Ak junxilaj naxxaqabʼ laj Yobʼtesinel li chaqʼrabʼ chirix li sumlaak, naq ebʼ li awabʼej xeʼok risinkil li chaqʼrabʼ chirix aʼin. Li Santil Hu naxye: «Li winq tixkanabʼ li xnaʼ xyuwaʼ, tixlaqʼabʼ ribʼ rikʼin li rixaqil, ut junajebʼ [...] chi tzʼejwalej» (Génesis 2:24, Li Santil Hu, Sociedad Bíblica de Guatemala). Li tasal hu Diccionario expositivo de palabras del Antiguo y del Nuevo Testamento exhaustivo, de W. E. Vine, kixye naq li aatin saʼ hebreo li jalbʼil ru joʼ «rixaqil» naxkʼut naq yook chi aatinak chirix «jun li ixq». Moqon chik, li Jesús kixye naq saʼ xtiklajik li Yos kixyobʼtesi «winq ut ixq» aʼin naraj xyeebʼal naq kaʼajwiʼ truuq chi sumlaak jun li winq rikʼin jun li ixq (Mateo 19:4, Li Santil Hu, Wycliffe Bible Translators).

 Abʼanan, li Yos kixxaqabʼ li sumlaak re naq li ixq ut li winq teʼwanq saʼ wiibʼal ut maajunwa teʼxkanabʼ ribʼ. Ut yobʼtesinbʼilebʼ re naq junajaqebʼ, teʼruuq xsahobʼresinkil xchʼool, teʼwanq saʼ wiibʼal ut teʼwanq ajwiʼ xkokʼal.