Li Yos naraj naq tqanaw ru chiʼus, naq toowanq choʼq ramiiw, naq tqara ut naq tookʼanjelaq chiru chi anchal qachʼool (Mateo 22:37, 38; Santiago 4:8). Tooruuq xnawbʼal chanru tqabʼaanu li rajom li Jehobʼa wi naqatzol li xyuʼam ut li xkʼutum li Jesús xbʼaan naq aʼan kiʼaatinak chirix li rajom li Yos ut kixyuʼami (Juan 7:16, 17). Li Jesús kixye chirix li xyuʼam: «Xinkubʼe chaq [...] moko re ta xbʼaanunkil li wajom [...], re bʼan xbʼaanunkil li rajom li kitaqlank chaq we» (Juan 6:38, Li Santil Hu, Sociedad Bíblica de Guatemala, SBG).

Ma twoybʼeni li xyaabʼ xkux li Yos, junaq li eetalil malaj li moy u re xnawbʼal kʼaru naraj choʼq we?

 Inkʼaʼ, xbʼaan naq aʼan naroksi li Santil Hu re xkʼebʼal chi naweʼk li resil rehebʼ li qas qiitzʼin. Saʼ li Santil Hu naqataw li naʼajmank re naq kawresinbʼilaqo «re xbʼaanunkil chixjunil li chaabʼil kʼanjel» (2 Timoteo 3:16, 17, SBG). Li Yos naraj naq tqanaw bʼar wank li rajom choʼq qe rikʼin xtzolbʼal li Santil Hu ut roksinkil li qakʼaʼuxl (Romanos 12:1, 2; Efesios 5:17).

Ma tinruuq xbʼaanunkil li rajom li Yos?

 Tatruuq xbʼaanunkil, xbʼaan naq li Yos naxye qe saʼ li Raatin naq «moko chʼaʼaj ta xpaabʼankil li xchaqʼrabʼ» (1 Juan 5:3, Li Santil Hu, Wycliffe Bible Translators, Wy. Akʼ tzʼiibʼ). Aʼin moko naraj ta xyeebʼal naq sahaq xpaabʼankil junelik. Abʼan, taataw rusilal wi nakaakʼe aaqʼe chirix. Joʼkan naq, li Jesús kixye: «Qʼaxal wiʼchik us choʼq rehebʼ li nekeʼabʼink re li raatin li Dios ut nekeʼxbʼaanu li kʼaʼru naxye» (Lucas 11:28, Wy).