Laj Will jun li saaj naxye: «Maare taakʼoxla naq tattitzʼq chi rilbʼal xsaʼ li Santil Hu abʼan tkʼulmanq aʼin wi inkʼaʼ nakaanaw chanru xbʼaanunkil».

 Ma taawaj xnawbʼal kʼaru xbʼaanunkil re naq twulaq chaawu xyaabʼasinkil li Santil Hu. Li tzolom aʼin tatxtenqʼa.

•  Kʼoxla naq wankat aran

•  Sikʼ xkomon li naʼlebʼ

•  Li nekeʼxye wiibʼ oxibʼ li saaj

 Bʼaanu ebʼ li naʼlebʼ aʼin:

1.   Sikʼ junaq li naʼlebʼ saʼ li Santil Hu li taawaj xnawbʼal. Maare jun li eetalil li xkʼulmank, jun xraqal rehebʼ li hu li nekeʼaatinak chirix xyuʼam ebʼ li saaj malaj xyaabʼasinkil li Santil Hu rikʼin xyaabʼ li son li natawmank saʼ jw.org.

2.   Yaabʼasi. Naru nakaabʼaanu aajunes malaj saʼ kawil kuxej rikʼin laajunkabʼal malaj ebʼ laawamiiw. Jun rehebʼ naru naxyaabʼasi ut ebʼ li junchʼol naru nekeʼxye ebʼ li aatin li xeʼxye li kristiʼaan li naʼaatinak wiʼ li raqal.

3.   Bʼaanu ebʼ li naʼlebʼ aʼin:

   •   Bʼaanu jun malaj jalan jalanq li eetalil chirix chanru xkʼulmank ut tzʼiibʼa junaq li aatin chixkʼatq li eetalil.

   •   Naq taayaabʼasi chirix jun li kristiʼaan li tiik xchʼool, tzʼiibʼa li xbʼaanuhom, li xnaʼlebʼ ut li osobʼtesihom li kixkʼul.

   •   Bʼaanu naq yookat xkʼebʼal jun li esil chirix li yookat xyaabʼasinkil ut patzʼ rehebʼ li junjunq kʼaru nekeʼxkʼoxla chirix.

   •   Wi jun rehebʼ li kristiʼaan li yookat xtzolbʼal moko us ta xnaʼlebʼak, kʼoxla kʼaru raj xkʼulmank wi us raj kinaʼlebʼak. Jun eetalil, kʼoxla li kixbʼaanu laj Pedro naq kixye naq inkʼaʼ naxnaw ru li Jesús (Marcos 14:66-​72). Kʼaru raj kiruuk xbʼaanunkil laj Pedro saʼ li hoonal aʼan?

   •   Yal xtzʼiibʼankil resil laayuʼam li tixchap ribʼ rikʼin junaq li naʼlebʼ li yookat xtzolbʼal ut tzʼiibʼa ebʼ li naʼlebʼ li nakaatzol chirix aʼin (Romanos 15:4).

 Wi nakaatzʼil rix li yookat xtzolbʼal naru nakaataw li muqmukil naʼlebʼ li wank chisaʼ. Wank sut rikʼin wiibʼ oxibʼ chi aatin naru nakaataw jun chaabʼil naʼlebʼ.

 Jun eetalil, juntaqʼeeta Mateo 28:7 rikʼin Marcos 16:7, Li Santil Hu, Sociedad Bíblica de Guatemala.

•    Kʼaʼut naq laj Marcos kixye naq li Jesús chi seebʼ tixkʼut ribʼ chiruhebʼ li xtzolom ut «laj Pedro»?

•  Re xnawbʼal: Laj Marcos moko kiwank ta chaq aran, chanchan tawiʼ naq laj Pedro kixseeraqʼi re.

•  Li muqmukil naʼlebʼ: Kʼaʼut kikʼojlaak xchʼool laj Pedro naq kixnaw naq li Jesús kiraj wiʼ chik rilbʼal? (Marcos 14:66-​72). Chanru kixkʼut li Jesús naq aʼan tzʼaqal ramiiw laj Pedro? Wi taawaj wank joʼ jun tzʼaqal amiiw, chanru taakʼam aawe rikʼin li Jesús?

 Naq nakaakʼoxla naq wankat aran ut nakaasikʼ xkomon li naʼlebʼ nakaayal xsahil xyaabʼasinkil li Santil Hu.