Li Yos naril chixjunil ut naru naroksi li xmetzʼew yalaq joqʼe ut yalaq bʼar (Proverbios 15:3; Hebreos 4:13). Abʼanan, li Santil Hu moko naxkʼut ta naq li Yos wank yalaq bʼar, naxkʼut bʼan naq aʼan jun musiqʼej ut wank jun xnaʼaj.

•   Chanru li Yos: Li Yos moko aʼan ta jun kristiʼaan. Aʼan bʼan jun musiqʼej (Juan 4:24). Joʼkan naq maaʼani naru naʼilok re (Juan 1:18). Saʼebʼ li moy u li keʼril ebʼ li propeet li natawmank saʼ li Santil Hu, li Yos junelik wank saʼ jun ajwiʼ chi naʼaj ut inkʼaʼ naxye naq wank yalaq bʼar (Isaías 6:1, 2; Apocalipsis 4:2, 3, 8).

•   Bʼar nanaʼajink li Yos: Li Santil Hu naxye naq li Yos wank jun xnaʼaj «saʼ li choxa» (1 Reyes 8:30, Li Santil Hu, Sociedad Bíblica de Guatemala, SBG). Aʼin naraj xyeebʼal naq li Yos moko wank ta saʼ li Ruuchichʼochʼ malaj saʼ li choxachʼochʼ, wank bʼan saʼ choxa. Li Santil Hu naxkʼut naq saʼ jun kutan ebʼ li ánjel «koxeʼchʼutlaaq rikʼin li Qaawaʼ», a aʼin naxkʼutbʼesi naq wank bʼar nanaʼajink li Yos (Job 1:6, SBG).

Wi moko yalaq bʼar ta wank li Yos, ma relik chi yaal naq naxkʼe xchʼool chiwix?

 Heeheʼ, naxkʼe xchʼool chirixebʼ li kristiʼaan. Usta wank saʼ choxa, aʼin moko naraj ta xyeebʼal naq inkʼaʼ naxkʼe xchʼool chirixebʼ chixjunil li kristiʼaan li wankebʼ arin saʼ xbʼeen li Ruuchichʼochʼ. Naxkʼe xchʼool chi rilbʼal chixjunil li naqabʼaanu re abʼink chiru ut nokooxtenqʼa (1 Reyes 8:39; 2 Crónicas 16:9). Chanru naxkʼutbʼesi li Yos naq naxkʼe xchʼool chiqix ut naq nokooril?

•   Naq nokootijok: Saʼ li hoonal naq yooko chi tijok li Jehobʼa nokoorabʼi (2 Crónicas 18:31).

•   Naq ra qachʼool: «Nachʼ wank li Qaawaʼ rikʼinebʼ li nekeʼmaynak xchʼool: aʼan naxkolebʼ li maakʼaʼ chik roybʼenihomebʼ» (Salmo 34:19, SBG).

•   Naq naʼajmank chiqu junaq li naʼlebʼ: Li Jehobʼa naroksi li Raatin re xkʼebʼal qachoxahil naʼlebʼ ut re xkʼutbʼal chiqu li bʼe li tento tqakʼam (Salmo 32:8).

Li nayeemank chirix naq yalaq bʼar wank li Yos

 Li nayeemank: Saʼ Salmo 139:8, SBG, naxkʼut naq yalaq bʼar wank li Yos xbʼaan naq naxye: «Wi ta tintaqeʼq saʼ choxa, aran wankat laaʼat; wi ta tinsotobʼ wibʼ saʼ xnaʼajebʼ li kamenaq, aran ajwiʼ wankat chaq».

 Li yaal: Li raqal aʼin moko naraj ta xyeebʼal naq li Yos wank saʼ chixjunil li naʼaj saʼ li hoonal ajwiʼ aʼan, naraj bʼan xyeebʼal naq li Yos naru nokooxtenqʼa maakʼaʼ naxye li naʼaj bʼarwiʼ wanko.