Joʼkan tzʼaqal. Li Santil Hu naxye naq «li Dios naxkʼojobʼ xchʼoolebʼ li rahebʼ saʼ xchʼool» (2 Corintios 7:6, Li Santil Hu, Wycliffe Bible Translators, Wy. Akʼ tzʼiibʼ).

•   Naxkawresihebʼ. Chanru li Yos «naxkʼojobʼ xchʼoolebʼ» li qʼaxal rahebʼ saʼ xchʼool? Maare inkʼaʼ narisi chixjunil li xchʼaʼajkilalebʼ, abʼan naxkawresi xchʼoolebʼ (Filipenses 4:13). Chʼolchʼooq chaawu naq li Yos narabʼi laatij, xbʼaan naq li Santil Hu naxye: «Li Qaawaʼ junelik wank chixtenqʼanqilebʼ li nekeʼchʼinan xchʼoolebʼ [...]. Ut naxkʼe xkawilebʼ xchʼool li nekeʼrekʼa naq inkʼaʼ chik nekeʼxkuy xnumsinkil li rahilal» (Salmo 34:18, Wy). Li Yos narabʼi ajwiʼ laatij usta inkʼaʼ nakatruuk xyeebʼal li nakaawekʼa (Romanos 8:26, 27).

•   Naxkʼe li chaabʼil eetalil. Li kitzʼiibʼank re jun rehebʼ li salmo kixye aʼin re li Yos naq ra chaq saʼ xchʼool: «Toj saʼ xchamal li rahilal ninyaabʼa laakʼabʼaʼ, at Qaawaʼ». Kʼaru kitenqʼank re saʼ li hoonal aʼan? Kixjultika naq li Yos naxkuy li xmaak. Aʼan kixye: «Wi ta nakakʼe saʼ aachʼool li qamaak, at Qaawaʼ, ani truuq tkanaaq chi xaqxo chawu? Abʼan laaʼat nakakuy nakasach li qamaak, joʼkan naq aakʼulubʼ naq tatqoxloqʼi» (Salmo 130:1, 3, 4, Li Santil Hu, Sociedad Bíblica de Guatemala, SBG).

•   Naxkʼe roybʼenihomebʼ. Li Yos moko kaʼaj tawiʼ naxkʼojobʼ qachʼool, naxye qe naq saʼ junaq kutan trisi chixjunil li nakʼamok chaq re li rahilal ut li rahil chʼoolej. Naq tixbʼaanu aʼin, «inkʼaʼ chik tjultikamanq li kʼaʼaq re ru kilajnumeʼ ut maaʼani chik tkʼoxlaq chirix» (Isaías 65:17, Wy).

 Esil: Joʼ aj testiiw re li Jehobʼa chʼolchʼo chiqu naq li Yos nokooxtenqʼa, abʼan naqasikʼ ajwiʼ li qatenqʼ rikʼinebʼ laj bʼanonel naq wank junaq qayajel joʼ li rahil chʼoolej (Marcos 2:17). Abʼanan inkʼaʼ naqaye kʼaru li bʼan naru troksi junaq, xbʼaan naq li junjunq yal re kʼaru tixbʼaanu.