Ebʼ laj testiiw re li Jehobʼa inkʼaʼ nekeʼtzʼaqonk saʼ li yalok u xbʼaan ebʼ li naʼlebʼ aʼin:

1. Aʼin xtaql li Yos. Li Santil Hu ak kixye chaq naq ebʼ laj kʼanjel chiru li Yos teʼxsuqʼisi «li qʼesnal chʼiichʼ choʼq piklebʼ chʼochʼ» ut inkʼaʼ chik «teʼxkawresi ribʼ re yalok» (Isaías 2:4, Li Santil Hu, Sociedad Bíblica de Guatemala, SBG).

2. Aʼin xtaql li Jesús. Li Jesús kixye re li apóstol Pedro: «Kʼe wiʼ chik laachʼiichʼ saʼ xnaʼaj, xbʼaan naq chixjunilebʼ li teʼxchap xchʼiichʼ, chi chʼiichʼ ajwiʼ teʼosoʼq» (Mateo 26:52, SBG). Rikʼin li aatin aʼin, li Jesús kixkanabʼ chi chʼolchʼo naq ebʼ li nekeʼtaqenk re maajunwa teʼroksi li puubʼ.

   Li Kriist kixye naq ebʼ li xtzolom «moko rehebʼ ta li ruuchichʼochʼ». Saʼ xkʼabʼaʼ aʼin, maajunwa teʼtzʼaqonq saʼ xnaʼlebʼebʼ li awabʼej (Juan 17:16, SBG). Moko us ta ajwiʼ naq teʼtzʼaqonq saʼ li mululij ibʼ li nabʼaanumank chirixebʼ li soldaad chi moko teʼxram chiru anihaq xqʼaxtesinkil ribʼ saʼ soon.

3. Ebʼ laj paabʼanel tento teʼxra li ras riitzʼin. Li Jesús kixye rehebʼ li xtzolom: «Jun akʼ chaqʼrabʼ ninkʼe eere: naq chera eeribʼ cheribʼil eeribʼ» (Juan 13:34, 35, SBG). Ebʼ li tzʼaqal aj paabʼanel wankebʼ saʼ jalan jalanq li tenamit re chixjunil li ruuchichʼochʼ ut maajunwa teʼxchap li puubʼ re xkamsinkilebʼ ribʼ chiribʼilebʼ ribʼ (1 Juan 3:10-12).

4. Ebʼ li xbʼeen aj paabʼanel inkʼaʼ keʼtzʼaqonk saʼ li yalok. Jun li hu naxye naq «ebʼ li xbʼeen xtzolom li Jesús inkʼaʼ keʼtzʼaqonk saʼ li yalok u chi moko keʼwank saʼ soon» xbʼaan naq chʼolchʼo chiruhebʼ naq ebʼ li naʼlebʼ aʼin «inkʼaʼ naxchap ribʼ rikʼin li rahok li kixkʼut li Jesús ut rikʼin xraabʼalebʼ li xikʼ nekeʼilok rehebʼ» (Encyclopedia of Religion and War). Ut li hu Historia de la decadencia y caída del Imperio romano, li kixtzʼiibʼa laj Edward Gibbon, kixye: «Li xbʼeen aj paabʼanel maajunwa kinumeʼk saʼ xchʼoolebʼ wank choʼq aj puubʼ [...] ut choʼq aj paabʼanel».

Ebʼ laj testiiw re li Jehobʼa nekeʼxbʼaanu li us choʼq rehebʼ li qas qiitzʼin ut maajunwa nekeʼxbʼaanu junaq li naʼlebʼ li tixkʼe saʼ xiwxiw li tenamit li wankebʼ wiʼ. Nekeʼroxloqʼi bʼan li wankebʼ saʼ li awabʼejilal, chi joʼkan nekeʼxpaabʼ li taql aʼin li wank saʼ li Santil Hu.

• «Chexpaabʼanq chejunilex chiruhebʼ li wankebʼ xwankil» (Romanos 13:1, SBG).

• «Qʼajsihomaq bʼiʼ re li awabʼej li kʼaru re li awabʼej, ut re li Yos li kʼaru re li Yos» (Mateo 22:21, SBG).

Joʼkan naq nekeʼxpaabʼ li chaqʼrabʼ, nekeʼxtoj xral li tumin ut nekeʼxbʼaanu li naxye li awabʼej re naq us wanq li teep.