Li Santil Hu naxye kʼaru tento tqabʼaanu re xtawbʼal ru li naʼlebʼ li wank chisaʼ. Yalaq ani naru natawok re li naxye li Yos saʼ li Raatin, «moko chʼaʼaj ta [chik]» (Deuteronomio 30:11, Li Santil Hu, Sociedad Bíblica de Guatemala, SBG).

Li naʼajmank

1.   Chaabʼil tatnaʼlebʼaq. Aajel ru naq taakubʼsi aawankil ut taakʼulubʼa naq li Santil Hu aʼan Raatin li Yos. Aʼan xikʼ naril li qʼetqʼetil (1 Tesalonicenses 2:13; Santiago 4:6). Aʼin moko naraj ta xyeebʼal naq taapaabʼ chixjunil li taawabʼi, li Yos naraj naq taawoksi chiʼus laakʼaʼuxl (Romanos 12:1, 2).

2.   Taatzʼaama aanaʼlebʼ naq tattijoq. Li Santil Hu naxye: «Meekʼojobʼ eechʼool eejunes eeribʼ» (Proverbios 3:5, Li Santil Hu, Wycliffe Bible Translators. Akʼ tzʼiibʼ). Aajel ru naq inkʼaʼ taakanabʼ xtzʼaamankil aanaʼlebʼ re li Yos re naq taataw ru li Santil Hu (Santiago 1:5).

3.   Rajlal tattzoloq. Wi rajlal taatzol li Santil Hu, qʼaxal taataw wiʼ chik rusilal chiru naq yal joqʼeqil taawil xsaʼ (Josué 1:8).

4.   Taatzol ebʼ li naʼlebʼ chi tustu ru. Jun rehebʼ li naʼlebʼ li nakʼanjelak re xtzolbʼal li naxkʼut li Santil Hu aʼan xtzʼilbʼal rix li junjunq chi naʼlebʼ chi tustu ru. Naru taatikibʼ xtzolbʼal ebʼ li xbʼeen naʼlebʼ, moqon chik, ebʼ li xchamal naʼlebʼ (Hebreos 6:1, 2). Naq taajuntaqʼeeta li jalan jalanq chi raqal, taakʼe reetal naq li Santil Hu naxchʼolobʼ ribʼ xjunes, ut nachʼolaak ajwiʼ ru ebʼ li aatin li «chʼaʼaj xtawbʼal ru» (2 Pedro 3:16, SBG).

5.   Taasikʼ aatenqʼankil. Li Santil Hu naxye naq taapatzʼ aatenqʼankil rehebʼ li nekeʼxtaw ru chiʼus (Hechos 8:30, 31). Ebʼ laj testiiw re li Jehobʼa nekeʼxtzol ebʼ li qas qiitzʼin chirix li Santil Hu chi sibʼil. Joʼ keʼxbʼaanu chaq ebʼ li xbʼeen aj paabʼanel, nekeʼxtzʼil rix chiʼus jalan jalanq li raqal re xtenqʼankilebʼ li qas qiitzʼin chi xtawbʼal ru kʼaru tzʼaqal naxchʼolobʼ li Santil Hu (Hechos 17:2, 3).

Li inkʼaʼ naʼajmank

1.   Naq numtajenaq aanaʼlebʼ ut aatzolbʼal. Li kabʼlaju chi tzolom li kitaqenk re li Jesús, keʼruuk xtawbʼal ru li naxye li Santil Hu ut xkʼutbʼal chiruhebʼ li junchʼol usta wankebʼ keʼxye naq «moko tzolbʼilebʼ ta ut aj kʼalebʼaalebʼ» (Hechos 4:13, SBG).

2.   Naq wanq aatumin. Tatruuq xnawbʼal li naxkʼut li Santil Hu ut maajun sentaaw taatoj. Li Jesús kixye rehebʼ li xtzolom: «Chi maatan xekʼul, ut chi maatan ajwiʼ teekʼe» (Mateo 10:8, SBG).