Inkʼaʼ. Ebʼ laj testiiw re li Jehobʼa nekeʼxnaw naq inkʼaʼ teʼrechani li kolbʼa ibʼ yal saʼ xkʼabʼaʼ naq nekeʼpuktesink chirekabʼlal (Efesios 2:8). Kʼaʼut?

Qayehaq naq jun li chaabʼil winq naxyeechiʼi li nimla maatan rehebʼ li teʼwulaq saʼ li naʼaj ut saʼ li kutan li kixxaqabʼ. Wi nawbʼil naq paabʼajel li winq aʼin, peʼyaal naq tatwulaq saʼ li naʼaj ut saʼ li hoonal li kixye? Ut moko kaʼaj tawiʼ aʼin taabʼaanu, taaye raj ajwiʼ rehebʼ laakomon ut ebʼ laawamiiw. Peʼyaal naq maaʼani xkʼulubʼ li maatan yal saʼ xkʼabʼaʼ naq kixbʼaanu li kixye li winq? Joʼkan bʼiʼ, xaakʼul li maatan xbʼaan naq xʼalaak saʼ xchʼool li winq xkʼebʼal aawe.

Joʼkan ajwiʼ, ebʼ laj Testiiw nekeʼxpaabʼ naq li Jehobʼa tixkʼe li junelik yuʼam rehebʼ li teʼpaabʼanq re (Romanos 6:23). Ut saʼ xkʼabʼaʼ naq nekeʼraj naq ebʼ li junchʼol teʼxtaw ajwiʼ aʼin, nekeʼxkʼe xqʼe chi xpuktesinkil li yaal. Abʼan chʼolchʼo chiruhebʼ naq li kʼanjel aʼin moko tixkʼe ta xkolbʼalebʼ (Romanos 1:17; 3:28). Rikʼin aʼin naqakʼe reetal, naq maakʼaʼ junaq li naʼlebʼ li qʼaxal chaabʼil re naq tqakʼoxla naq qakʼulubʼ li nimla maatan li nachalk rikʼin li Yos. Li Santil Hu naxye chirix li Yos: «Aʼan kooxkol maawaʼ xbʼaan ta xtiikilal li kʼanjel uxbʼil qabʼaan, saʼ xkʼabʼaʼ bʼan li xnimal ruxtaan» (Tito 3:5, Li Santil Hu, Sociedad Bíblica de Guatemala).