociedad Bíblica de Guatemala, SBG).

•   «At inYos, maakʼaʼ wank we ut qʼaxal toqʼobʼ wu; seebʼa chaq aawibʼ chintenqʼankil. Laaʼat laj tenqʼahom ut laj kolol we; matbʼayk chaq» (Salmo 70:6, SBG).

 Chʼolchʼo tzʼaqal naq li kitzʼiibʼank re ebʼ li raqal aʼin qʼaxal kaw li xpaabʼal chirix li Yos. Aʼut, wi moko jwal kaw ta li qapaabʼal? Li Yos narabʼi ajwiʼ ebʼ li nekeʼtzʼaamank chiru chi anchalebʼ xchʼool. Li Santil Hu naxye naq li Yos narabʼi ebʼ «li nekeʼmaynak xchʼool» ut li kubʼenaqebʼ xchʼool, aʼin naraj xyeebʼal, li jwal yookebʼ xkʼaʼuxl (Salmo 34:19, SBG).

 Maare wank sut tqakʼoxla naq jwal najt wank li Yos ut maakʼaʼ naraj re li naqakʼul. Abʼanan, li Santil Hu naxye: «Jwal nim li Qaawaʼ, abʼan naril li maakʼaʼ xwankil ut toj najt naxnaw ru li qʼetqʼet» (Salmo 138:6, SBG). Li Jesús kixye rehebʼ li xtzolom: «Ajlanbʼilebʼ chixjunil li rismal leejolom» (Mateo 10:30, SBG). Joʼkan bʼiʼ, wi li Yos naxkʼe xchʼool chirix li kokʼ naʼlebʼ joʼebʼ aʼin, li inkʼaʼ naqakʼe xwankil laaʼo, chanru naq inkʼaʼ trabʼi naq tqaseeraqʼi re li yooko xkʼulbʼal (1 Pedro 5:7).