Ebʼ laj testiiw re li Jehobʼa nekeʼroksi jalan jalanq li Santil Hu re xtzolbʼal ribʼebʼ. Oxloqʼ chiruhebʼ li Santil Hu Traducción del Nuevo Mundo de las Santas Escrituras, xbʼaan naq chisaʼ wank xkʼabʼaʼ li Yos, tzʼaqal re ru ut chʼolchʼo ru li naxye. Ut natawmank saʼ naabʼal chi aatinobʼaal.

• Naroksi li xkʼabʼaʼ li Yos. Moko chixjunilebʼ ta li molam nekeʼxkʼe xkʼulubʼ laj echal re li Santil Hu. Jun eetalil, saʼ jun rehebʼ li Santil Hu kitawmank numenaq 70 li xkʼabʼaʼebʼ li qas qiitzʼin li keʼtzʼaqonk re xkʼubʼankil, abʼan keʼrisi chi junajwa li xkʼabʼaʼ li kimusiqʼank chaq re, aʼ li Jehobʼa!

  Saʼ li Santil Hu Traducción del Nuevo Mundo, natawmank chi mil sut li xkʼabʼaʼ li Yos saʼebʼ li naʼaj bʼarwiʼ kitzʼiibʼamank chaq chalen saʼ xtiklajik ut inkʼaʼ nayeemank anihebʼ keʼtzʼaqonk re xkʼubʼankil.

• Tzʼaqal re ru. Wankebʼ li Santil Hu inkʼaʼ nekeʼxye chi tzʼaqal re ru li kitzʼiibʼamank chaq saʼ xtiklajik. Jun eetalil, saʼ jun li Santil Hu naxye saʼ Mateo 7:13: «Okanqex saʼ li okebʼaal kachʼin ru xbʼaan naq nim ru li okebʼaal ut nim ru li bʼe li nakʼamok saʼ li xbʼalbʼa». Abʼanan, naq kitzʼiibʼamank chaq li raqal aʼin inkʼaʼ kixye «xbʼalbʼa», kixye bʼan «osoʼk». Chanchan naq ebʼ laj jalol aatin keʼxkʼoxla naq ebʼ li maaʼusebʼ xnaʼlebʼ nekeʼrahobʼtesiik saʼ xbʼalbʼa. Abʼan, li Santil Hu inkʼaʼ naxkʼut aʼin. Li Santil Hu Traducción del Nuevo Mundo naxye «osoʼk» joʼ kitzʼiibʼamank chaq saʼ xtiklajik.

• Chʼolchʼo ru. Joʼ naqanaw, re naq tnumsimanq chiʼus junaq li naʼlebʼ tento naq tzʼaqal re ru ut chʼolchʼooq ru li tixye. Qilaq jun eetalil. Saʼ naabʼal li Santil Hu kitawmank naq chʼaʼaj li aatin keʼroksi re xnumsinkil li naxye Mateo 5:3: «Us xaq rehebʼ li nebʼaʼebʼ li xchʼool». Saʼebʼ li qakutan, moko chʼolchʼo ta ru li naʼlebʼ aʼin, abʼan naq li Santil Hu Traducción del Nuevo Mundo kixnumsi li raqal aʼin, kixye: «Sahebʼ saʼ xchʼool li nekeʼxkʼe reetal naq naʼajmank li Yos saʼebʼ li xyuʼam».

Joʼ naqil, wank naabʼal rusilal li Santil Hu aʼin xbʼaan naq naroxloqʼi xkʼabʼaʼ li Yos, tzʼiibʼanbʼil chi tzʼaqal re ru ut chʼolchʼo ru naxye, abʼan, toj wank jun chik li rusilal li Santil Hu Traducción del Nuevo Mundo: najekʼimank chi sibʼil. Aʼin naxbʼaanu naq chi miyon ebʼ li qas qiitzʼin nekeʼruuk rilbʼal li Santil Hu saʼebʼ li raatinobʼaal usta maakʼaʼebʼ xtumin re xloqʼbʼal.