Ma xeʼxjal chixjunil li Santil Hu ebʼ laj testiiw re li Jehobʼa re naq tixchap ribʼ rikʼin li nekeʼxpaabʼ?
Inkʼaʼ, maajunwa xeʼxbʼaanu aʼin. Wi jun rehebʼ li naʼlebʼ li nekeʼxpaabʼ inkʼaʼ naxchap ribʼ rikʼin li naxkʼut li Santil Hu, nekeʼxjal.
Chixjunil li nekeʼxpaabʼ elenaq chaq saʼ li Santil Hu. Usta saʼ 1950 kiʼok chi elk li Santil Hu Traducción del Nuevo Mundo de las Santas Escrituras, abʼan naq toj maajiʼ nawulak li chihabʼ aʼin, ak yookebʼ chaq xtzʼilbʼal rix li Santil Hu saʼ xchamal. Re xbʼaanunkil aʼin keʼroksi jalan jalanq li Santil Hu li ak wank chaq. Qilaq wiibʼ oxibʼ rehebʼ li naʼlebʼ li ak naqapaabʼ naq toj maajiʼ naʼelk chaq li Santil Hu Traducción del Nuevo Mundo. Kʼe reetal ma naxchap ribʼ li naʼlebʼ aʼin rikʼin li naxye li Santil Hu.
Li naqapaabʼ: moko oxibʼ ta ru li Yos. Li hu Zionʼs Watch Tower (li nawbʼil ru anaqwan joʼ Laj Kʼaakʼalehom) re julio 1882 kixye: «Ebʼ li qas qiitzʼin li nekeʼril li qahu chʼolchʼo chiruhebʼ naq naqapaabʼ naq wank li Jehobʼa Yos, li Jesús ut li santil musiqʼej, abʼan inkʼaʼ naqakʼulubʼa naq wank oxibʼ chi yos saʼ jun chi yos, malaj saʼ jun chi yos wank oxibʼ. Li naʼlebʼ aʼin moko chalenaq ta saʼ li Santil Hu».
Li naxye li Santil Hu: «Li Jehobʼa li Qayos, li Jehobʼa jun ajwiʼ» (Deuteronomio 6:4, Reina-Valera [RV], 1865, maakʼaʼ saʼ qʼeqchiʼ). «Wank jun ajwiʼ li Yos, li Yuwaʼbʼej, rikʼin nachalk chixjunil, ut saʼ xkʼabʼaʼ yoʼyoko; ut jun li Qawaʼ, Jesukriist» (1 Corintios 8:6, RV, 1865; Akʼ tzʼiibʼ, maakʼaʼ saʼ qʼeqchiʼ). Li Jesús kixye ajwiʼ: «Li Yuwaʼbʼej nim chiwu» (Juan 14:28, Torres Amat, 1823, maakʼaʼ saʼ qʼeqchiʼ).
Li naqapaabʼ: ebʼ li maaʼusebʼ xnaʼlebʼ moko nekeʼrahobʼtesiik ta saʼ xaml. Saʼ li hu Zionʼs Watch Tower re junio 1882 wank jun li tzolom li naxkʼabʼaʼi «Li xtojbʼal li maak aʼan li kamk». Li naʼlebʼ aʼin, isinbʼil chaq saʼ Romanos 6:23, li tzolom kixye ajwiʼ: «Chʼolchʼo ru ut moko chʼaʼaj ta xtawbʼal ru! Nasach qachʼool naq naabʼalebʼ li qas qiitzʼin li nekeʼxpaabʼ naq li Santil Hu aʼan Raatin li Yos nekeʼxjalpaqi ru li naʼlebʼ aʼin; nekeʼxpaabʼ, ut nekeʼxye naq li Santil Hu naxkʼut naq li xtojbʼal li maak aʼan li rahobʼtesiik saʼ xaml».
Li naxye li Santil Hu: «Li ani tmaakobʼq, aʼan tkamq» (Ezequiel 18:4, 20, RV, 1865, maakʼaʼ saʼ qʼeqchiʼ). Ebʼ li xikʼ nekeʼilok re li Yos moko teʼrahobʼtesiiq ta saʼ xaml re naq teʼxtoj xmaak, «cha bʼan teʼkanaaq», aʼin naraj xyeebʼal naq «teʼosoʼq chi junajwa», joʼ naxye 2 Tesalonicenses 1:9, Nácar-Colunga 1944, maakʼaʼ saʼ qʼeqchiʼ.
Li naqapaabʼ: li Xʼawabʼejilal li Yos aʼan jun li awabʼejilal ut moko aʼan ta li wank saʼ li qachʼool. Saʼ li hu Zionʼs Watch Tower re diciembre 1881 kixye chirix li Xʼawabʼejilal li Yos: «Naq kixxaqabʼamank li Xʼawabʼejilal li Yos aran kikʼutunk ani tkanaaq saʼ xnaʼaj ebʼ li awabʼejilal li wank saʼ Ruuchichʼochʼ».
Li naxye li Santil Hu: «Saʼ xkutankil ebʼ li awabʼejilal aʼin, li Xyos li choxa tixwaklesi chaq jun awabʼejilal, li maajoqʼe t-osoʼq, ut li awabʼejilal aʼin inkʼaʼ tnumeʼq saʼ jalan chik tenamit: aʼan bʼan tjukʼuq re ut tsachoq re chixjunil ebʼ li awabʼejilal aʼin: ut aʼan twanq chi junelik» (Daniel 2:44, Scío de San Miguel, 1850; akʼ tzʼiibʼ, maakʼaʼ saʼ qʼeqchiʼ).
Ma kaʼajwiʼ li Santil Hu Traducción del Nuevo Mundo naxkʼut li nekeʼxpaabʼ ebʼ laj testiiw re li Jehobʼa?
Inkʼaʼ; ebʼ laj Testiiw junelik nekeʼroksi jalan jalanq li Santil Hu re xkʼebʼal chi naweʼka li nekeʼxpaabʼ. Naq nekeʼxyeechiʼi xtzolbʼal junaq li qas qiitzʼin chirix li Santil Hu chi sibʼil nekeʼxyeechiʼi ajwiʼ chi sibʼil junaq li Traducción del Nuevo Mundo. Abʼanan, wi junaq li poyanam naraj roksinkil jun chik li Santil Hu re tzolok, ebʼ laj testiiw re li Jehobʼa nekeʼxkʼulubʼa.