Laj Tza ut ebʼ li maaʼus aj musiqʼej nekeʼxtakchiʼi ebʼ li kristiʼaan, joʼkan naq li Santil Hu naxye: «Chixjunil li ruuchichʼochʼ wank rubʼel xwankil li maaʼus» (1 Juan 5:19, Li Santil Hu, Sociedad Bíblica de Guatemala, SBG). Li Santil Hu naxkʼut kʼaru li naʼlebʼ naroksi laj Tza re xbʼaanunkil aʼin. Qilaq wiibʼ oxibʼ rehebʼ.

•   Li bʼalaqʼik. Li Santil Hu naxye naq kaw xaqxoqex chiru leeraalenkil xbʼaan laj Tza (Efesios 6:11). Jun li naʼlebʼ li naxyal xbʼaanunkil laj Tza aʼan roksinkil ebʼ li nekeʼokenk chirix re naq tqakʼoxla naq aʼanebʼ tzʼaqal aj paabʼanel (2 Corintios 11:13-15).

•   Ebʼ li xnaʼlebʼ li maaʼus aj musiqʼej. Laj Tza naroksi ebʼ laj tuul, ebʼ laj qʼe, ebʼ laj ilol chahim ut jalan chik li xnaʼlebʼ li maaʼus aj musiqʼej re xbʼalaqʼinkil ebʼ li kristiʼaan (Deuteronomio 18:10-12). Joʼkan ajwiʼ, li nekeʼroksi li bʼan li nakanobʼresink u, li nekeʼxkanabʼ naq teʼwartesiiq ut teʼsacheʼq li xkʼaʼuxl, nekeʼxkanabʼ naq li maaʼus aj musiqʼej ttaqlanq saʼ xbʼeenebʼ (Lucas 11:24-26).

•   Li bʼalaqʼil paabʼal. Ebʼ li paabʼal li inkʼaʼ nekeʼxkʼut li yaal nekeʼxram chiruhebʼ li kristiʼaan xpaabʼankil li Yos (1 Corintios 10:20). Li Santil Hu naxye naq ebʼ li bʼalaqʼil naʼlebʼ aʼin, aʼan «xkʼutumebʼ laj tza» (1 Timoteo 4:1, SBG).

•   Li echaninbʼilebʼ xbʼaan laj Tza. Li Santil Hu naʼaatinak chirix wiibʼ oxibʼ li kristiʼaan li xeʼechaniik xbʼaan ebʼ li maaʼus aj musiqʼej. Wank sut ebʼ li maaʼus aj musiqʼej nekeʼxbʼaanu naq ebʼ li kristiʼaan li echaninbʼilebʼ xbʼaanebʼ teʼmutzʼoʼq, inkʼaʼ chik teʼaatinaq ut teʼxtochʼ malaj teʼxtawasi ribʼebʼ (Mateo 12:22; Marcos 5:2-5).

Chanru tqakol qibʼ chiru li xraʼal laj Tza?

 Moko wank ta junaq xyaalal kʼaʼut tqaxuwa ru ebʼ li maaʼus aj musiqʼej. Li Santil Hu naxye chanru tqakol qibʼ chiru laj Tza. Arin natawmank wiibʼ oxibʼ li naʼlebʼ:

•    Kʼe reetal «kʼaru li xnaʼlebʼ» laj Tza re naq tatruuq xqʼaxbʼal ru ebʼ li xraʼal (2 Corintios 2:11, SBG).

•    Tzol li Santil Hu ut yuʼami li nakaatzol. Wi nakaayuʼami li xnaʼlebʼ li Santil Hu, tatruuq xkolbʼal aawibʼ chiru laj Tza (Efesios 6:11-18).

•    Kut chi najt chixjunil li naxchap ribʼ rikʼin li xbʼaanuhom ebʼ li maaʼus aj musiqʼej (Hechos 19:19). Saʼ xyanq ebʼ li naʼlebʼ aʼin wank ebʼ li tasal hu, ebʼ li bʼideo, ebʼ li bʼich malaj ebʼ li eetalil.