LI NEKEʼXPATZʼ EBʼ LI SAAJ
Ma maak naq laaʼin ixqiwinq?
«Li xchʼaʼajkoʼk chiwu aʼan, naq nawulak chiwu ebʼ li wechchʼajomil. Xinkʼoxla naq tnumeʼq naq tinwinqo, abʼan moko joʼkan ta» (David, 23 chihabʼ).
Laj David aʼan jun aj paabʼanel ut naraj xbʼaanunkil li nawulak chiru li Yos. Ma truuq xbʼaanunkil li naraj li Yos? Kʼaru naxye li Yos chirixebʼ li ixqiwinq?
Kʼaru naxkʼut li Santil Hu?
Li nekeʼxkʼoxla ebʼ li kristiʼaan chirix ebʼ li ixqiwinq najalaak aʼ yaal chanru xwanjikebʼ ut xtenamitebʼ. Abʼan, joʼ aj paabʼanel inkʼaʼ naqakʼam qe rikʼinebʼ inkʼaʼ ajwiʼ naqaj naq «eekʼasinbʼilaqo ut kʼambʼilaqo xbʼaan li iqʼ yalaq bʼar xbʼaan kʼaʼaq re ru chi naʼlebʼil» (Efesios 4:14, Li Santil Hu, Sociedad Bíblica de Guatemala, SBG). Li naqakʼoxla chirix ebʼ li ixqiwinq ut jalan chik li tzʼiʼbʼeetalil naʼlebʼ chalenaq saʼ li Santil Hu.
Chʼolchʼo ru li naxye li Santil Hu chirix li naʼlebʼ aʼin. Qilaq li naxye:
«Matyoklaak chi xkʼatq junaq winq joʼ tawiʼ naq xatyoklaak chi xkʼatq junaq ixq» (Levítico 18:22, SBG).
«Li Yos kixkʼehebʼ chi xbʼaanunkil li narataw xchʼoolebʼ […] kixqʼaxtesihebʼ saʼ li xutaanalil naʼlebʼ xbʼaan naq li rixaqilebʼ inkʼaʼ chik keʼraj wank rikʼinebʼ, rikʼin bʼan chik li rech ixqilal keʼxbʼaanu li moko uxk naraj» (Romanos 1:24, 26, SBG).
«Meebʼalaqʼi eeribʼ! Ebʼ laj koʼbʼeet aj yumbʼeet, ebʼ laj loqʼoninel li yal kʼoxlanbʼil yos, ebʼ laj muxul sumlaak, ebʼ li ixqiwinq, ebʼ li nekeʼxbʼaanu li maaʼusilal rikʼinebʼ li rech winqilal rech ixqilal, ebʼ laj elqʼ, ebʼ laj rahinel ru bʼihomal, ebʼ laj kalajenaq, ebʼ laj majewanel, ebʼ laj maqʼol re abʼi e inkʼaʼ teʼreechani li xnimajwal awabʼejihom li Yos» (1 Corintios 6:9, 10, SBG).
Li xchaqʼrabʼ li Yos, choʼq qe chiqajunilo, xbʼaan naq laaʼo aj maak ak re naq naqaj xbʼaanunkil junaq li yibʼru aj naʼlebʼ. Abʼan, tento tqayal qaqʼe re xbʼaanunkil li nawulak chiru li Yos (Colosenses 3:5).
Kʼaru naraj xyeebʼal aʼin?
Ma naxye li Santil Hu naq xikʼ tqil ebʼ li ixqiwinq?
Inkʼaʼ. Naxye bʼan qe naq maaʼani xikʼ tqil. Naxye ajwiʼ naq tqayal qaqʼe «chi wank saʼ tuqtuukilal rikʼinebʼ chixjunil» maakʼaʼ naxye ma nekeʼxloqʼoni ru li Yos malaj inkʼaʼ (Hebreos 12:14, SBG). Joʼkan naq moko us ta naq tqeetzʼu, xikʼ tqil ut tqarahobʼtesi ebʼ li ixqiwinq.
Ma naraj xyeebʼal naq ebʼ laj paabʼanel inkʼaʼ nekeʼxkʼulubʼa li chaqʼrabʼ re naq teʼsumlaaq ebʼ li ixqiwinq?
