Wi ebʼ li poyanam wankebʼ xkʼabʼaʼ, ma tojaʼ ta chik li Yos. Wank xwankil roksinkil xkʼabʼaʼebʼ li poyanam re naq toowanq choʼq ramiiwebʼ ut jwal wank ajwiʼ xwankil aʼin re naq toowanq choʼq ramiiw li Yos.

 Li Yos naxye saʼ li Santil Hu: «Laaʼin li Qaawaʼ [“Jehobʼa”, TNM]. Aʼin tzʼaqal linkʼabʼaʼ» (Isaías 42:8, Li Santil Hu, Sociedad Bíblica de Guatemala, SBG). Usta wank naabʼal ruuchil xkʼabʼaʼ joʼ «Nimajwal Yos», «At Qaawaʼ, laaʼat kayiibʼ li choxachʼochʼ» ut «Yoobʼtesinel», naxkʼe xkʼulubʼebʼ li xmoos ut naxye rehebʼ naq teʼxyaabʼa li xkʼabʼaʼ (Génesis 17:1, SBG; Hechos 4:24, SBG; 1 Pedro 4:19, SBG).

 Saʼ naabʼal rehebʼ li Santil Hu, li xkʼabʼaʼ li Yos natawmank saʼ Éxodo 6:3, Exodo en Kʼekchiʼ, Sociedades Bíblicas en Guatemala. Akʼ tzʼiibʼ. Saʼ li raqal aʼin li Yos naxye: «Laaʼin xinkʼutbʼesi wibʼ chiruhebʼ laj Abraham, laj Isaac joʼ ajwiʼ laj Jacob chi joʼ li nimajwal Dios. Aban inkʼaʼ xinkʼutbʼesi wibʼ chiruhebʼ joʼ li Dios li nakolok re, Jehova inkʼabaʼ».

 Chiru naabʼal siʼeent chihabʼ, saʼ kastiiy xʼoksimank li kʼabʼaʼej Jehobʼa. Usta wankebʼ winq li wankebʼ xnawom nekeʼwulak chiru roksinkil li kʼabʼaʼej Yavé, abʼan li jwal nawno ru aʼan Jehobʼa. Li xbʼeen xtasalil li Santil Hu kitzʼiibʼamank saʼ hebreo, li aatinobʼaal aʼin natikibʼamank xtzʼiibʼankil saʼ li nim uqʼ toj saʼ tzʼe uqʼ. Li xkʼabʼaʼ li Yos saʼ hebreo nakʼutbʼesimank rikʼin kaahibʼ li tzʼiibʼ: יהוה. Li kaahibʼ chi tzʼiibʼ aʼin YHWH naxkʼabʼaʼi Tetragrámaton.