Heeheʼ. Choʼq rehebʼ laj testiiw re li Jehobʼa chixjunil li Santil Hu «musiqʼanbʼil xbʼaan li Yos ut nakʼanjelak» (2 Timoteo 3:16, Li Santil Hu, Sociedad Bíblica de Guatemala, SBG). Saʼ li Santil Hu wank li Najter Chaqʼrabʼ joʼ ajwiʼ li Akʼ Chaqʼrabʼ. Re naq inkʼaʼ ttawmanq ru naq li Najter Chaqʼrabʼ inkʼaʼ chik nakʼanjelak, ebʼ laj testiiw re li Jehobʼa nekeʼxkʼabʼaʼi joʼ li Santil Hu li tzʼiibʼanbʼil saʼ hebreo. Ut li Akʼ Chaqʼrabʼ nekeʼxkʼabʼaʼi joʼ li Santil Hu li tzʼiibʼanbʼil saʼ griego.

Li Yos kixmusiqʼa li apóstol Pablo re naq tixtzʼiibʼa: «Joʼchʼinal joʼnimal kitzʼiibʼaak chaq junxil, re qatzolbʼal naq kitzʼiibʼaak chaq» (Romanos 15:4, SBG). Joʼkan naq, chʼolchʼo chiqu naq li Santil Hu li tzʼiibʼanbʼil saʼ hebreo jwal wank xwankil. Chisaʼ wank ajwiʼ li chaabʼil naʼlebʼ li nokooxtenqʼa saʼ li qayuʼam ut li naʼlebʼ li kikʼulmank chaq. Chixjunil aʼin oxloqʼ chiqu.

• Li kikʼulmank chaq. Li Santil Hu li tzʼiibʼanbʼil saʼ hebreo naxchʼolobʼ chi tzʼaqal re ru chanru li Yos kixkʼubʼ chaq li Ruuchichʼochʼ ut chanru keʼkanaak ebʼ li poyanam rubʼel xwankil li maak. Aʼin nokooxtenqʼa chi xtawbʼal ru bʼar chalenaqo ut kʼaʼut nokookamk (Génesis 2:7, 17). Saʼ li Santil Hu li tzʼiibʼanbʼil saʼ hebreo, xqatzol chanru naq li Yos kixtenqʼahebʼ li keʼxkʼul chaq li chʼaʼajkilal joʼ li naqakʼul anaqwan (Santiago 5:17).

• Li chaabʼil naʼlebʼ li nokooxtenqʼa saʼ li qayuʼam. Saʼ li Santil Hu li tzʼiibʼanbʼil saʼ hebreo natawmank li hu Proverbios ut Eclesiastés ut chisaʼ wank naabʼal li naʼlebʼ li nakʼanjelak saʼebʼ li qakutan. Jun eetalil, naxye qe chanru tqataw li sahil chʼoolejil saʼ li qajunkabʼal (Proverbios 15:17), chanru tqakʼe saʼ xnaʼaj li qakʼanjel (Proverbios 10:4; Eclesiastés 4:6) ut chanru tqoksi chiʼus li qasaajilal (Eclesiastés 11:9–12:1).

Qʼaxal us ajwiʼ xtzolbʼal li Xchaqʼrabʼ laj Moisés joʼ naxkʼut li Torá, malaj saʼ li Pentateuco (li oobʼ chi hu li wank saʼ xtiklajik li Santil Hu). Usta moko tenebʼanbʼil ta saʼ xbʼeenebʼ ebʼ li tzʼaqal aj paabʼanel xpaabʼankil li Chaqʼrabʼ aʼin, li naʼlebʼ li wank chisaʼ naru nokooxtenqʼa chi xtawbʼal li sahil chʼoolejil (Levítico 19:18; Deuteronomio 6:5-7).