Li Santil Hu naxye naq li Yos kaʼajwiʼ naxkʼulubʼa naq jun li ixq ut jun winq teʼsumlaaq (Mateo 19:4-6). Joʼkan naq, ebʼ laj paabʼanel chi moko nekeʼxkʼulubʼa malaj xikʼ nekeʼril li chaqʼrabʼ li naxye naq ebʼ li ixqiwinq teʼruuq chi sumlaak (Juan 18:36). Naq li awabʼej naxxaqabʼ li chaqʼrabʼ chirix li sumlajik aʼin, aʼan li xkʼaʼuxl li winq moko chalenaq ta saʼ li Santil Hu ut naxye ajwiʼ naq inkʼaʼ tootzʼaqonq saʼ xnaʼlebʼebʼ li awabʼej.
Junchʼol chik li patzʼom.
Ut wi junaq ak naxyuʼami li naʼlebʼ aʼin? Ma naru naxjal xnaʼlebʼ?
Truuq xjalbʼal xnaʼlebʼ. Li Santil Hu naxye naq wankebʼ li kristiʼaan saʼ xkutankil ebʼ li apóstol xeʼruuk xbʼaanunkil aʼin. Naq li apóstol Pablo kixtzʼiibʼa ebʼ laj Corinto, kixye reheb naq li nekeʼxyuʼami li xnaʼlebʼ ebʼ li ixqiwinq, inkʼaʼ teʼrechani li Xnimajwal Awabʼejilal li Yos ut kixye: «Joʼkaʼin naq xeʼwank junjunq saʼ eeyanq» (1 Corintios 6:11, SBG).
Ma naraj xyeebʼal aʼin naq li xeʼxyuʼami chaq li naʼlebʼ aʼin, maajunwa chik xeʼraj xbʼaanunkil? Inkʼaʼ. Li Santil Hu naxye: «Xetiqibʼ eeribʼ rikʼin li akʼ yuʼam: akʼ winqex chik, ut li Yos junelik naʼakʼobʼresink eere toj reetal toxeetaw eenaʼlebʼ chi tzʼaqal re ru» (Colosenses 3:10, SBG). Tento naq inkʼaʼ tqakanabʼ xjalbʼal li qanaʼlebʼ.
Abʼanan, wi wank junaq li naraj xpaabʼankil li Yos abʼan toj narataw wank joʼ ixqiwinq?
Joʼ nakʼulmank rikʼin yalaq kʼaru chi yibʼru aj naʼlebʼ, li kristiʼaan yaal re ma tixyal xqʼe chiru malaj ttʼaneʼq chisaʼ. Chanru tixqʼax ru aʼin? Li Santil Hu naxye: «Chexbʼeeq rubʼel xwankil li Musiqʼej, ut chi joʼkan inkʼaʼ teebʼaanu li naxrahi ru li tzʼejwalej» (Gálatas 5:16, SBG).
Wi xaakʼe reetal, li raqal moko yook ta xyeebʼal naq li kristiʼaan inkʼaʼ chik trataw li yibʼru aj naʼlebʼ. Wi kʼaynaqo bʼan chi xtzolbʼal li Santil Hu ut tijok, moko tchʼaʼajkoʼq ta chiqu xqʼaxbʼal ru li yibʼru aj naʼlebʼ aʼin.
Laj David, li xooʼaatinak wiʼ saʼ xtiklajik, kitenqʼaak naq kixbʼaanu aʼin ut naq kiʼaatinak rikʼin li xnaʼ xyuwaʼ chirix li yook xkʼulbʼal. Aʼan naxye: «Xwekʼa naq xʼelk jun mamaʼ iiq saʼ inbʼeen ut wi inkʼaʼ raj xinbʼayk chi aatinak rikʼin linnaʼ linyuwaʼ, sa raj xinnumsi linsaajilal».
Wi naqayuʼami li xchaqʼrabʼ li Jehobʼa junelik sahaq saʼ qachʼool. Chʼolchʼo chiqu naq li xchaqʼrabʼ tiik ru ut naxkʼe xsahil qachʼool ut wi naqayuʼami, naabʼal li osobʼtesihom tqataw (Salmo 19:9, 12).
