Li Santil Hu jun sut ajwiʼ naʼaatinak chirix li eetalil li nakʼemank chiru li tibʼelej, saʼ Levítico 19:28, Li Santil Hu, Sociedad Bíblica de Guatemala, SBG naxye: «Chi moko chekʼe junaq eetalil chiru leetibʼel». Li Yos kixkʼe li taql aʼin rehebʼ laj Israel xbʼaan naq inkʼaʼ kiraj naq teʼxkʼam rehebʼ rikʼinebʼ li junchʼol chi tenamit, li keʼxtzʼiibʼa chiruhebʼ li xtibʼel li xkʼabʼaʼ ut li xjalam u li xyosebʼ (Deuteronomio 14:2). Usta ebʼ laj paabʼanel moko wankebʼ ta rubʼel xwankil li chaqʼrabʼ li kixkʼe li Yos rehebʼ laj Israel, li naʼlebʼ aʼin nakʼanjelak chiqu.

Ma us naq junaq laj paabʼanel tixkʼe li eetalil chiru xtibʼel?

 Qatzʼilaq rix wiibʼ oxibʼ li raqal li Santil Hu li tooxtenqʼa chi xnawbʼal aʼin.

•   «Joʼkanaqebʼ ajwiʼ li ixq, tiqtooqebʼ chi chaabʼil, [...] saʼ xyaalal» (1 Timoteo 2:9, SBG). Li naʼlebʼ aʼin nakʼanjelak ajwiʼ choʼq rehebʼ li winq. Ebʼ li tzʼaqal aj paabʼanel maajunwa teʼxtiqibʼ ribʼ saʼ joʼmaajoʼil xbʼaan naq ebʼ li junchʼol naru nekeʼtʼaneʼk saʼ li maak malaj inkʼaʼ sa teʼrekʼa ribʼ.

•   Wankebʼ nekeʼxkʼe reetalil li xtibʼel re xkʼutbʼesinkil anihebʼ chi tzʼaqal malaj re xkʼutbʼesinkil naq maaʼani nataqlank rehebʼ, aʼanebʼ bʼan yalebʼ re saʼ xbʼeen li xtibʼel. Abʼanan li Santil Hu naxye rehebʼ laj paabʼanel: «Teeyeechiʼi leetibʼel joʼ yoʼyokil mayej, saant, joʼ nawulak chiru li Yos; chi joʼkan teekʼutbʼesi naq xeeroksi chiʼus leekaʼaʼuxl» (Romanos 12:1, La Biblia. Traducción del Nuevo Mundo, 2019 saʼ español). Naq junaq naroksi chiʼus li xkʼaʼuxl, aʼin ttenqʼanq re chi xkʼoxlankil kʼaʼut naraj xkʼebʼal reetalil li xtibʼel. Jun eetalil, maare naraj xkʼambʼal re rikʼinebʼ li junchʼol malaj naraj xkʼutbʼesinkil naq natzʼaqonk saʼ jun li chʼuut. Abʼan wi joʼkan, us raj naq tixkʼoxla: «Kʼaru tinbʼaanu wi maaʼani chik naʼoksink re li eetalil aʼin malaj inkʼaʼ chik nawaj roksinkil?». Wi naxtzʼil rix kʼaʼut naraj xkʼebʼal reetalil li xtibʼel, truuq xnawbʼal kʼaru us choʼq re (Proverbios 4:7).

•   «Li ani nekeʼxkʼoxla chiʼus li kʼaru nekeʼxbʼaanu, us nekeʼelk [...]. Abʼanan li ani inkʼaʼ nekeʼxkʼoxla chiʼus li kʼaru nekeʼxbʼaanu [...] inkʼaʼ us nekeʼelk» (Proverbios 21:5, Li Santil Hu, Wycliffe Bible Translators. Akʼ tzʼiibʼ). Naabʼalebʼ li qas qiitzʼin li nekeʼxkʼe reetalil li xtibʼel moko toj nekeʼxkʼoxla ta chiʼus li nekeʼxbʼaanu. Abʼanan li nekeʼnaʼlebʼak chi joʼkan maare toj teʼxtoj rix chiru naabʼal tiʼeemp li xeʼxbʼaanu. Maare ttzʼeqtaanaaq xbʼaanebʼ li junchʼol malaj inkʼaʼ chik tkʼeheʼq xkʼanjel. Joʼkan ajwiʼ, terto ut qʼaxal ra risinkil li eetalil chiru xtibʼel junaq li poyanam. Ak ilbʼil naq naabʼalebʼ li poyanam li xeʼxkʼe reetalil li xtibʼel moqon chik xeʼxkʼoxla naq inkʼaʼ raj peʼ xeʼxkʼe. Ut aʼin kixkʼe reetal jun li molam li nakʼanjelak re risinkil li eetalil chiru xtibʼelebʼ li poyanam.