Li Santil Hu naxye naq inkʼaʼ t-oksimanq li kikʼ. Joʼkan naq, joʼ aj paabʼanel inkʼaʼ naqawaʼ. Chi moko naqakʼul saʼ qichʼmul chi moko naqakʼulubʼa jun rehebʼ li xnimal ru xchaʼal. Qilaq wiibʼ oxibʼ xraqal li Santil Hu.

•   Génesis 9:4, Li Santil Hu, Sociedad Bíblica de Guatemala, SBG. Naq ak xnumeʼk li Bʼutʼihaʼ, li Yos kixkanabʼ naq laj Noé ut li xjunkabʼal teʼxwaʼ li xtibʼel li xul, abʼan, keʼyeheʼk re, naq teʼxbʼaanu jun li naʼlebʼ: «Li tibʼ li toj wank xkikʼel inkʼaʼ naru teetzeka, xbʼaan naq li kikʼ aʼan xyuʼam». Ut saʼ xkʼabʼaʼ naq ralal xkʼajolo laj Noé, laaʼo ajwiʼ tento tqapaabʼ li taql aʼin.

•   Levítico 17:14, SBG. «Inkʼaʼ teetzeka li kikʼ, xbʼaan naq aʼan li xyuʼamebʼ chixjunilebʼ li yoʼyookebʼ, ut yalaq ani taatzekanq re, tento taaʼisiiq [malaj tkamsiiq]». Choʼq re li Yos, li kikʼ reetalil li yuʼam xbʼaan naq li yuʼam re li Yos. Usta li chaqʼrabʼ aʼin kaʼajwiʼ rehebʼ laj Israel kikʼemank, naxkʼut naq wank xwankil choʼq re li Yos.

•   Hechos 15:20, SBG. Li Yos naxye rehebʼ laj paabʼanel naq «cheʼxkolaq ribʼ chiru [...] li kikʼ», aʼin ajwiʼ li taql li kikʼeheʼk re laj Noé. Li xyuʼamebʼ li xbʼeen aj paabʼanel naxkʼutbʼesi naq maajunwa xeʼxwaʼ li kikʼ chi moko xeʼroksi re xbʼanbʼal ribʼebʼ.

Kʼaʼut naxye li Yos naq inkʼaʼ tqoksi li kikʼ?

 Wank wiibʼ oxibʼ xyaalal naq inkʼaʼ tqakʼulubʼa li kikʼ saʼ qichʼmul. Abʼanan, li xnimal ru xyaalal naq li Yos naxye qe naq inkʼaʼ tqakʼulubʼa aʼan naq li reetalil li kikʼ oxloqʼ chiru aʼan (Levítico 17:11; Colosenses 1:20).