«Xinyal xyaabʼasinkil li Santil Hu abʼan kʼajoʼ xnimal roq»​ (Briana, 15 chihabʼ).

 Ma joʼkan nakaawekʼa? Li tzolom aʼin tatxtenqʼa.

•  Kʼaʼut aajel ru rilbʼal xsaʼ li Santil Hu?

•  Chanru tinyaabʼasi xsaʼ li Santil Hu?

•  Li nekeʼxye wiibʼ oxibʼ li saaj

 Ma saʼ junpaat nakattitzʼ rilbʼal xsaʼ li Santil Hu? Maare nakaakʼoxla naq li Santil Hu yal naabʼal li tzʼiibʼ wank chisaʼ ut maakʼaʼ li eetalil. Jalan chiru li tele ut ebʼ li bʼideo.

 Qakʼoxlaq chi joʼkaʼin: wi taataw jun li najteril kaax peʼyaal naq taawaj raj rilbʼal kʼaru wank chisaʼ?

 Li Santil Hu chanchan li kaax aʼan. Chisaʼ wank naabʼal li choxahil naʼlebʼ li truuq aatenqʼankil re:

•   Xsikʼbʼal chiʼus li taabʼaanu saʼ laayuʼam.

•   Xkʼambʼal aawibʼ chiʼus rikʼin laanaʼ laayuwaʼ.

•   Xsikʼbʼal chiʼus laawamiiw.

•   Xqʼaxbʼal ru li naxkʼe xkʼaʼuxl wi aachʼool.

 Kʼaʼut nokooxtenqʼa jun li najteril hu joʼ aʼin? Xbʼaan naq «chixjunil li Santil Hu aʼan musiqʼanbʼil xbʼaan li Yos» (2 Timoteo 3:​16, Li Santil Hu, Sociedad Bíblica de Guatemala). Aʼin naraj xyeebʼal naq li naʼlebʼ li wank saʼ li Santil Hu chalenaq rikʼin li nim xwankil saʼ xbʼeen chixjunil li Ruuchichʼochʼ.

 Xbʼeen naʼlebʼ, naru taawil chalen saʼ xtiklajik toj saʼ xraqik. Aʼin tatxtenqʼa re xnawbʼal chirix kʼaru naxkʼe xwankil li Santil Hu. Wank jalan jalanq li naʼlebʼ li tatruuq roksinkil. Qilaq wiibʼ li eetalil:

•    Naru nakaayaabʼasi li 66 chi hu chalen Génesis toj Apocalipsis.

•    Naru nakaayaabʼasi junaq li naʼlebʼ chi tustu ru joʼ chanru kikʼulmank.

 Li tatruuq xbʼaanunkil: Saʼ li tasal 4-A re li hu Li tooxtenqʼa chi xtzolbʼal Raatin li Yos taataw chi tustu ru li kixbʼaanu li Jesús naq kiwank arin saʼ Ruuchichʼochʼ.

 Xkabʼ naʼlebʼ, naru taasikʼ junaq li naʼlebʼ chirix junaq li chʼaʼajkilal li yookat xnumsinkil. Jun eetalil:

•   Ma twulaq raj chaawu xtawbʼal ebʼ laawamiiw li inkʼaʼ tateʼxbʼalaqʼi? Naru taayaabʼasi li esil chirix laj Jonatán ut laj David (1 Samuel, tasal 18-​20). Il kʼaru ebʼ li chaabʼil naʼlebʼ kixbʼaanu naq laj David ut laj Jonatán teʼwanq saʼ tzʼaqal amiiwil.

•   Ma twulaq raj chaawu naq qʼaxal kawaq laapaabʼal re naq inkʼaʼ tattʼaneʼq saʼ junaq li aaleek? Naru nakaawil chanru laj José kixkol ribʼ chiru jun li aaleek (Génesis, tasal 39). Moqon naru nakaabʼaanu li naxye ebʼ li naʼlebʼ aʼin «Como resistir las tentaciones» ut «Acusado falsamente» li tatxtenqʼa re xnawbʼal xkomon li naʼlebʼ.

•   Ma nakaawaj xnawbʼal chanru nakatxtenqʼa li tijok? Il li kikʼulmank rikʼin laj Nehemías (Nehemías, tasal 2). Kʼe reetal chanru li Jehobʼa kixsume li xtij laj Nehemías.

 Li tatruuq xbʼaanunkil: Naq taayaabʼasi li Santil Hu sikʼ junaq li naʼaj bʼarwiʼ maakʼaʼ ut maaʼani tchʼiʼchʼiʼinq aawe.

 Rox naʼlebʼ, sikʼ junaq li eetalil malaj junaq xraqal li Salmo moqon kʼoxla chanru truuq aatenqʼankil aʼin. Naq ak xaayaabʼasi, kʼoxla ebʼ li patzʼom aʼin:

•    Kʼaʼut kixkʼe li Jehobʼa ebʼ li aatin aʼin saʼ li Santil Hu?

•    Kʼaru naxkʼut aʼin chiwu chirix li Jehobʼa ut chirix chanru naxbʼaanu junaq li naʼlebʼ?

•    Chanru tinruuq xyuʼaminkil aʼin?

 Li tatruuq xbʼaanunkil: Tzʼiibʼa li taawaj xbʼaanunkil. Tzʼiibʼa li kutan joqʼe xaatikibʼ rilbʼal xsaʼ li Santil Hu saʼ li «Xtusulal re xyaabʼasinkil li Santil Hu» li wank saʼ li qanaʼaj saʼ Internet.