Joʼkan tzʼaqal. Li Yos naxkʼe xchʼool chirixebʼ li yaj li nekeʼkʼanjelak chiru. Li Santil Hu naxye aʼin chirixebʼ: «Li Qaawaʼ taakʼirtasinq re naq yokyooq xbʼaan li rahilal» (Salmo 41:4, Li Santil Hu, Sociedad Bíblica de Guatemala, SBG). Arin wank oxibʼ li naʼlebʼ li naru tqabʼaanu wi wank junaq qanimla yajel:

1.   Qatzʼaamaq re li Yos naq tixkʼe qametzʼew. «Li tuqtuukil usilal li nachalk rikʼin li Yos ut naxqʼax ru chixjunil li naʼlebʼ» tooxtenqʼa naq yooq qakʼaʼuxl ut tixkʼe qametzʼew re xkuybʼal (Filipenses 4:6, 7, SBG).

2.   Chaabʼil tookʼoxlaq. Li Santil Hu naxye: «Li sahil chʼoolej aʼan chanchan li bʼan nakʼehok kawilal; abʼan li rahil chʼoolej naʼoksink yajel» (Proverbios 17:22, SBG). Li sahil chʼoolejil naxbʼaanu ajwiʼ naq kawaqo.

3.   Qakawresihaq li qoybʼenihom. Li qoybʼenihom nokooxtenqʼa re naq sahaq saʼ qachʼool usta yajaqo (Romanos 12:12). Li Santil Hu naxye naq twulaq xkutankil naq maaʼani chik tixye: «Yajin» (Isaías 33:24, SBG). Li Yos trisi chixjunil li yajel li inkʼaʼ naru risinkil li winq. Ut timil timil trisi li tiixilal, xbʼaan naq li Santil Hu naxye: «Tojaʼ naq taakawuuq wiʼ chik laajunxaqalil, joʼ chaq saʼ laasaajilal» (Job 33:25, SBG).

 Esil: Joʼ aj testiiw re li Jehobʼa chʼolchʼo chiqu naq li Yos nokooxtenqʼa, abʼan naqasikʼ ajwiʼ li qatenqʼ rikʼinebʼ laj bʼanonel naq wank junaq qayajel (Marcos 2:17). Abʼanan inkʼaʼ naqaye kʼaru li bʼan naru troksi junaq, xbʼaan naq li junjunq yal re kʼaru tixbʼaanu.