Li Santil Hu inkʼaʼ naxkʼut naq tootijoq chiruhebʼ li saant. Tootijoq kaʼajwiʼ chiru li Yos ut saʼ xkʼabʼaʼ li Jesús. Li Jesús kixye rehebʼ li xtzolom: “Joʼkaʼin naq textijoq laaʼex: «At qaYuwaʼ li wankat saʼ choxa, santobʼresinbʼil taxaq laakʼabʼaʼ»” (Mateo 6:9, Li Santil Hu, Sociedad Bíblica de Guatemala, SBG). Li Jesús maajunwa kixye naq tootijoq chiru junaq li saant, junaq li ánjel malaj chiru jalan chik.

 Li Jesukriist kixye ajwiʼ: «Laaʼin li bʼe, li yaal ut li yuʼam. Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ» (Juan 14:6, SBG). Kaʼajwiʼ li Jesús naru naʼaatinak saʼ qakʼabʼaʼ chiru li Yos (Hebreos 7:25).

Ma naru tootijoq chiru li Yos joʼ ajwiʼ chiruhebʼ li saant?

 Saʼ jun rehebʼ li Lajeebʼ chi Chaqʼrabʼ li Yos kixye: «Laaʼin li Qaawaʼ laaYos, laaʼin jun Yos aj sowen» (Éxodo 20:5, SBG). Kʼaʼut nayeemank naq li Yos «aj sowen»? Saʼ li Santil Hu La Biblia. Traducción del Nuevo Mundo, naxkʼut naq li Yos naraj naq «kaʼajwiʼ aʼan tqaloqʼoni ru». Aʼan naxye naq maaʼani chik tqaloqʼoni ru, naq nokootijok chiru yooko xloqʼoninkil ru (Isaías 48:11).

 Wi nokootijok chiru junaq li saant malaj li ánjel, li Yos trahoʼq saʼ xchʼool. Saʼ Apocalipsis (Revelación) naxye kʼaru kixbʼaanu jun li ánjel naq li ápostol Juan kixwiqʼibʼ ribʼ chiru: «Maabʼaanu aʼin! Laaʼin aawech moosil; wech moosilebʼ ajwiʼ ebʼ laawas aawiitzʼin li nekeʼxkʼuula saʼ xchʼoolebʼ li xchʼolobʼahom li Jesus. Aʼ li Yos tento taaloqʼon ru» (Apocalipsis 19:10, SBG).