Li Yos kixyobʼtesi li winq ut li ixq ut kixye naq kaʼajwiʼ li sumsukebʼ teʼruuq chi wank saʼ wiibʼal (Génesis 1:27, 28; Levítico 18:22; Proverbios 5:18, 19). Joʼkan bʼiʼ, li Yos inkʼaʼ naxkʼulubʼa naq li winq twanq rikʼin rechwinqilal ut li ixq rikʼin rech-ixqilal. Chi moko naq junaq li winq ut junaq li ixq teʼwanq saʼ wiibʼal chi inkʼaʼ sumsukebʼ (1 Corintios 6:18). Joʼkan ajwiʼ, chi moko naxkʼulubʼa naq nekeʼxchʼeʼ li xtzʼejwal ut ritebʼ chiribʼilebʼ ribʼ rikʼin xtzʼuumal rehebʼ malaj rikʼin ruqʼebʼ.

 Li Santil Hu inkʼaʼ naxkʼulubʼa naq junaq li winq twanq rikʼin rechwinqilal ut junaq li ixq rikʼin rech-ixqilal ut inkʼaʼ ajwiʼ naxkʼulubʼa naq xikʼ tqilebʼ li kristiʼaan aʼin xbʼaan naq naxkʼe li taql aʼin: «Cheroxloqʼi chixjunilebʼ» (1 Pedro 2:17, Li Santil Hu, Sociedad Bíblica de Guatemala, SBG).

 Ma ak re naq junaq li kristiʼaan nayoʼlaak joʼ ixqiwinq?

Li Santil Hu naxye naq chalen chaq saʼ qayoʼlajik inkʼaʼ nawulak chiqu xbʼaanunkil li naxye li Yos. Abʼan li Santil Hu inkʼaʼ naxye naq ak saʼ qakikʼel wank ratawankil wanq joʼ ixqiwinq (Romanos 7:21-25). Naʼaatinak bʼan chirix naq li Yos xikʼ naril ebʼ li tzʼaj aj naʼlebʼ aʼin ut li xbʼaanuhom ebʼ li kristiʼaan li nekeʼyuʼamink re aʼin.

 Ma tatruuq xpaabʼankil li Yos usta nakaawataw naʼlebʼak joʼebʼ li ixqiwinq?

Li Santil Hu naxye: «Kʼehomaq chi kamk li ruuchichʼochʼil naʼlebʼ wank eerikʼin: li koʼbʼeetak yumbʼeetak, [...] li xrahinkil ru li inkʼaʼ us» (Colosenses 3:5, SBG). Re naq inkʼaʼ tootʼaneʼq saʼ junaq li nimla maak, tento naq tqisi saʼ li qachʼool chixjunil li narataw li tzʼejwalej ut laaʼo chik tootaqlanq saʼ xbʼeen li qakʼaʼuxl. Tento naq rajlal yooqo xkʼoxlankil rix ebʼ li chaabʼil naʼlebʼ li tooxtenqʼa chi tzʼeqtaanankil ebʼ li tzʼaj aj naʼlebʼ aʼin (Filipenses 4:8; Santiago 1:14, 15). Yaal, maare saʼ xtiklajik tchʼaʼajkoʼq xbʼaanunkil abʼan saʼ xnumikebʼ li kutan moko chʼaʼajkaq ta chik. Li Yos naxyeechiʼi aatenqʼankil re naq «akʼobʼresinbʼilaq taxaq [laa]kʼaʼuxl xbʼaan li Musiqʼej» (Efesios 4:22-24, SBG).

 Moko kaʼaj tawiʼ li nekeʼrataw naʼlebʼak joʼ ixqiwinq nekeʼxkuy ribʼ chiru li narataw li tzʼejwalej, chi miyon ajwiʼ ebʼ li kristiʼaan nekeʼxkuy ribʼebʼ re naq teʼxsahobʼresi xchʼool li Yos. Saʼ xyanq ebʼ li miyon chi kristiʼaan aʼin wankebʼ li winq ut li ixq li wankebʼ xjunes li toj maajiʼ naxkʼe ribʼ chiruhebʼ sumlaak. Joʼ ajwiʼ li sumsukebʼ li inkʼaʼ nekeʼruuk wank saʼ wiibʼal rikʼin li xsumʼaatin. Chixjunilebʼ nekeʼxyal xqʼe re naq inkʼaʼ teʼtʼaneʼq saʼ li aaleek aʼin ut nekeʼxkuy ribʼ. Usta joʼkan, sahebʼ saʼ xchʼool. Joʼkan ajwiʼ, junaq li kristiʼaan li naraj naʼlebʼak joʼebʼ li ixqiwinq truuq xloqʼoninkil ru li Yos chi sa saʼ xchʼool wi naxkuy ribʼ chiru li narataw li tzʼejwalej (Deuteronomio 30:19).