Li chaqʼrabʼ chirix «uhej rikʼin saʼ uhej» wank chaq saʼ xyanq li Xchaqʼrabʼ laj Moisés. Li Jesús kiʼaatinak chirix aʼin naq kixkʼe li xseeraqʼ saʼ li tzuul (Mateo 5:38; Éxodo 21:24, 25; Deuteronomio 19:21). Aʼin naraj xyeebʼal naq li namaakobʼk tento naq tbʼaanuuq re joʼ chanru kixbʼaanu.

 Li chaqʼrabʼ aʼin natenebʼaak saʼ xbʼeenebʼ li nekeʼraj xbʼaanunkil junaq li rahilal. Joʼkan naq saʼ Levítico 24:20, Li Santil Hu, Sociedad Bíblica de Guatemala, SBG, naxye: «Tixtoj rix li toqol rikʼin toqol, saʼ uhej rikʼin saʼ uhej, ruuch e rikʼin ruuch e; taarahobʼtesiiq ajwiʼ aʼan joʼ xbʼaanu re li jun chik».

•  Kʼaru naraj xyeebʼal li chaqʼrabʼ aʼin?

•  Ma toj wank xwankil saʼebʼ li qakutan?

•  Li nayeemank chirix li chaqʼrabʼ aʼin

•  Li Jesús kixtuqubʼ ru li nekeʼxye li kristiʼaan

 Li chaqʼrabʼ aʼin moko naxkʼe ta li leseens re xkʼebʼal reqaj li nabʼaanumank re junaq. Kixtenqʼahebʼ bʼan laj raqol aatin chi xkʼebʼal reetal chanru teʼraqoq aatin saʼ xbʼeen li namaakobʼk.

 Joʼkan ajwiʼ li chaqʼrabʼ aʼin natenqʼank re naq wi junaq yook xkʼoxlankil xbʼaanunkil junaq maaʼusilal malaj kixbʼaanu ut naril naq nabʼaanumank li naxye li Xchaqʼrabʼ li Jehobʼa inkʼaʼ chik tixbʼaanu «junaq maaʼusilal kamaʼ aʼan» (Deuteronomio 19:20, SBG).

 Moko tenebʼanbʼil ta chik saʼ xbʼeenebʼ li kristiʼaan xbʼaan naq kixsach xwankil naq kikamk li Jesús (Romanos 10:4).

 Nokooxtenqʼa ajwiʼ xtawbʼal ru chanru nakʼoxlak li Yos (Salmo 89:15). Naxkʼut ajwiʼ chiqu naq li Yos nawulak chiru naq traqmanq aatin saʼ xbʼeen junaq joʼ chanru xkʼulubʼ, xbʼaan naq nawulak chiru li tiikilal (Jeremías 30:11).

 Wiibʼ oxibʼ nekeʼxye: Li chaqʼrabʼ aʼin naxbʼaanu naq junelik yooko chi pleetik.

 Li yaal: Saʼ Levítico 19:18, SBG, naxye: «Mat-eeqajunk raaxiikʼ chi moko chakʼe saʼ aachʼool li rahilal xbʼaanuhomebʼ laawech tenamitul». Tqakʼojobʼ bʼan qachʼool rikʼin li Yos ut rikʼin li kixxaqabʼ re xtuqubʼankil ru li chʼaʼajkilal (Deuteronomio 32:35).