Chʼolchʼo naq naxsume. Ebʼ li raqal li Santil Hu ut nekeʼxye wiibʼ oxibʼ li poyanam naxkʼut naq li Yos naxsume li qatij. Li Santil Hu naxye chirix li Yos: «Li Qaawaʼ naxkʼe li kʼaru nekeʼraj ebʼ li nekeʼxuwank ru. Narabʼi naq nekeʼxtzʼaama xtenqʼanqilebʼ chiru ut naxkolebʼ» (Salmo 145:19, Li Santil Hu, Wycliffe Bible Translators. Akʼ tzʼiibʼ). Abʼanan, re naq li Yos tixsume li qatij, naroybʼeni naq tqabʼaanu wiibʼ oxibʼ li naʼlebʼ.

Li naroybʼeni li Yos naq tqabʼaanu

•   Naraj naq chiru tootijoq, inkʼaʼ chiru li Jesús, li xMaría, ebʼ li saant chi moko chiru junaq li ánjel malaj li jalam u. Li Santil Hu naxye naq li Qayos Jehobʼa narabʼi li qatij (Salmo 65:3).

•   Inkʼaʼ tqatzʼaama li inkʼaʼ naxchap ribʼ rikʼin li rajom malaj li xtaql, li natawmank saʼ li Santil Hu (1 Juan 5:14).

•   Tootijoq saʼ xkʼabʼaʼ li Jesús re xkʼutbʼesinkil naq wank xwankil. Li Jesús kixye: «Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ» (Juan 14:6, Li Santil Hu, Sociedad Bíblica de Guatemala, SBG).

•   Wanq qapaabʼal. Ut wi xlajk qapaabʼal, tqatzʼaama xtzʼaqobʼ (Mateo 21:22; Lucas 17:5).

•   Tqakubʼsi qawankil ut tqaye li yaal. Li Santil Hu naxye: «Jwal nim li Qaawaʼ, ut naril li maakʼaʼ xwankil» (Salmo 138:6, Ebʼ li Salmo, Diócesis de Verapaz).

•   Junelik tootijoq. Li Jesús kixye li tkʼulmanq wi tqabʼaanu aʼin: «Meekanabʼ patzʼok ut tkʼeheʼq eere» (Lucas 11:9, La Biblia. Traducción del Nuevo Mundo, TNM, 2019 saʼ español).

Ebʼ li naʼlebʼ li moko wank ta xwankil chiru li Yos

•   Li qatenamit malaj li qateep. «Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (Hechos 10:34, 35, SBG).

•   Maakʼaʼ naxye chanru tootijoq. Naru nokootijok chi chunchu, chi hupju, chi wiqʼwo malaj chi xaqxo (1 Crónicas 17:16; Nehemías 8:6; Daniel 6:10; Marcos 11:25).

•   Aʼ yaal ma tootijoq saʼ kawil kuxej malaj saʼ li qaanm. Li Yos naxsume ajwiʼ li qatij li naqabʼaanu saʼ li qachʼool (Nehemías 2:1-6).

•   Aʼ yaal ma nim malaj kachʼin li qakʼaʼuxl. Li Santil Hu naxye qe naq tqabʼaanu aʼin: «Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere [“naxkʼe xchʼool cheerix”, TNM]» (1 Pedro 5:7, SBG).