Inkʼaʼ. Li Santil Hu moko naxye ta naq inkʼaʼ us li tumin, chi moko naxye naq chixjunil li rahilal nachalk saʼ xkʼabʼaʼ li tumin. Wank jun li aatin li nayeemank: «Li tumin aʼan xxeʼil chixjunil li rahilal», naabʼalebʼ li kristiʼaan nekeʼxkʼoxla naq li aatin aʼin chalenaq saʼ li Santil Hu. Abʼan, moko joʼkan ta. Li Santil Hu naxye bʼan: «Li xxeʼ chixjunil li maaʼusilal aʼan li xrahinkil ru li tumin» (1 Timoteo 6:10, Li Santil Hu, Sociedad Bíblica de Guatemala, SBG).

•  Kʼaru naxye li Santil Hu chirix li tumin?

•  Kʼaʼut xiwxiw naq tqarahi ru li tumin?

•  Li rusilal li naqataw naq naqabʼaanu li naxye li Santil Hu

•  Li naʼlebʼ li naxkʼe li Santil Hu chirix li tumin

 Li Santil Hu naxye naq, wi naqanaw roksinkil chiʼus li tumin naru nokooxkol ut nokooxtenqʼa (Eclesiastés 7:12). Naʼaatinak ajwiʼ chiʼus chirixebʼ li kristiʼaan li wankebʼ xtumin ut nekeʼxtenqʼa li junchʼol (Proverbios 11:25).

 Abʼan, il, li Santil Hu moko naxye ta naq li qʼaxal wank xwankil saʼ li qayuʼam aʼan li tumin. Saʼ Hebreos 13:5, SBG, naxye: «Mexrahink li bʼihomal, kʼojkʼooq bʼan eechʼool rikʼin li kʼaru wank eere». Kʼaru naqatzol? Usta li tumin natenqʼank, maajunwa raj tqakʼe xbʼeenwa saʼ li qayuʼam. Us raj naq sahaq saʼ li qachʼool rikʼin li naʼajmank chiqu: li qawa, li qochoch ut li qabʼaatal (1 Timoteo 6:8).

 Ebʼ li kristiʼaan li nekeʼxrahi ru li tumin inkʼaʼ teʼxtaw li junelik yuʼam (Efesios 5:5). Xbʼeen xbʼaan naq li atawank chanchan xloqʼoninkil li jalanil yos (Colosenses 3:5). Xkabʼ xbʼaan naq re xtawbʼal li nekeʼraj, nekeʼxbʼaanu junaq yibʼru aj naʼlebʼ. Saʼ Proverbios 28:20, SBG, naxye naq «li nabʼihomoʼk chi junpaat, toxtoj rix li xmaak». Maare t-oq chi bʼalaqʼik, tikʼtiʼik, elqʼak, relqʼankil junaq li kristiʼaan malaj kamsink.

 Ut usta inkʼaʼ tqabʼaanu junaq li yibʼru aj naʼlebʼ, xrahinkil ru li tumin naru naxkʼam chaq jalan chik li chʼaʼajkilal. Li Santil Hu naxye: «Aʼut ebʼ li nekeʼraj bʼihomoʼk, nekeʼxkʼe ribʼ chi aaleek ut teʼtʼaneʼq saʼ li raʼal, saʼ kʼiila paay chi kaqalik qʼaxal yibʼebʼ ru ut maakʼaʼ naʼok wiʼ: ebʼ aʼan nekeʼkʼamok rehebʼ li winq saʼ li sachlebʼaal ut saʼ li lajk-osoʼk» (1 Timoteo 6:9, SBG).

 Wi junelik oxloqʼ chiqu li naxye li Jehobʼa ut inkʼaʼ naqatzʼeqtaana li xnaʼlebʼ re xtawbʼal li tumin, inkʼaʼ tqatzʼajni li qakʼabʼaʼ ut sahaq xchʼool li Yos qikʼin. Wi junelik naqakʼe saʼ ajl li naraj li Yos, aʼan naxye: «Inkʼaʼ tatinkanabʼ chi moko tatintzʼeq chirix inchʼool» (Hebreos 13:5, 6, SBG). Ut naxye ajwiʼ naq «li tiik xchʼool, naabʼalebʼ nekeʼosobʼtesink re» (Proverbios 28:20, SBG).